Wan singi fu gi Gado grani

92¹Wan psalm. Wan singi gi a sabatdei.

²Na wan bun sani fu prijse MASRA,

fu singi gi Yu, Yu a Moro Hei Gado,

³fu taki te mamanten fu a bigi lobi fu Yu,

fu taki te neti fu a bow di wi kan bow na Yu tapu,

⁴te a harp nanga tin snaar e prei,

te a citer de fu yere.

⁵Bika Yu, MASRA, meki mi prisiri nanga den bigi wroko fu Yu,

mi e bari fu prisiri fu den sani di Yu du.

⁶Den wroko fu Yu bigi fu tru MASRA,

den prakseri fu Yu dipi srefsrefi.

⁷Don sma nanga sma di no abi ferstan,

no o man ferstan den sani disi:

⁸taki sani e go bun nanga den ogri-ati sma,

taki sma di e du kruktudu e go na fesi,

ma Yu o figi den puru na pasi fu têgo.

⁹MASRA, Yu abi ala makti fu têgo.

¹⁰Luku den feyanti fu Yu MASRA,

luku fa den feyanti fu Yu o dede gwe,

ala den sma di e du ogri, o lon panya.

¹¹Yu e gi mi a srefi krakti leki di fu wan bofru,

Yu kanti nyun oli na mi tapu.

¹²Mi si nanga mi eigi ai fa den feyanti fu mi fadon,

mi yesi yere fa den wan di e du ogri e bari.

¹³A sma di e libi bun ini Gado ai o gro leki wan palmbon,

gro go na loktu leki den sedrebon fu Libanon.

¹⁴Leki bon di prani ini a oso fu MASRA,

den e gro tapu den pren fu wi Gado.

¹⁵Te den owru den o tyari froktu ete,

den o luku yongu èn den o de steifisteifi,

¹⁶leki wan ketoigi taki MASRA e du sani tapu wan leti fasi,

a Trangawan fu mi, no wan kruktu de fu feni na En.

MASRA, a bigi Kownu

93¹MASRA na Kownu!

A glori fu En de leki wan krosi na En skin,

a krakti fu en lontu En.

Grontapu tnapu steifi, a no e seki.

²Yu na kownu sensi na a bigin,

Yu ben de ala ten kba.

³MASRA, den bigi watra e opo den sten,

den bigi watra e meki babari.

⁴Ma MASRA di abi ala makti,

bigi moro a babari di den watra e meki,

bigi moro den bigi skwala fu a se.

⁵Den sani di Yu ben taki èn di wi mus memre de fu fertrow.

MASRA, santafasi na a sani di e moi a oso fu Yu,

fu têgo èn alaten.

Gado, a bigi krutubakra

94¹MASRA, Gado di e strafu den feyanti fu En,

Gado di e strafu, kon ini wan krin faya.

²Du wan sani, Krutubakra fu grontapu,

strafu den sma nanga hei memre.

³MASRA, olanga Yu o libi den ogri-ati sma,

olanga Yu o libi den ogri-ati sma fu den e prisiri?

⁴Den e koti odo èn den e taki bradi,

ala den ogri-ati sma e meki bigi.

⁵Den e trapu a pipel fu Yu, MASRA,

den e pina den sma di Yu teki gi Yusrefi.

⁶Den e kiri den uma di masra dede kba,

den doroseisma nanga den pikin di no abi p'pa nanga m'ma moro.

⁷Den e tak' srefi taki:

“MASRA no e si san wi e du,

a Gado fu Yakob no sabi srefsrefi.”

⁸Un kisi unsrefi, un di no abi ferstan,

oten un o kon koni, un donman?

⁹Fa un kan prakseri taki En di meki a yesi, no o yere,

èn taki En di meki a ai no o si?

¹⁰Na En e strafu den folku

dan fa A no o strafu unu?

Na En e gi libisma sabi?

¹¹Masra sabi den prakseri fu libisma,

den prakseri fu den na soso sani.

¹²MASRA, a sma di Yu e strafu na wan blesi sma,

a sma di Yu e leri a wèt fu Yu.

¹³Yu no o meki noti no miti en ini ten fu bigi ogri,

ma gi a ogri-ati sma wan grebi-olo e diki kba.

¹⁴Bika MASRA no sa drai En baka gi En pipel,

A no sa gwe libi den wan di A teki gi Ensrefi.

¹⁵Strafu o leisi na tapu wan leti fasi baka,

ala den sma di e du Gado wani o tnapu baka a sani dati.

¹⁶Suma feti gi mi nanga den ogri-ati sma?

Suma ben tnapu na mindri mi nanga den sma di e du kruktudu?

¹⁷Na MASRA wawan yepi mi nanga den,

noso mi ben de na dedekondre kba.

¹⁸MASRA, te mi ben prakseri taki: mi e grati gwe,

dan Yu ben kraka mi nanga a bigi lobi fu Yu.

¹⁹Te sorgu ben e moro mi,

a trowstu fu Yu ben meki mi prisiri baka.

²⁰Yu no abi not'noti fu du nanga den ogri-ati krutubakra,

den di e tyari soso problema nanga a wèt di den e leisi.

²¹Den e span anu fu kiri den sma di bun ini Gado ai,

den e leisi dedestrafu gi sma di no du noti.

²²Ma MASRA ben de wan tranga kibripresi gi mi,

èn a Gado fu mi ben de a Trangawan pe mi ben kibri.

²³A pai den fu den ogri di den du,

A puru den na pasi fu den kruktudu fu den.

MASRA, a Gado fu wi, puru den na pasi.