Sranan Tongo Bible 2016 (STB16)
98

Gado e kon fu tiri grontapu

981Wan Psalm.

Singi wan nyun singi gi MASRA,

bika A du wondru,

A tranga anu fu En, a santa anu fu En

tyari a wini gi En.

2MASRA meki a pipel fu En sabi taki A wini,

A meki ala folku si taki A e krutu na tapu wan leti fasi.

3A no fergiti taki a ben pramisi a pipel fu Israel,

taki a ben o sori den En lobi

èn taki den kan fertrow na En tapu.

Heri grontapu si a ferlusu fu a Gado fu wi.

4Heri grontapu, bari fu prisiri gi MASRA!

Bari fu prisiri èn singi gi En.

5Singi gi MASRA nanga a citer,

singi trangatranga nanga a citer,

6nanga trompet nanga tutu.

Meki wan babari fu prisiri gi a Kownu, gi MASRA.

7Meki a se nanga ala san de na ini bari,

grontapu nanga den sma di e libi na en tapu.

8Meki den liba naki na ini den anu,

èn bari fu prisiri makandra nanga den bergi.

9Meki den du dati gi MASRA,

bika A e kon fu krutu grontapu.

A o kon fu krutu grontapu soleki fa a fiti,

krutu den folku na tapu wan leti fasi.

99

Masra, a santa Kownu fu Israel

991MASRA na Kownu - folku, un beifi!

A e sidon tapu den kerub, grontapu, seki!

2MASRA na a Wan nanga ala makti na ini Sion,

A e tiri ala folku.

3Meki den prijse a bigi nen fu Yu di fiti fu kisi lespeki.

A santa.

4Tranga Kownu, di lobi du sani tapu wan leti fasi99:4 A Hebrewtekst fu a pisi disi no krin.,

Yu leri wi den sani di wi mus tan du

fu sani du tapu wan leti fasi,

Yu wani fu sani du nanga leti

èn fa a fiti na ini Israel.

5Gi grani na MASRA, a Gado fu wi,

boigi na En futu.

A santa.

6Moses nanga Aaron ben de priester fu En,

Samuel ben de wan fu den di ben e kari En nen,

den kari MASRA èn A piki den.

7Fu a wolku A ben taki nanga den,

den hori densrefi na den sani di ben mus memre den na san Gado ben taki,

den sani di den ben mus tan du.

8MASRA, Gado fu wi, Yu ben yepi den,

Yu ben de wan Gado gi den di ben gi den pardon,

ma Yu ben strafu den tu te den ben du sani di no bun.

9Gi grani na MASRA, a Gado fu wi,

boigi fesi a santa bergi fu En,

bika MASRA, a Gado fu wi, santa.

100

Wan singi fu prijse Gado

1001Wan psalm te den e tyari a ofrandi fu gi Gado tangi.

Heri grontapu, bari fu prisiri gi MASRA.

2Anbegi En nanga prisiri,

kon na En fesi nanga babari fu prisiri.

3Taki tak': MASRA na Gado.

Na En meki wi èn wi na fu En,

wi na a pipel fu En di A e tiri leki wan skapuman.

4Singi wan singi fu gi En grani,

te wi e psa den bigi doro fu En kon inisei.

Prijse En te wi e kon tapu den pren fu a tempel.

Gi En grani, prijse En nen.

5Bika MASRA bun,

a lobi fu En na fu têgo,

a bow di wi kan bow na En tapu

na fu alaten.