Sranan Tongo Bible 2016 (STB16)
10

A buku san opo

101Baka dati mi si wan tra tranga engel saka kmopo fu heimel. A ben weri wan wolku leki dyakti, èn wan alenbo ben de na tapu en ede. En fesi ben e brenki leki a son, èn den futu fu en ben gersi postu di ben teki faya. 2Ini en anu a ben abi wan pikin lolo san ben opo. Dan a poti en leti futu tapu a se, nanga en kruktu futu tapu a syoro. 3Dan a bari nanga wan tranga sten leki di fu wan lew. Di a bari, den seibi dondru bari tu. 4Di den seibi dondru bari, mi ben wani skrifi san den taki. Ma mi yere wan sten taki kmopo fu heimel taki: “No skrifi san den seibi dondru taki. Meki a tan wan kibritori.”

5Dan a engel di mi si tnapu tapu a se nanga a syoro, opo en let'anu go na loktu.

10:5-7
Eks 20:11
Dan 12:7
Amo 3:7
6Dan a sweri na a Wan di e libi fu têgo èn ala ten, a Wan di meki heimel, grontapu, nanga a se, nanga ala sani san de na ini den. A sweri taki: “A ten fu wakti kba. 7Ma te a di fu seibi engel sa bro en tutu, dan a heri kibritori fu Gado sa kon na krin, soleki fa A ben taigi den profeiti di ben wroko gi En.”

8Dan a sten di mi ben yere taki kmopo fu heimel, bigin taki baka nanga mi. A taigi mi taki: “Go teki a lolo san opo ini a anu fu a engel di e tnapu tapu a se nanga a syoro.”

10:8-10
Ese 2:8—3:3
9So mi go na a engel, èn mi aksi en fu a gi mi a pikin lolo. A langa en gi mi, dan a taigi mi taki: “Teki en, dan yu nyan en. Ini yu bere a sa bita, ma ini yu mofo a sa switi leki oni.” 10Ne mi teki a pikin lolo di a engel langa gi mi, dan mi nyan en. Ini mi mofo a ben switi leki oni, ma di mi swari en, a ben bita ini mi bere. 11Dan mi kisi fu yere taki: “Taigi den sma fu den difrenti folku nanga kondre, den sma di e taki den difrenti tongo, nanga den kownu, ete wan leisi san Gado gi yu fu taki.”