A singi fu den 144.000 man
141Baka dati mi luku, dan mi si a Lam tnapu na tapu Sionbergi makandra nanga wan hondro nanga fotenti-na-fo dusun man. Den man disi ben abi a nen fu a Lam nanga a nen fu En P'pa na den fes'ede.
Kon na krin 7:3
2Dan mi yere wan sten taki kmopo fu heimel. A ben gersi a babari fu wan bigi sula, nanga a babari fu hebi dondru. A sten di mi yere ben de leki te sma e prei na tapu den gitara. 3Den ben e singi wan nyun singi na fesi a kownusturu, nanga den fo libilibi sani, nanga den fesiman. No wan sma ben kan leri a singi disi, boiti den wan hondro nanga fotenti-na-fo dusun man di Gado ben ferlusu puru fu grontapu. 4Den man disi no sabi san na uma, fu di den ben hori densrefi. Bika noiti den ben sribi nanga wan uma. Den e waka baka a Lam, awinsi pe A e go. A ben bai den puru na mindri fu ala sma, fu den sa de den fosiwan di de fu Gado nanga a Lam wawan. 5Noiti den man disi taki wan lei, èn den no meki no wan fowtu.
Den boskopu fu den dri engel
6Dan mi si wan tra engel. A engel disi ben e frei bun hei na loktu, èn a ben mus bari wan bun nyunsu san e tan fu têgo, gi den sma di e libi na grontapu: sma fu ala kondre nanga lo, èn fu ibri tongo nanga folku. 7A taki nanga tranga sten taki: “Un mus abi bigi lespeki gi Gado, èn un gi En grani, bika a yuru doro fu A koti krutu! Un mus anbegi a Wan di meki heimel nanga grontapu, a se nanga ala den presi pe watra e kmopo ondro gron.” 8Dan wan tra engel, a di fu tu, kon baka a fosi wan. A taki: “A fadon! A bigi foto Babilon fadon! Na a foto disi ben drungu ala den folku nanga a win fu den faya takru lostu fu en.”
Yer 51:8
Kon na krin 18:2
9Dan wan tra engel, a di fu dri, kon baka den tu fosi wan. A taki nanga tranga sten taki: “A sma di e anbegi a meti nanga a bigi popki fu en, èn di kisi a marki na tapu en anu noso en fes'ede, 10a sma dati sa abi fu dringi a win fu a faya atibron fu Gado. Na a win disi den kanti go ini a kan fu a atibron fu Gado, sondro fu broko en nanga watra. Sowan sma o pina ini faya nanga kroiti let' fesi den santa engel nanga a Lam.
11A smoko fu a faya san o pina den sa opo go na loktu fu têgo èn ala ten. Den sma disi di e anbegi a meti nanga a bigi popki san gersi a meti, èn di teki a marki fu a nen fu a meti, den no sa abi rostu, no dei, no neti.”
12Dat' meki den sma fu Gado, den di e du san Gado taki èn di e tan bribi ini Yesus, mus tan hori doro.
13Dan mi yere wan sten taki kmopo fu heimel taki: “Skrifi a sani disi: Bigin fu now, ala sma di dede nanga a bribi ini Masra, na blesi sma.”
Dan a Yeye taki: “Iya, den sa rostu fu ala den tranga wroko, bika now den e kisi san den mus kisi fu ala a wroko san den du.”
A yuru fu koti doro
14Baka dati mi luku, dan mi si wan weti wolku. Wan sma ben sidon tapu a wolku, a ben gersi wan mansma. A ben weri wan gowtu kroon tapu en ede, èn ini en anu a ben hori wan srapu babun-nefi.
15Dan wan tra engel kmopo ini a tempel e bari nanga tranga sten gi a wan di sidon tapu a wolku taki: “Go nanga yu babun-nefi go koti, bika a yuru fu koti doro. Koti, bika ala den sani di de fu koti na grontapu lepi kba.”
16Ne a wan di ben sidon na tapu a wolku go nanga en babun-nefi na grontapu. Dan a koti san de fu koti na grontapu. 17Dan ete wan engel kmopo ini a tempel san de na heimel. A engel dati ben abi wan srapu babun-nefi tu. 18Dan wan tra engel di ben mus sorgu fu a faya fu a altari, kmopo na sei a altari. A bari nanga tranga sten gi a engel di abi a srapu babun-nefi taki: “Go nanga yu babun-nefi go koti den bosu fu den droifibon na grontapu, bika den droifi lepi.” 19Ne a engel go nanga en babun-nefi na grontapu, a koti den droifi na grontapu, dan a fringi den go ini a bigi baki pe den e stampu droifi. A baki disi na a faya atibron fu Gado 20èn a de dorosei fu a foto. Drape den stampu den droifi, dan brudu lon leki wan liba kmopo na ini a baki. A liba disi ben langa dri hondro kilometer, èn a ben dipi wan nanga afu meter.
Sar 1:15
Kon na krin 19:15
Den seibi laste strafu
151Baka dati mi si wan tra bigi èn ferwondru marki na ini heimel. Mi si seibi engel di ben abi den seibi laste strafu, a strafu di ben o kowru a faya atibron fu Gado. 2Dan mi si wan sani leki wan se. A ben brenki leki grasi èn a ben moksi nanga faya. Tapu a grasi se disi den sma ben tnapu di ben wini a meti nanga a bigi popki san gersi en. Na a meti disi abi a nen san de wan nomru. Den sma ben tnapu nanga gitara san den ben kisi fu Gado. 3Den ben e singi a singi fu Moses, a knekti fu Gado, nanga a singi fu a Lam taki:
Masra Gado di abi Ala Makti,
den wroko san Yu e du bigi
èn den de fu ferwondru.
Yu di e rigeri leki kownu abra ala folku,
Yu e du sani tapu wan leti fasi
èn sondro fowtu.
4Masra,
suma no sa wani lespeki Yu?
Suma no sa wani gi Yu glori?
Bika na Yu wawan santa.
Ala folku sa kon boigi gi Yu fu anbegi Yu,
bika now ala sma si taki Yu e du sani nanga leti.
6Dan den seibi engel di ben abi den seibi strafu kmopo ini a tempel. Den ben weri krin linnen krosi san ben e brenki, èn den ben tai wan gowtu banti lontu den borsu. 7Dan wan fu den fo libilibi sani gi iniwan fu den seibi engel wan gowtu skarki san ben furu nanga a atibron fu Gado di e libi fu têgo èn ala ten. 8Ne a tempel kon furu nanga a smoko fu a glori nanga a makti fu Gado. No wan sma ben man go ini a tempel, solanga den seibi strafu fu den seibi engel no ben klari.
1Kow 8:10-11
2His 5:13-14
Yes 6:4
Den skarki nanga a atibron fu Gado
161Dan mi yere wan tranga sten kmopo ini a tempel di taigi den seibi engel taki: “Un go kanti den seibi skarki nanga a faya atibron fu Gado na tapu grontapu.” 2Dan a fosi engel go kanti san ben de ini en skarki na tapu grontapu. Ne wan lo takru kundukundu leki butsweri opo na den sma skin di ben abi a marki fu a meti èn di ben e anbegi a bigi popki fu en.
3Baka dati a di fu tu engel kanti san ben de ini en skarki go ini a se. Ne a se tron pori brudu, èn ala sani san ben e libi ini a se dede. 4Dan a di fu dri engel kanti san ben de ini en skarki go ini den liba nanga den presi pe watra e kmopo ondro gron. Ne ala den watra disi tron brudu.
Psa 78:44
5Dan mi yere a engel di ben abi makti abra den watra, taki: “Santa Gado, Yu di de èn di ben de, Yu e du sani tapu wan leti fasi fu di Yu koti a krutu sowan fasi. 6Bika den ben kiri den sma fu Yu nanga den profeiti meki a brudu fu den lon. Dan now Yu gi den brudu fu den dringi. A bun gi den!” 7Dan mi yere a altari taki: “Iya, Masra Gado di abi Ala Makti, den krutu san Yu e koti, den e koti nanga leti èn Yu no e meki fowtu.” 8Dan a di fu fo engel kanti san ben de ini en skarki go na tapu a son. Ne a son kisi makti fu bron libisma leki faya. 9Den sma ben e losi ini a son, fu di a ben kon moro faya. Dan den bigin afrontu Gado di abi a makti abra den strafu disi. Ma den no drai den libi fu gi En grani. 10Baka dati a di fu feifi engel kanti san ben de ini en skarki go tapu a kownusturu fu a fosi meti. Ne a heri kondre pe a ben e rigeri kon dungru. Den sma bigin kaw den tifi fu a skin-ati san den ben abi.
11Den afrontu a Gado fu heimel fu a skin-ati san den ben abi, nanga fu den takru kundukundu san ben opo na den skin. Ma den no drai den libi fu tapu nanga den wroko san den ben e du. 12Dan a di fu siksi engel kanti san ben de ini en skarki go ini a bigi Eufratliba. Ne a heri liba kon drei, èn so wan pasi ben kon meki gi den kownu san e kmopo kon fu a sei pe a son e opo.
13Dan mi si dri takruyeye di gersi todo: wan kmopo ini a mofo fu a bigi kaiman, wan trawan kmopo ini a mofo fu a fosi meti, èn ete wan trawan kmopo ini a mofo fu a falsi profeiti. 14Den dri takruyeye disi na yeye fu didibri. Den e meki den sma si marki, èn den e go na den tiriman fu heri grontapu fu tyari den kon na wan, fu go feti tapu a bigi dei fu Gado di abi Ala Makti.
15“Luku, Mi sa kon leki wan fufuruman, sondro fu un sabi. A sma di de na ai, èn di abi en krosi klar'klari fu weri, na wan blesi sma. Bika na so a no sa abi fu waka nanga sososkin fu sma si en syen.”
Luk 12:39-40
Kon na krin 3:3
16Den takruyeye disi tyari den tiriman fu grontapu kon makandra na a presi san den e kari ini Hebrewtongo: Harmagedon.
Sak 12:11
17Dan a di fu seibi engel kanti san ben de ini en skarki go ini a loktu. Ne wan tranga sten taki kmopo fu a tempel, pe a kownusturu de. A taki: “A kba!” 18Dan faya bigin koti èn mi yere sten. Dondru bari èn a gron seki bun hebi. Fu sensi di sma e libi na grontapu, noiti bifo a gron ben seki so hebi. Na so hebi a gron ben seki.
11:13,19
19Dan a bigi foto Babilon broko na dri pisi, èn den foto fu den folku broko fadon. Na so Gado memre Babilon. A meki a dringi fu a kan pe a win fu a faya atibron fu Gado ben de.
20No wan eilanti èn no wan bergi ben de fu si moro.
21Bigi tranga pis'pisi-ijs san ben wegi fotenti kilo ben fadon kmopo fu heimel kon tapu den sma. Dan den sma bigin afrontu Gado fu a strafu disi ede, bika a strafu ben hebi srefsrefi.
Kon na krin 11:19