Sranan Tongo Bible 2016 (STB16)
16

Den skarki nanga a atibron fu Gado

161Dan mi yere wan tranga sten kmopo ini a tempel di taigi den seibi engel taki: “Un go kanti den seibi skarki nanga a faya atibron fu Gado na tapu grontapu.” 2Dan a fosi engel go kanti san ben de ini en skarki na tapu grontapu. Ne wan lo takru kundukundu leki butsweri opo na den sma skin di ben abi a marki fu a meti èn di ben e anbegi a bigi popki fu en.

16:2
Eks 9:10
3Baka dati a di fu tu engel kanti san ben de ini en skarki go ini a se. Ne a se tron pori brudu, èn ala sani san ben e libi ini a se dede. 4Dan a di fu dri engel kanti san ben de ini en skarki go ini den liba nanga den presi pe watra e kmopo ondro gron. Ne ala den watra disi tron brudu.
16:4
Eks 7:17-21
Psa 78:44
5Dan mi yere a engel di ben abi makti abra den watra, taki: “Santa Gado, Yu di de èn di ben de, Yu e du sani tapu wan leti fasi fu di Yu koti a krutu sowan fasi. 6Bika den ben kiri den sma fu Yu nanga den profeiti meki a brudu fu den lon. Dan now Yu gi den brudu fu den dringi. A bun gi den!” 7Dan mi yere a altari taki: “Iya, Masra Gado di abi Ala Makti, den krutu san Yu e koti, den e koti nanga leti èn Yu no e meki fowtu.” 8Dan a di fu fo engel kanti san ben de ini en skarki go na tapu a son. Ne a son kisi makti fu bron libisma leki faya. 9Den sma ben e losi ini a son, fu di a ben kon moro faya. Dan den bigin afrontu Gado di abi a makti abra den strafu disi. Ma den no drai den libi fu gi En grani. 10Baka dati a di fu feifi engel kanti san ben de ini en skarki go tapu a kownusturu fu a fosi meti. Ne a heri kondre pe a ben e rigeri kon dungru. Den sma bigin kaw den tifi fu a skin-ati san den ben abi.
16:10
Eks 10:21
11Den afrontu a Gado fu heimel fu a skin-ati san den ben abi, nanga fu den takru kundukundu san ben opo na den skin. Ma den no drai den libi fu tapu nanga den wroko san den ben e du. 12Dan a di fu siksi engel kanti san ben de ini en skarki go ini a bigi Eufratliba. Ne a heri liba kon drei, èn so wan pasi ben kon meki gi den kownu san e kmopo kon fu a sei pe a son e opo.
16:12
Yes 11:15
13Dan mi si dri takruyeye di gersi todo: wan kmopo ini a mofo fu a bigi kaiman, wan trawan kmopo ini a mofo fu a fosi meti, èn ete wan trawan kmopo ini a mofo fu a falsi profeiti. 14Den dri takruyeye disi na yeye fu didibri. Den e meki den sma si marki, èn den e go na den tiriman fu heri grontapu fu tyari den kon na wan, fu go feti tapu a bigi dei fu Gado di abi Ala Makti.

15“Luku, Mi sa kon leki wan fufuruman, sondro fu un sabi. A sma di de na ai, èn di abi en krosi klar'klari fu weri, na wan blesi sma. Bika na so a no sa abi fu waka nanga sososkin fu sma si en syen.”

16:15
Mat 24:43-44
Luk 12:39-40
Kon na krin 3:3

16Den takruyeye disi tyari den tiriman fu grontapu kon makandra na a presi san den e kari ini Hebrewtongo: Harmagedon.

16:16
2Kow 23:29
Sak 12:11
17Dan a di fu seibi engel kanti san ben de ini en skarki go ini a loktu. Ne wan tranga sten taki kmopo fu a tempel, pe a kownusturu de. A taki: “A kba!” 18Dan faya bigin koti èn mi yere sten. Dondru bari èn a gron seki bun hebi. Fu sensi di sma e libi na grontapu, noiti bifo a gron ben seki so hebi. Na so hebi a gron ben seki.
16:18
Kon na krin 8:5
11:13,19
19Dan a bigi foto Babilon broko na dri pisi, èn den foto fu den folku broko fadon. Na so Gado memre Babilon. A meki a dringi fu a kan pe a win fu a faya atibron fu Gado ben de.
16:19
Yer 25:15
20No wan eilanti èn no wan bergi ben de fu si moro.
16:20
Kon na krin 6:14
21Bigi tranga pis'pisi-ijs san ben wegi fotenti kilo ben fadon kmopo fu heimel kon tapu den sma. Dan den sma bigin afrontu Gado fu a strafu disi ede, bika a strafu ben hebi srefsrefi.
16:21
Eks 9:23
Kon na krin 11:19