Sranan Tongo Bible 2016 (STB16)
3

A boskopu gi Sardes

31“Skrifi a engel fu a gemeente na Sardes taki: Disi na san a Wan e taki di abi den seibi Yeye fu Gado nanga den seibi stari: Mi sabi den sani san un e du. Mi sabi taki un e tyari a nen tak' un e libi, ma un dede. 2Un mus wiki èn kraka den sani san libi ete, ma di e suku fu dede, bika Mi kon si taki den sani san un e du, no bun nofo gi Mi Gado. 3Dat' meki un mus memre a leri san un ben kisi nanga san un ben yere. Un mus hori unsrefi na a leri dati èn drai un libi. Ma efu un no wiki, dan Mi o kon na unu leki wan fufuruman. Un no o sabi a yuru san Mi o kon na unu.

3:3
Mat 24:43-44
Luk 12:39-40
Kon na krin 16:15
4Ma wantu sma fu unu drape na Sardes hori den libi krin. Den sa waka nanga Mi na ini weti krosi, bika den warti fu dati.

5A sma di e wini sa kisi weti krosi fu weri, èn noiti Mi sa figi en nen puru na ini a buku fu libi. Mi o taki fesi Mi P'pa nanga den engel fu En tak' a sma dati na fu Mi.

3:5 a
Eks 32:32-33
Psa 69:29
Kon na krin 20:12
6Suma abi yesi, meki a yere san a Yeye e taigi den gemeente.”

A boskopu gi Filadelfia

7“Skrifi a engel fu a gemeente na Filadelfia taki:

Disi na san a Santa Wan e taki di de fu fertrow, a Wan di abi a sroto fu David. Te A opo wan sani, no wan sma no man sroto en, èn te A sroto wan sani, no wan sma no man opo en:

3:7
Yob 12:14
Yes 22:22
8Mi sabi den sani san un e du. Luku, Mi opo wan doro gi unu san no wan sma no man sroto. Un no abi furu krakti, ma un hori unsrefi na Mi wortu èn un no syen gi Mi nen. 9Luku, Mi sa seni wantu sma di e kari densrefi Dyusma, kon na unu. Ma na lei den e lei, den na sma fu Satan. Luku, Mi sa meki den kon saka na tapu den kindi na un futu. Dan nanga den eigi mofo den sa mus fu taki tak' Mi lobi unu.
3:9
Yes 43:4
49:23
60:14
10Fu di un tan hori doro leki fa Mi ben taigi un fu du, dat' meki Mi o kibri unu fu a tesi di o kon na heri grontapu, fu tesi den sma di e libi na grontapu. 11Mi e kon her'esi. Un hori unsrefi na a leri san un abi, fu no wan sma no teki a grani san un o kisi fu di un wini.

12A sma di e wini, Mi sa poti leki wan stonfutu na ini a Santa Oso fu Mi P'pa, èn noiti moro a sa kmopo drape. Mi sa skrifi a nen fu Mi Gado na en tapu, nanga a nen fu a foto fu Mi Gado, dati na a nyun Yerusalem san e saka kmopo fu Mi Gado na ini heimel. Mi o skrifi a nyun nen fu Mi na en tapu tu.

3:12 a
Kon na krin 21:2
13Suma abi yesi, meki a yere san a Yeye e taigi den gemeente.”

A boskopu gi Laodisea

14“Skrifi a engel fu a gemeente na Laodisea taki:

Disi na san a Wan e taki di de a Amen, a tru kotoigi di no e lei èn di yu kan fertrow, a bigin3:14 Un kan puru a pisi disi so tu: a Basi fu ala sani san Gado meki. fu ala sani san Gado meki:

3:14
Leri 8:22
15Mi sabi san un e du: Un no kowru, ma un no faya tu. Mi ben winsi taki un ben faya noso kowru. 16Ma fu di un brokokowru, Mi sa spiti un puru na ini Mi mofo. Bika un no faya, ma un no kowru tu. 17Un e taki tak' un gudu, taki un gudu sote taki un no e mankeri noti. Ma un no sabi taki a no e go bun nanga unu. Un de fu sari, un pôti, un breni, èn un de nanga sososkin. 18Dat' meki Mi e gi un a rai fu un kon bai gowtu na Mi, bun gowtu, fu un kan kon gudu. Un kon bai weti krosi na Mi fu weri, fu tapu a syen taki un de nanga sososkin. Un kon bai dresi na Mi fu poti gi un ai, fu un kan si krin. 19Mi e strafu ala den sma di Mi lobi, èn Mi e leri den fa den mus libi. Dat' meki un mus du muiti èn drai un libi.
3:19
Leri 3:12
Heb 12:6
20Luku, Mi tnapu e naki na tapu a doro. Efu wan sma yere èn a opo a doro, Mi sa kon inisei, dan Mi nanga en sa nyan makandra.

21Mi sa meki a sma di e wini, rigeri makandra nanga Mi, soleki fa Mi wini èn e rigeri makandra nanga Mi P'pa. 22Suma abi yesi, meki a yere san a Yeye e taigi den gemeente.”