Sranan Tongo Bible 2016 (STB16)
2

Gado e krutu sma nanga leti

21Brada, yu kan krutu den sma di e du den sani disi, ma awinsi suma na yu, yu no moro betre. Bika te yu e krutu wan trawan, yu e krutu yusrefi, bika yu e du den srefi sani.

2:1
Mat 7:1
Luk 6:37
2Wi sabi taki Gado abi leti te A e krutu den sma di e du den sani disi. 3Brada, yu denki taki Gado o krutu den sma di du den sani disi, ma dan A no o krutu yu di e du den srefi sani tu? 4Na span yu no e span tak' Gado bun so gi yu, tak' A abi langa pasensi èn tak' na wani A no wani strafu yu wantron? Na sabi yu no sabi tak' Gado bun gi yu fu di A wani tak' yu mus drai yu libi? 5Ma fu di un trangayesi èn un no wani drai un libi, un e meki taki a strafu fu unu o kon moro hebi tapu a dei di Gado o krutu èn strafu libisma soleki fa a fiti. 6Bika Gado o pai ala sma fu den sani san den du.
2:6
Psa 62:13
Leri 24:12
7A o gi a libi fu têgo na den sma di e tan hori doro fu du bun, fu di den wani meki Gado gi den grani, bigi nen nanga a libi pe dede no de. 8Ma Gado o puru En atibron tapu den sma di e prakseri densrefi wawan, di no wani arki den tru sani, èn di e du ogri. 9Ala libisma di e du ogri mus sabi taki pina nanga benawtu e wakti den. A de gi den Dyusma fosi, ma a de tu gi den sma di no de Dyu. 10Ma grani, bigi nen, nanga freide e wakti ala sma di e du bun. A de gi den Dyusma fosi, ma a de tu gi den sma di no de Dyu. 11Bika ala sma na a srefi gi Gado.
2:11
Deu 10:17

Fu hori a wèt nomo no e tyari yepi

12Den sma di no de ondro a wèt fu Moses o go lasi sondro a wèt te den sondu. Èn ala sma di de ondro a wèt, Gado o teki a wèt fu krutu den. 13Bika a no den sma di e arki a wèt e kon bun ini Gado ai, ma na den sma di e du san a wèt e taki. 14Den sma di no de Dyu no abi a wèt fu Moses. Ma efu den e du san a wèt e taki, aladi den no abi wèt, dan den de wan wèt gi densrefi. 15Nanga dati den e sori taki den sani san skrifi ini a wèt de na ini den ati. Den konsensi e sori taki na so a de, èn a e taigi den efu den e du bun noso ogri. 16Na so a o de tapu a dei di Gado o meki Kristus Yesus krutu ala kibrisani fu libisma. Disi e agri nanga a bun nyunsu san mi e preiki.

Den Dyusma nanga a wèt fu Moses

17Ma fa fu unu di e kari unsrefi Dyusma? Un e bribi taki Gado o ferlusu unu fu di un e hori a wèt, èn un e meki bigi taki un de fu Gado. 18Un sabi san Gado wani, èn un sabi san na a moro bun sani fu du fu di un kisi leri kmopo fu a wèt. 19Un e bribi taki un na sma di mus sori breniwan a pasi fu Gado, èn tak' un de leki wan faya gi den sma di de na dungru. 20Un e bribi taki ini a wèt un e feni sabi nanga sani san de tru. Dat' meki un e si unsrefi leki sma di mus leri trawan di no abi ferstan èn leki sma di mus skoro pikin. 21Ma fa a kan taki un e leri trawan, ma un no e leri unsrefi? Un e taigi sma taki den no mus fufuru, ma un srefi e fufuru. 22Un e taigi sma taki den no mus huru, ma un srefi e du en. Unu nanga kruktu gado no e koti, ma un e go fufuru sani ini den tempel fu den. 23Un e meki bigi tak' un abi a wèt, ma un e gi Gado syen fu di un no e hori a wèt. 24A skrifi taki: “Na unu e meki sma di no de Dyu e afrontu Gado.”

2:24
Yes 52:5
25Meki mi taigi unu wan sani. A besnei di un besnei abi warti soso efu un e hori a wèt. Ma efu un no e du san a wèt e taki, dan un leki Dyusma di besnei, de a srefi leki sma di no de Dyu, di no besnei. 26Ma efu wan sma di no besnei e libi leki fa a wèt e taki, dan Gado e si sowan sma leki wan sma di besnei. 27Dat' meki den sma di no besnei, ma di e du san a wèt e taki, o krutu unu. Bika awinsi un besnei èn un abi a wèt na tapu papira, toku un e sondu. 28A no te yu gebore leki wan Dyusma, noso fu di yu besnei, e meki taki yu na wan trutru Dyusma. 29A trutru besnei a no te den e koti yu skin wawan, ma na te yu ati kenki. Na dati e meki yu wan trutru Dyusma. A no a wèt e du dati, ma na a Yeye fu Gado. Dan a no libisma o gi yu grani, ma na Gado.
2:29
Deu 30:6