Sranan Tongo Bible 2016 (STB16)
1

11A moro moi lobisingi fu Salomo.1:1 Yu kan puru a pisi disi tu leki: A moro moi lobisingi gi Salomo, a moro moi lobisingi leki fa Salomo skrifi en, noso: A moro moi lobisingi di e taki fu Salomo.

A trowmisi e angri fu a trowmasra

2Bosi mi!

Mi wani firi fa en mofo e bosi mi.

Bika a lobi fu yu

e drungu mi moro win.

3A switi smeri fu yu skin,

yu nen di de so switi na tapu den tongo,

na dat' meki den yongu uma lobi yu.

4Hari mi kon.

Meki un gwe es'esi.

Mi kownu, tyari mi go ini en kamra.

Meki wi prisiri, meki wi breiti fu yu ede

Wi e prijse a lobi fu yu

a bun moro win.

Fu tru, dat' meki den uma mus fu lobi yu!

5Uma fu Yerusalem,

mi buba dungru, ma mi moi.

A blaka leki den tenti fu Kedar,

moi leki den garden fu Salomo.

6No luku taki mi buba blaka,

taki son bron mi.

Bika den brada fu mi den ati ben e bron na mi tapu.

Mi ben mus hori wakti na den droifidyari,

ma mi eigi dyari mi no ben man luku.

7Taigi mi, yu di mi lobi nanga mi heri ati

taigi mi, pe yu tyari den kaw fu yu go wei

pe yu e meki den rostu te bakadina.

No meki mi e waka nanga wan duku tapu mi fesi

psa den mati fu yu nanga den kaw fu den.

8Tye, yu, moro moi uma di de.

Efu yu no sabi pe mi de,

luku den futumarki fu den skapu.

Tyari yu skapu go wei

pe den tenti fu den skapuman de.

9Mi lobi,

yu moi leki wan fu den uma asi

di e hari a wagi fu Farao.

10Luku fa yu fesi moi nanga den yesilinga,

den krara na yu neki.

11Gowtu sani wi sa gi yu

nanga solfru krara na en.

12Solanga mi kownu didon tapu en bedi

mi e panya mi switismeri.

13Mi lobi,

wan pikin saka nanga switismeri yu de

na mindri mi borsu.

14Mi lobi,

wan bosu hennabromki yu de

ini den droifidyari fu Engedi.

15Mi lobi, luku fa yu moi,

yu moi fu tru,

yu ai gersi di fu wan doifi.

16Mi lobi, luku fa yu moi,

Iya, trutru moi,

ini a moi grun grasi na pe wi o didon.

17Den sedrebon na den postu fu un oso,

den sipresbon a ososkin.

2

21Mi na wan rowsu fu Saron,

wan bromki fu a dal.

2Wan rowsu na mindri den maka,

na so mi lobi de na mindri den yongu uma.

3Wan aprabon na mindri a busi

na so mi lobi de na mindri den yonkuman.

Mi angri fu sidon na ini en kowrupe

fu tesi den switi froktu fu en.

4A tyari mi go ini en win-oso

dan a opo en fraga hei gi mi

a fraga fu en lobi.

5A gi mi rosenkuku fu mi kisi krakti baka,

meki mi nyan apra fu kisi misrefi baka,

bika mi e flaw gwe fu yu lobi.

6En kruktu anu de ondro mi ede,

nanga en let'anu a brasa mi.

7Uma fu Yerusalem, sweri en gi mi

na den dia, den uma dia ini a wei,

taki yu no sa wiki a lobi, yu no sa preiprei nanga lobi,

te leki ensrefi wani.

8Arki! Mi e yere mi lobi!

Luku, a e kon,

a e dyompo kon tapu den hei bergi

a e dansi e kon abra den pikinwan.

9Mi lobi gersi wan dia,

wan yongu dia.

Luku, a tnapu na a skotu,

a e luku na a fensre,

poti en ai na den latilati fu luku.

10A e taigi mi taki:

Opo, mi lobi,

mi moi uma, opo kon.

11Luku, a kowruten psa kba

alen wai, a psa gwe.

12Den bromki e opo ini a wei,

a ten fu singi doro,

ala presi den doifi de fu yere.

13Yongu de fu si kba na a figabon,

droifibon e panya den smeri.

Opo, kon, mi lobi,

mi moi uma, kon!

14Leki wan doifi ini wan bergi-olo

di kibri ensrefi na a bergiskin.

Meki mi si yu,

meki mi yere yu sten.

Bika yu sten switi,

yu moi fu si.

15Grabu den krab'dagu

den pikin krab'dagu

di e pori den droifidyari,

den droifidyari di furu now nanga bromki.

16Mi lobi na fu mi,

mi na fu mi lobi,

di e luku en skapu

na mindri den bromki.

17Drai go baka

fosi a kowru winti bigin wai te mofoneti

fosi dungru bigin e fadon.

Drai go leki wan dia, mi lobi

leki wan yongu dia

abra den boktuboktu bergi.

3

31Tapu mi bedi,

te neti,

mi e suku mi lobi.

Mi suku en, mi no feni en.

2Mi o opo, wakawaka ini na foto,

tapu strati, tapu den pren

fu luku efu mi o si en,

mi suku, mi no feni en.

a wan di mi lobi trutru.

3Den waktiman, di e waka luku a foto, si mi

taigi mi, yu si mi lobi.

4No langa di mi psa den,

mi si en,

mi grabu en,

a wan di mi lobi trutru.

mi no e meki yu go

te leki mi tyari yu go

na ini a oso fu mi mama

na ini a kamra fu a wan di meki mi.

5Uma fu Yerusalem, sweri en gi mi

na den dia, den uma dia ini a wei,

taki yu no sa wiki a lobi, yu no sa preiprei nanga lobi,

te leki ensrefi wani.

6San e kon drape ini a sabana

leki wan bigi smoko,

nanga wan smeri fu mirre nanga wierook,

a smeri fu ala sortu diri switismeri.

7Luku, na Salomo den e tyari tapu en sturu

siksitenti dyadya fetiman lontu en,

dyadya fetiman fu Israel.

8Man di sabi feti nanga deigri,

di sabi san fu du ini wan feti.

na den seibere den e tyari den deigri,

gi a ogri di e luru te neti.

9Kownu Salomo meki wan sturu gi ensrefi,

wan sturu fu den tyari en lontu,

di meki nanga udu fu a Libanon.

10Den smara latilati fu solfru,

a bakapisi fu gowtu,

a sidonpisi fu purper,

fu inisei a moimoi nanga ala sortu

lobi prentyi

di den uma fu Yerusalem meki.

11Uma fu Sion, kon na doro!

Luku kownu Salomo nanga en kroon,

a kroon di en mama weri gi en,

tapu en trowdei,

a dei pe en ati ben prisiri trutru.