Sranan Tongo Bible 2016 (STB16)
6

61Pe a lobiwan fu yu go

yu moro moi uma di de?

Sortu sei a lobiwan fu yu go?

wi wani yepi yu suku en.

2Mi lobi go na en dyari

a go na den bedi fu en

den bedi fu balsem.

drape a go fu prisiri ini en dyari,

fu go broko bromki.

3Mi na fu mi lobi

mi lobi na fu mi,

a e luku den skapu fu en na mindri den bromki.

4Mi lobi, yu moi fu tru

yu moi leki Tirsa,

yu moi leki Yerusalem,

ma yu de fu frede leki den legre

den e kon nanga opo fraga

5Puru yu ai na mi tapu

bika den e bruya mi

A blaka wiwiri fu yu e dansi

leki krabita di e lon saka a Gileadbergi.

6Yu tifi weti,

weti leki wan grupu uma skapu

di e kmoto ini a watra,

Tu na tu den e kmoto ini a watra,

no wan no e mankeri.

7Mi e si yu seifesi baka a duku di tapu yu fesi,

a redi, redi leki wan granaki-apra.

8Siksitenti kownu-uma

aititenti tra uma fu kownu

someni yongu uma taki den no de fu teri.

9Ma no wan no de leki yu,

mi doifi, mi moro moi uma.

Gi en mama trawan no de.

A popki fu a ai fu a wan di meki en.

Te tra uma si en, den e gi en grani

taki a de wan koloku uma.

Den kownu-uma nanga den tra uma fu kownu

e gi en grani.

10Suma e opo drape so leki a mamanten son?

krin leki a furu mun,

brenki leki a faya son,

ma di de fu frede leki wan legre?

11Mi saka go na a dyari nanga notobon

fu luku den bromki fu den bon ini a dal

fu luku efu den droifibon e gi nyun taki kba

fu luku efu den granaki-aprabon gi bromki kba.

12A gersi mi no ben de fu misrefi moro

Yu ben tyari mi gwe tapu wan wagi

fu mi folku.6:12 A Hebrewtekst fu a pisi disi no krin. Un kan puru a pisi disi so tu: Yu ben tyari mi gwe tapu den wagi fu kownu, noso: den wagi fu Aminadab ben meki taki mi no ben sabi misrefi moro.

13Drai kon na mi, uma fu Sulem, drai kon.

Drai kon, drai kon, meki wi luku yu.

Fu sanede un wani luku a uma disi fu Sulem?

neleki un e luku reidansi fu Makanaim?6:13 Son vertaling abi a vers disi leki 7:1.

7

71Luku fa yu futu moi ini yu susu,

kownupikin.

Te yu e waka yu baka e lolo

leki den krara fu wan keti,

a wroko fu wan man di sabi en wroko.

2Yu kumba na wan moi komki

di furu nanga switi win.

Yu bere na wan ipi karu

di lontu nanga moi bromki.

3Tu yongu dia,

na dati den borsu fu yu de

wan twelengi fu wan uma dia.

4Yu neki moi leki wan toren fu ivoor,

yu ai gersi den bron fu Hesbon,

na den bigi doro fu Bat-Rabim.

Yu noso na a toren fu Libanon,

di e luku go na tapu Damaskus.

5Leki a Karmelbergi,

na so yu ede de na tapu yu neki.

A dungru redi wiwiri fu yu di e brenki,

fanga yu kownu hori, tai en hori na ini.

6Yu moi trutru, mi lobi.

A moro switi sani di wan sma bo wani.

7Yu moi leki wan palmbon,

yu borsu na den froktu di anga na en.

8Ne mi taki: mi wani kren a bon disi

piki den froktu fu en.

Iya, meki den borsu fu yu de leki bosu nanga droifi,

yu bro abi a smeri fu apra,

9yu tongo de leki a moro switi win7:9 A Hebrewtekst fu a pisi disi no krin. Un kan puru a pisi disi so tu: yu mofo de leki a moro switi win noso: a taki fu yu de leki a moro switi win.

pe mi e wasi den bosi fu mi.7:9 A Hebrewtekst fu a pisi disi no krin.

pe mi e sungu mi mofobuba nanga mi tifi.7:9 A Hebrewtekst fu a pisi disi no krin.

10Mi na fu mi lobi,

a e angri fu mi.

11Kon, mi lobi,

meki wi go na ini a wei,

meki wi psa a neti na mindri den hennabromki.

12Meki wi go frukufruku na den droifidyari

fu luku efu den droifibon e gi nyun taki kba,

fu luku efu den gi bromki kba,

fu si efu den granaki-apra bon gi nyanyan kba.

Drape mi sa gi yu mi lobi.

13Den lobi-apra e smeri kba

den moro switi froktu anga na un doro

froktu di piki nownowde

froktu di e drei gwe kba.

gi yu, mi lobi, gi yu den ben kibri.

8

81Mi winsi taki yu ben de mi pikin brada,

di mi mama ben gi bobi.

Te mi ben miti yu,

mi ben kan bosi yu,

sondro fu wan sma taki wan sani.

2Mi bo hori yu,

tyari yu,

na ini a oso fu mi mama

na ini a kamra fu a wan di meki mi.

Switi win mi bo gi yu fu dringi

win fu den granaki-apra fu mi.

3En kruktu anu de ondro mi ede,

nanga en let'anu a brasa mi.

4Uma fu Yerusalem, sweri en gi mi

taki yu no sa wiki a lobi, yu no sa preiprei nanga en,

te leki ensrefi wani.

5Suma e kon drape ini a sabana

anga na a anu fu a wan di a lobi?

Ondro a aprabon mi wiki yu,

drape yu mama hori bere fu yu

drape a wani di kisi yu ben hori bere fu yu.

6Poti mi leki wan stampu tapu yu ati

leki wan stampu na yu anu.

Bika lobi tranga leki dede

a angri fu en yu no man tapu.

Lobi na wan tranga faya

wan faya di e bron ala sani.8:6 Un kan puru a pisi disi so tu: wan faya di kmoto fu MASRA srefi.

7Furu watra srefi no man kiri a faya fu lobi

liba no man spuru en gwe.

Awinsi den ben wan gi ala tra sani gi lobi,

mi bo drai mi fesi waka gwe.

8Un abi wan pikin sisa

borsu srefi a no abi ete.

San un o du

te a ten doro fu a trow?

9Efu a ben de wan skotu

un bo moi a lantyi fu en tapusei nanga solfru.

Efu a ben de wan doro

un bo tapu en nanga planga fu sedre-udu.

10Mi srefi ben de wan skotu

den borsu fu mi ben de toren.

Ma ini en ai mi na wan foto

wan foto pe freide de.

11Salomo ben abi wan droifidyari

wan droifidyari na Baal-Hamon.

A yuru gi sma fu luku en.

den gi en dusun solfru moni

gi a nyanyan fu a gron.

12Ma mi droifidyari, a di fu mi e tan fu mi

Salomo, yu kan hori den dusun solfru moni,

Den sma di ben e luku a dyari kan hori den tu hondro solfru moni.

13Yu di e libi ini a dyari

den mati fu mi wani yere na yu sten

meki mi yere en.

14Mi lobi, go esi-esi

lon leki wan dia,

leki wan pikin dia

tapu den bergi nanga balsemwiwiri.