Sranan Tongo Bible 2016 (STB16)
1

11Disi na a boskopu di MASRA gi Sefanya. Sefanya ben de a manpikin fu Kusi. Kusi ben de a manpikin fu Gedalya. Gedalya ben de a manpikin fu Amarya. Amarya ben de a manpikin fu Hiskia. Dati ben de ini a ten di Yosia, a manpikin fu Amon, ben de na makti leki kownu na ini Yuda.

A dei fu MASRA

2MASRA taki: Mi sa figi ala sani kmoto na grontapu. 3Libisma nanga meti Mi sa figi puru. Mi sa figi den fowru puru di e frei na loktu, den fisi fu a se nanga den sani di den sma e du di no e dini Gado. Mi sa figi libisma puru na grontapu, MASRA taki. 4Mi sa strafu Yuda, nanga ala den sma fu Yerusalem. Mi sa figi den sma puru di e dini Baal ete, den nen fu den di e dini den kruktu gado nanga den priester. 5Mi o figi den wan gwe tu di e kindi tapu den daki fu anbegi den sani di de fu si na heimel, nanga den wan di e kindi èn sweri fu dini MASRA, ma den e dini Milkom. 6A srefi sani Mi o du nanga den wan di drai den baka gi MASRA, èn di no e suku MASRA noso aksi fu En.

7Tan tiri na fesi MASRA fu Masra,

bika a dei fu MASRA de krosbei.

MASRA o meki wan ofrandi klari.

A poti ala sma aparti di A kari.

8Tapu a dei fu a ofrandi,

Mi, MASRA, sa strafu den fesiman,

nanga den manpikin fu den kownu,

nanga ala sma di teki sani abra

fu den doroseikondre.

9A dei dati Mi o strafu den sma tu

di e dyompo abra stupu,

èn di e furu a oso fu den basi

nanga sani di den puru na sma anu nanga tranga

noso nanga triki.

10A dei dati wan bigi babari sa de fu yere na a Fisipoort,

krei sa de fu yere ini a nyun foto,

a fasi fa oso e fadon broko sa de fu yere tapu den bergi.

11Un krei, un di e libi ini a lagi pisi fu a foto,

bika ala den sma di e bai nanga seri sani o dede,

ala den sma di e wegi moni o kiri puru na pasi.

12A dei dati Mi o teki wan lampu

fu luku Yerusalem finifini.

Mi o strafu den man di kon fatu fu di den abi en so bun,

dan den e prakseri na densrefi taki:

MASRA no e du no wan sma bun,

A no e du no wan sma ogri tu.

13Sma sa fufuru den gudu fu den,

èn broko den oso fu den.

Den sa bow oso,

ma densrefi no o tan na ini.

Den o prani heri dyari nanga droifibon,

ma densrefi no o dringi a win.

14A bigi dei fu MASRA de krosbei,

a de krosbei èn a e kon es'esi.

Yere! Tapu a dei fu MASRA,

den dyadya fetiman srefi o bari krei.

15A dei dati o de wan dei fu atibron,

wan dei fu bigi benawtu nanga frede,

wan dei fu broko èn fu pori sani,

wan dungru èn blaka dei

wan dei fu deki nanga dungru wolku.

16A sa de wan dei nanga babari fu den tutu,

wan dei nanga babari fu srudati di e hari go feti,

nanga den tranga foto nanga hei toren.

17Mi o meki den sma frede

taki den o waka lontu leki breniman.

Bika den du san no bun ini MASRA ai.

Den brudu o fadon na gron

leki na santi sma e trowe.

Den inibere o didon leki morsu na gron.

18A gowtu nanga a solfru fu den

no o man yepi den tapu a dei fu a atibron fu MASRA.

A fasi fa En ati o bron

o bron heri grontapu.

Bika A o masi den pis'pisi,

iya, tapu wan tumsi takru fasi

A o tyari wan kba kon na ala sma na grontapu.

2

21Unu na wan folku sondro syen. Un kon na wan, un kon makandra, 2fosi Mi du san Mi besroiti fu du, fosi a atibron fu MASRA kon na un tapu, fosi a dei fu a atibron fu MASRA kon na un tapu. Bika wan dei e psa es'esi, leki fa aleisibuba e wai gwe. 3Un suku MASRA, unu ini a kondre di abi sakafasi, unu di e hori un na den sani fu En na san un mus tan hori unsrefi. Un suku fu du san bun ini En ai, un saka unsrefi gi En. Dan kande noti no sa miti unu tapu a dei fu a atibron fu MASRA.

Warskow gi den tra folku

4Bika Gasa sa tron wan leigi foto, Askelon wan broko pranasi, bigibigi dei den o yagi den sma fu Asdod kmoto fu a foto èn Ekron den o rutu puru. 5Un mus luku bun, un di e libi na sekanti, unu Keretitisma. Na unu MASRA e taki, Kanaan, kondre fu den Filistijnsma. Mi sa kiri unu, taki no wan sma no sa de ini a kondre moro. 6A sekanti sa tron wan wei, pe skapuman o tyari den skapu go èn pe skapupen nanga krabitapen sa de. 7Den sma fu Yuda di tan abra sa teki a sekanti abra. Drape den o wei den meti fu den. Te neti den sa rostu ini den oso fu Askelon. Bika MASRA, a Gado fu den, sa sorgu gi den. A sa tyari wan kenki kon ini a fasi fa den de.

8Mi yere fa Moab e teki un meki spotu, nanga fa Amon e koti odo gi unu. Mi yere fa den teki Mi folku meki spotu, nanga fa den taki san den o du nanga a kondre fu unu. 9Fu dat'ede, MASRA fu ala sani, a Gado fu Israel taki, fu tru, so leki fa a tru taki Mi e libi, Moab o kon tan leki Sodom, Amon o kon tan leki Gomora, wan wei nanga makamakagrasi, wan sowtupeti, wan sabana fu têgo. Den sma fu Mi folku di tan abra sa teki ala sani fu den tyari gwe. Den sma fu Mi pipel di tan abra sa teki a kondre abra. 10Na disi o psa nanga den fu a bigifasi di den ben abi. Bika den ben teki mi folku meki spotu, èn den ben taki tak' den o du sani nanga a folku fu MASRA fu ala sani. 11MASRA o meki den kisi lespeki gi En. A o meki ala den gado fu grontapu krempi gwe. Na ala den kondre di didon na sekanti den o boigi gi En ini den eigi kondre.

12Sma fu Etiopia, unsrefi Mi o meki dede na ini feti.

13A sa strafu den kondre na Noordsei tu.

A sa broko Asur pis'pisi.

A sa meki Nineve tron wan broko pranasi,

drei leki wan sabana.

14Ipi ipi kaw nanga skapu

sa didon drape,

nanga ala sortu meti di e waka ini grupu.

owrukuku nanga tingifowru

sa meki den nesi tapu den postu-ede.

A krei fu den de fu yere na den fensre.

Ala sani didon brokobroko na a mofodoro.

A sedre-udu rutu puru.

15Disi na san tan abra fu a foto

pe sma ben e meki prisiri so.

Pe den ben e prakseri den èn den wawan.

San psa meki a tron so wan sabana,

wan sribipresi gi krasi meti?

Ala sma di e waka psa sa skreki te den si san miti en

èn drai den fesi.