Jan 11

₁I té ganyen roun wonm yé té ka aplé Lazar, i tonbé malad. I té ka rété Bétani ké so I dé sò Mari ké Mart.

₂Mari, a té mandanm-an ki té vidé losyon ansou pyé Jézi é éswiyé li ké so chivé. A té so frè Lazar ki té malad.

₃Dé sò-ya voyé roun moun di Jézi: “Mèt, to bon moun malad.”

₄Lò Jézi tandé sa, li di: “Sa maladi-a péké tchwé li, mé sa rivé pou moun-yan wè kouman Bondjé gran, é pou montré kouman Pitit Bondjé gran.”

₅Jézi té kontan Mart, so sò ké Lazar.

₆Atò, lò i aprann Lazar té malad, i rété koté la dé jou ankò,

₇épi li di so disip-ya: “Annou viré péyi Jidé!”

₈Disip-ya réponn li: “Mèt, i pa ganyen byen lontan jwif-ya té ka chaché tchwé to annan péyi Jidé, é to lé viré laba?”

₉Jézi réponn yé: “I ganyen douz lèr annan lajournen-an, pa vrè? Si roun moun ka maché lajournen, i pa ka tribiché, piski li ka wè limyèr-a ka kléré moun latè.

₁₀Mé si roun moun ka maché lannwit, i ka konyen so pyé, piski li pa ganyen pyès limyèr.

₁₁Lò Jézi fin” di sa, li di yé ankò: “Nou zanmi Lazar ka dronmi, mé mo ké alé lévé l.”

₁₂Disip-ya di li: “Mèt, si i ka dronmi sa bon, i ké géri.”

₁₃Jézi té lé di yé Lazar té mouri, mé yé té konprann a dronmi i té ka dronmi.

₁₄Atò, Jézi di yé kou dilo klè ansou roch: “Lazar mouri,

₁₅é mo kontan toubonnman, pou zòt, ki mo pa té laba, pou zòt pouvé krè an mo. Anprézan, annou alé koté li.”

₁₆Toma (roun disip yé ka aplé osi Jimo-a), di ròt-ya: “Annou alé, nou osi, pou nou mouri ké li!”

₁₇Lò Jézi rivé laba, li anprann Lazar té antéré dipi kat jou déja.

₁₈Vilaj Bétani té tou proch trwa kilomèt di lavil Jérizalenm,

₁₉é bokou jwif té vini konsolé Mart ké Mari di lanmò yé frè.

₂₀Lò Mart tandé Jézi té ka rivé, li alé kontré ké l, mé Mari rété asi annan so kaz.

₂₁Mart di Jézi: “Mèt, si to té la, mo frè pa té ké mouri.

₂₂Mé mo savé ki jouk atò ankò Bondjé ké bay to tousa to doumandé l.”

₂₃Jézi di li: “To frè ké résisité.”

₂₄Mart réponn: “Mo savé li ké résisité lò moun mouri ké résisité, dèrnyé jou-a.”

₂₅Jézi di li: “A mo ka résisité moun, é a mo ka bay moun lavi. Sala ka krè an mo ké viv, menm si li déja mouri;

₂₆sala ka viv é ka krè an mo péké janmen mouri. Es to ka krè sa?”

₂₇Mart di: “Wi, Mèt, mo ka krè to sa Mési-a, Pitit Bondjé, ki té divèt vini ansou latè-a.”

₂₈Lò Mart fin” di sa, li alé chaché so sò Mari é li di l an so zòrè: “Mèt-a rivé é li ka aplé to.”

₂₉Lò Mari tandé sa, li lévé é li kouri alé jwenn Jézi.

₃₀Jézi patékò rivé annan vilaj-a, mé li té toujou koté Mart té kontré ké li-a.

₃₁Jwif-ya ki té annan kaz Mari pou konsolé l, wè l lévé pati vitman é yé swiv li. Yé té krè li té ka alé pléré ansou tonm so frè.

₃₂Mari rivé koté Jézi té fika-a, é kant i wè l, i tonbé a so pyé é i di li: “Mèt, si to té la, mo frè pa té ké mò.”

₃₃Lò Jézi wè Mari ké jwif-ya ki té vini ké l té ka pléré grodlo sa fann so tchò, é i té ganyen bokou chagren.

₃₄Li doumandé yé: “Koté zòt mété li? Yé réponn li: “Mèt, vini wè.”

₃₅Jézi pléré.

₃₆Jwif-ya di: “Gadé kouman i té kontan l!”

₃₇Mé dézoutrwa annan yé té ka di: “I fè wonm avèg-a wè klè, ès li pa té pouvé osi anpéché Lazar mouri?”

₃₈Ankò roun fwè, tchò Jézi té ka fè li mal. Li alé koté tonm-an té fika; a té roun trou yé té fouyé annan montann-an ki té bouché ké roun gro roch.

₃₉Jézi di yé: “Tiré ròch-a.” Mart, sò wonm-an ki té mouri-a, di: “Mèt, i divèt déja ka santi mové, piski i ganyen kat jou li la.”

₄₀Jézi di li: “Ès mo pa déja di to, si to ka krè, to ké wè pwisans Bondjé?”

₄₁Yé tiré ròch-a. Jézi lévé so wéy laro syèl-a, é li di: “Papa, grémési piski to réponn mo.

₄₂Pou mo menm, mo savé to toujou ka réponn mo, mé mo ka di sa pou bann moun-yan ki la-a, pou yé pouvé krè a to ki voyé mo.”

₄₃Lò li fin” di sa, i rélé fò: “Lazar, soti la!”

₄₄Lazar soti di trou-a. So pyé ké so lanmen té toujou vlopé ké roun bann twèl, é so vizaj té vlopé ké roun lenj. Jézi di yé: “Dévlopé l épi lésé l alé!”

₄₅Lò yé wè sa Jézi té fè-a, Boukou jwif annan sa ki té vini koté Mari-a krè an li.

₄₆Mé dézoutrwa annan yé alé trouvé farizyen-yan é yé rakonté sa Jézi té fè

₄₇Alò, dòkò jwif-ya ké farizyen-yan fè roun gran rényon, é yé di: “Ki sa nou ké fè? Gadé tousa sign Bondjé sa wonm-an ka fè!

₄₈Si nou lésé l kontinyé fè sa, tout moun ké krè an li. Epi chèf romen-yan ké vini krazé Kaz Bondjé-a é yé ké détrwi nou pèp.”

₄₉Roun di yé, yé té ka rélé Kayif, ki té roun Gran Prèt sa lannen-a, di yé: “Zòt pa ka kanprann anyen tou!

₅₀Zòt pa wè i miyò si roun sèl mouri pou tout moun é ki tout pèp-a sové.”

₅₁Atò, li pa té ka di sa di li menm, mé piski li té Gran Prèt sa lannen-a, Bondjé fè li di davans ki Jézi té ké mò pou pèp jwif-a.

₅₂A pa sèlman pou pèp jwif-a ki li té divèt mouri, a té osi pou rasanblé tout timoun Bondjé ansou latè é fè yé divini roun sèl pèp.

₅₃Dipi sa jou-a, dòkò jwif-ya désidé tchwé Jézi.

₅₄A pousa Jézi pa té ka alé vini toupatou ankò ké jwif-ya; li alé bòdi dézèr-a, roun koté yé té ka rélé Efrayim. Li rété la ké so disip.

₅₅Tan-an lafèt Pak jwif-ya té ka proché, é bokou moun péyi-a té ka monté Jérizalenm anvan lafèt-a, pou pirifyé yé kò sélon yé rélijyon.

₅₆Yé té ka gadé wè si Jézi té annan lakou Kaz Bondjé-a, é yé té ka di ant yé: “Ki sa zòt ka pansé? Es zòt krè li ké vini annan lafèt-a?

₅₇Dòkò jwif-ya ké farizyen-yan té déja di, si roun moun té savé koté Jézi té fika, li té divèt avèrti yé pou yé té tchenbé l.