Jan 19

₁Alò Pilat di soda-ya mennen Jézi alé é bay li roun volé.

₂Soda-ya fè roun kouròn ké lyann pikan é yé pozé l ansou so tèt, yé abiyé l osi ké roun manto rouj.

₃Yé té ka proché di l é yé té ka di: “Bonjou, rwè jwif-ya!” Epi yé té ka bay li kalòt.”

₄Pilat viré soti dèrò ankò épi i di jwif-ya: “Men, mo ka mennen l dèrò pou zòt, pou zòt wè ki mo pa ka trouvé anyen sa wonm-an fè pou mo kondannen l.”

₅A konran Jézi soti dèrò, i té gen kouròn pikan-an ansou so tèt é manto rouj-a ansou li. Pilat di yé: “Mé wonm-an!”

₆Lò dòkò prèt jwif-ya ké gard-ya wè li, yé koumansé rélé fò: “Krisifyé l, krisifyé l.” Pilat di yé: “Pran li é krisifyé li zòt menm, pou mo menm, mo pa ka trouvé anyen pou mo kondannen l.”

₇Jwif-ya réponn li: “Nou gen roun lalwa, é sélon sa lalwa-a li divèt mouri, piski li di li sa Pitit Bondjé.”

₈Lò Pilat tandé sa palò-a, li té plis pè ankò.

₉I viré rantré annan gran kaz gouvèrnèr-a, é li doumandé Jézi: “Koté to soti?” Mé Jézi pa réponn li.

₁₀Pilat di li: “Kouman a pou mo to pa lé palé? Ès to pa savé mo gen pouvwè laché to kou osi mo gen pouvwè krisifyé to?”

₁₁Jézi réponn li: “To pa gen pyès pouvwè ansou mo, si a pa Bondjé ki bay to li. A pousa, moun-an ki mété mo anba to lanmen-an ka fè roun pli gran péché ki to.

₁₂Lò Pilat tandé sa, li chaché laché Jézi. Mé jwif-ya roukoumansé rélé pli fò ankò: “Si to laché sa wonm-an, to pa zanmi Sézar. Nenpòt ki moun ka fè so kò rwè sa zenmi Sézar!”

₁₃Lò Pilat tandé sa, i mennen Jézi dèrò é li asiz ansou chèz jij-a koté yé ka aplé “Lakou pavé roch” (an ébré “Gabata”).

₁₄A té lavèy lafèt Pak-a, bòdi midi. Pilat di jwif-ya: “Men zòt rwè!”

₁₅Mé yé rélé: “Tchwé l! Tchwé l! Krisifyé l!” Pilat di yé: “Zòt lé mo krisifyé zòt rwè?” Dòkò prèt-ya réponn: “A Sézar rounso ki sa nou rwè.”

₁₆Alò Pilat bay yé Jézi pou yé krisifyé l. Yé trapé li é mennen l alé.

₁₇Jézi poté limenm so lakrwa, li soti di lavil-a é li rivé roun koté yé ka aplé “zo tèt” an ébré “Golgota.”

₁₈A la yé kloué Jézi ansou roun lakrwa. An menm tan yé krisifyé dé ròt moun, roun chak bò, Jézi té an mitan.

₁₉Pilat fè yé kroché roun pankart laro lakrwa-a. I té ékri ansou l: “Jézi wonm Nazarèt-a, Rwè Jwif-ya.”

₂₀Bokou jwif li pankart-a, piski koté yé té krisifyé Jézi-a té proch lavil-a. Pankart-a té ékri an ébré, an laten ké an grèk.

₂₁Dòkò prèt jwif-ya di Pilat: “Pa ékri ‘Rwa Jwif-ya.’ ” Mé ékri: “Sa wonm-an di: “Mo sa Rwa Jwif-ya.”

₂₂Pilat réponn: “Sa mo ékri, mo byen ékri l.”

₂₃Lò soda-ya fin” krisifyé Jézi, yé pran so lenj é yé fè kat moso, roun moso pou chak. Yé pran osi so tinik fèt ké roun sèl bi moso létof dipi laro jik anba.

₂₄Soda-ya di roun a lòt: “A nou pa déchiré tinik-a, mé annou jité grenndé pou nou wè kilès ki ké gannyen li.” A konsa sa ki té ékri annan Liv Bondjé-a fèt vrè, i ékri: “Yé partajé mo lenj, yé jité grenndé pou mo tinik.”

₂₅Obò lakrwa Jézi, li té ganyen so manman ké sò so manman, Mari, fanm Klopas ké Mari di Magdala.

₂₆Jézi wè so manman é òbò li disip li té kontan-an. Jézi di so manman: “Man, men to pitit.”

₂₇Epi li di disip-a: “Men to manman.” Dépi sa, disip-a pran manman-an koté li.

₂₈Aprè sa, Kou Jézi té savé tout bagaj té fini é pou sa ki té ékri annan Liv Bondjé-a fèt vrè, li di: “Mo swèf.”

₂₉I té ganyen la roun karaf plen ké vinèg. Soda-ya tranpé roun zéponj annan vinèg-a, yé maré l annan roun bout bwa izop, épi yé proché l bòdi so bouch.

₃₀Lò Jézi pran gou vinèg-a, li di: “Tou bagaj fèt!” Li bésé so tèt, é a konsa li mouri.

₃₁Atò, li té vandrédi lavèy jou saba-a, chèf jwif-ya pa té lé kò-ya rété ansou lakrwa-a, (piski sa saba-a té roun gran jou pou yé), yé alé doumandé Pilat fè soda-ya kasé janm krisifyé-ya pou yé mouri pli vit, é fè yé désann kò-ya.

₃₂Soda-ya vin kasé janm promyè wonm-an krisifyé ké Jézi épi janm dézyèm-an.

₃₃Lò yé rivé bò Jézi, yé wè li té déja mouri, a pousa yé pa kasé so janm.

₃₄Mé roun soda krévé bò kòt Jézi ké roun piké, lanmenm disan ké dilo vidé soti.

₃₅Moun ki ka bay sa témwnyaj-a wè ké so wyé sa fèt, é so témwnyaj a lavérité; li savé li ka di lavérité, Li ka di sa pou zòt krè, zòt osi.

₃₆Tou sa rivé pou sa Liv Bondjé-a té di, fèt vrè, li ékri: “Yé péké kasé pa roun di so zo.”

₃₇Rounnòt koté li ékri: “Yé ké gadé sala yé krévé-a.”

₃₈Aprè sa, Jozèf moun Arimaté, ki té sa disip Jézi san dòkò jwif-ya té savé, piski li té pè yé, doumandé Pilat kò Jézi. Pilat bay li pèrmisyon pran kò-a.

₃₉Nikodenm vini li osi. A li ki té alé wè Jézi gro lannwit. Li mennen trant kilo zèrb mirr ké lalwès.

₄₀Yé pran kò Jézi é yé roulé bandé l annan roun létof lenj, ké losyon, kou jwif-ya té ganyen labitud fè pou yé lantèrman.

₄₁Atò, li té ganyen roun jarden proch koté yé té krisifyé Jézi-a, é annan sa jarden-an li té gen roun tonm fouyé annan montann-an ki pa té janmen sèrvi pou roun lantèrman.

₄₂Kou a té lavèy lafèt saba jwif-ya é ki tonm-an té proch, a la yé mété déposé kò Jézi.