Masmur 135

₁Haléluya!

Pada ngluhurna asmané GUSTI,

pada luhurna, hé para abdiné GUSTI.

₂Hé para wong sing pada teka ngladèni ing griyané GUSTI,

ing platarané griyané Gusti Allah kita!

₃Pada memujia marang GUSTI, awit GUSTI kuwi betyik,

asmané pada luhurna karo masmur,

awit kuwi apik!

₄Awit GUSTI wis milih Yakub dadi duwèké,

Israèl dadi katrésnan-Né.

₅Tenan aku weruh, yèn GUSTI kuwi Mahaluhur,

lan Gusti kita sing ngungkuli kabèh allah.

₆GUSTI nindakké apa sing dadi karepé,

ing swarga lan ing bumi,

ing segara lan ing sak ubengé segara gedé.

₇Gusti ndadèkké mendung mumbul sangka pungkasané bumi,

nggawé bledèk sing mbarengi udan,

angin dietokké sangka gedongé.

₈Panjenengané sing matèni para anak mbarep ing negara Egipte,

manungsa lan kéwan,

₉uga nekakké tanda lan mujijat

ing sak tengahmu, hé negara Egipte,

nglawan marang Parao lan kabèh abdiné.

₁₀Panjenengané sing merangi bangsa okèh,

lan matèni ratu-ratu sing kuwat.

₁₁Sihon, ratuné bangsa Amori,

Og, ratu negara Basan,

lan sak kabèhé kraton negara Kanaan,

₁₂lan tanahé dikèkké dadi tanah panduman,

tanah panduman marang Israèl, umaté.

₁₃Duh GUSTI, asma Panjenengan kuwi langgeng sak lawasé.

Duh GUSTI, Panjenengan diéling-éling turun-temurun.

₁₄Awit GUSTI kuwi bakal ngekèki keadilan marang umaté,

lan bakal melasi marang para abdi-Né.

₁₅Brahalané para bangsa kuwi slaka utawa emas,

gawéané tangané manungsa,

₁₆pada nduwé tyangkem nanging ora bisa ngomong,

pada nduwé mripat, nanging ora bisa weruh,

₁₇kupingé ana, nanging ora bisa ngrungokké,

uga tyangkemé ya ora ana ambekané.

₁₈Ya kaya mengkono kahanané para wong sing nggawé,

lan kabèh wong sing pertyaya kuwi.

₁₉Hé turunané Israèl, pada memujia marang GUSTI,

hé para turunané imam Harun, pada pasraha pamuji marang GUSTI.

₂₀Hé turunané Lèwi, pada memujia marang GUSTI,

hé, para wong sing ngabekti marang GUSTI,

pada memujia marang GUSTI.

₂₁GUSTI pasrahana pamuji sangka kuta Sion,

Panjenengané sing manggon ing Yérusalèm.

Haléluya!