1 Corinthians 12

₁Màlà yamùk Akkwalù winàpaino kon pàk, ittunnan pen kasa ewechi kon iche pùla wessaik utonpa yamùk. ₂Mùttuyatàik Katù ittunnan pe pùla ewechi kon yau, ailon pen, tùuselupasan pen katù yamùk winàkàik autatùppù kon. ₃Ittu auya'nokon iche wessaik, ànù'là Wakù Akkwalù winà tùuselupasen uya, “Tàwà Jesus pa'nùpù nechii,”te pùla iwechi màlà. Molopai ànù'là uya, “Jesus mùkkàlà Itepulu,” tetok tùyiwalà pùla iwechi màlà, tùse Wakù Akkwalù winà neken.

₄Tùpatalo'nan lepantok kon wechi màlà molo, tùse mùkkàlà lùppù Akkwalù. ₅Tùpatalo'nan we'wotokomantok yawà wechi màlà molo, tùse mùkkàlà lùppù Itepulu. ₆Tùpatalo'nan tùkussan wechi màlà molo, tùse mùkkàlà lùppù Katù uya tamù'nawolon wotokoma tamù'nawàlà kappon yamùk yau. ₇Iponalà'ne lepansak màlà Wakù Akkwalù wechi molo yekamanài ke, tùulon kon pùikattàtok iwinà pe. ₈Tewinannà piyak pukkeppe we'nà yekale tùlù màlà Akkwalù yai, tùulon yemyak ittutok yekale mùkkàlà lùppù Akkwalù winà, ₉tùulon piyak ailon tetok mùkkàlà lùppù Akkwalù winà, tùulon yemyak ipittàntok yamùk meluntàlù mùkkàlà tewinan Àkkwalù winà, ₁₀tùulon yemyak tùwekkussen pen kuttok meluntàlù, tùulon yemyak Katù Maimu yenpoikatok ike, tùulon yemyak Wakù Akkwalù winàpaino molopai iwinon pen wechi tùpatalà ittutok ike. Tùulon piyak tùpatalo'nan mayin yau uselupantok, tùulon piyak yà'là te là tùpatalon mayin uya yekamatok ike. ₁₁Tamù'nawàlà sàlà yamùk màlà tewinan molopai mùkkàlà lùppù Akkwalù wotokoyi, molopai tewinpàk tok lepanài mùkkàlà iche tùwettok yawàlà.

₁₂Kappon yesak màlà tewinan, tukke ipùkkù yamùk wechi tùse. Molopai tukke lànen ipùkkù yamùk wechi tùse tewinan esak winàpaino pe iwechi màlà. Màlà kasa làma Christ wechi màlà. ₁₃Masapùla tamù'nawàlà usenpatauka'nàppà' nokon màlà tewinan Akkwalù yau tewin itesak we'nàtok kon pe, Jew yamùk molopai Jew yamùk pen, tepulu kenan kon molopai tepulu kenan kon pen tukaik, molopai tewinan Akkwalù ke lepa'nàppà' nokon màlà inchitoppe.

₁₄Masapùla esak màlà tewinan neken nà yapai ikonekasak pen, tùse tukkan màlà. ₁₅Pùta uya, “Mùyak pe pùla wechi pàk kappon pùkkù pen Iulà,” te yau, màlà uya esak pùkkù pe pùla ikupù pen màlà. ₁₆Molopai pana uya, “En pe wechi pùla wechi pàk ipùkkù pen Iulà,” te yau, màlà uya esak pùkkù pe pùla ikupù pen màlà. ₁₇Tamù'nawàlà esak wechi en pe neken yau, i'nailà ken yetatok ike wechi? Tamù'nawàlà esak wechi pana pe neken yau, i'nailà ken ikàtun yetatok ike wechi? ₁₈Tùse Katù uya tùpatalà'ne tewinpàk esak pùkkù yamùk tùlùppù màlà iche tùwettok yawàlà. ₁₉Tamù'nawolon wessak tewin neken yau, i'nailà nenken uchi sàlà esak wechi eppaino? ₂₀Nai'nùk kasa, pùkkù yamùk wechi màlà molo tukke tùse tewin itesak.

₂₁En uya,“Eyiche pùla wessaik,” te mùyak pàk pùla iwechi màlà! Molopai puppà uya, “Eyiche pùla wessaik,” te pùta pàk pùla iwechi màlà. ₂₂Tùse esak pùkkù yamùk attu'mùla kasa nùchittu yai'nannùk wechi màlà iche kulu we'nàtok kon pe. ₂₃Molopai màlà esak pùkkù yamùk wekkuli'mantok ne'nài wechi màlà eke peiwa tùmainanpasen, màlà yamùk tensan pen màlà tùnamasan, tùmainanpasen molopai tùwaputtàsen. ₂₄Màlà yamùk tùwaputtàsan pen pùkkù wannà yamùk mainanpai'ma kulu pùla. Tùse Katù uya màlà tùyiwalà kappon pùkkù yamùk kapùppù tamùkke, màlà kasa yà'là pe pùlaiwa nùsenyai'nùk pùkkù wannà yamùk wechi tùnamasan pe. ₂₅Iwepantapàssappe pùla esak wettoppe, tùse tùwemainanpaik tùwessan pe màlà yamùk wettoppe echipùkkù pe. ₂₆Tewin ipùkkù wechi e'neppe yau, tamù'nawàlà tùulon kon itonpa yamùk wechi màlà e'neppe ipokonpe, tewinan yapulàsak yau, tamù'nawàlà itonpa yamùk màlà tùutauchinpassan ipokonpe.

₂₇Christ yesak pùkkù ton uchi amyamlo, molopai tewinpàk ewechi kon yawàlà ipùkkù ton amyamlo. ₂₈Molopai sochi tau màlà, Katù uya tamù'nawolon kon wotokoyittàsak, wapiya kulu, yeunossak kon, yakon pe, Katù Maimu yenpoikannan, icholùwano pe, enupannan, molopai nen uchi mùkyamlo tensan pen ku'nài nan. Ite'mappù pàk, ipittàntok yamùk meluntàlù ke, tùulon kon pùikattànnan pe, tùulon kon ennàinan pe we'nàtok ke molopai tùulon mayin yau uselupantok ke. ₂₉Tamù'nawolon kon wechi na' yeunossak kon pe? Tamù'nawolon kon wechi na' Katù Maimu yenpoikannan pe? Tamù'nawolon kon wechi na' eke ton wotoko yamùk kuttok meluntàlù yesappe? ₃₀Tamù'nawolon kon wechi na' e'nek ipittàtok yamùk meluntàlù yesappe? Tamù'nawolon kon uselupa na' tùpatalo'nan mayin yau? Tamù'nawolon kon uya na' yà'là te là mayin yamùk uya yekama? Kane! ₃₁Tùse Katù uya lepantok kon kùlottapai wakù ton lùiwa iche ettàk ton.

Wakù kulu tamù'nawolon yepoino yekama uya sàlà.