1 Corinthians 5

₁Sàlà pe imakuyippù pe tesak kon ke anùkyan là wessa'man àkklottau'nokon, àli pe kulu man, ailon Katù ittunnan pen kùlottau tùwekkussen pen màlà. Masapùla yekamasak man upàk kàyik wemapù tùkàipùnù noppù pokonpe. ₂Itepalan pe mekkussatàik! Eusewankono'ma kon pùlan pe'nai? Tàwà mùkkàlà, màlà yekkwa ku'nàippù yenpakka nechii àkklottapai'nokon. ₃Kappon pe apyau'nokon wechi pùla tùse, uyakkwalù yau apyau'nokon wessaik molopai mùkkàlà màlà yekkwa àli ku'nàippù pàk ikasa pùla man tekassak uya màlà, molo apyau'nokon wechi kasa kulu. ₄Kùyepulu Jesus yesek yau ewepilichak kon yau molopai Iulà wechi apyau'nokon uyakkwalù yau, molopai Kùyepulu kon Jesus meluntàlù wechi molo yau, ₅Settan yemyak pùsàlà kàyik mùtùtàik ipun umattatoppe, yakkwalù wepùikattàtoppe Itepulu Weyu yattai.

₆Ikasa pùla iwechi màlà autapulà kon yau. Ittuichi auya'nokon pùla nai malalon lùkwà yapuluwetanùtok ike we'wotokomasek tamù'nawàlà pùlomù yau. ₇Ipoippà apuluwetanù'nài imokkakà, emennappe nen uchi ewechi kon pa apuluwetanù'nài pùla, messatài'nùk kasa kulu. Masapùla Christ kùponalok kon Usentakantok kaliniluyi lùkkwà wàsak pàk. ₈Màlàpàk uchi uta'lettàntok ikuppai'nokon ipoippà apuluwetanù'nài pàk pùla, àli pe molopai wakù pe pùla we'nàtoppe ku'nài. Tùse làkku yapuluwetanù'nài pùn pùlomù pusak pàk, esuken we'nàtoppe molopai ailon pe we'nàtoppe kunài pùlomù pusak.

₉Kaleta umenukappù yau àpàkù'nokon, “Tesak kon ke imakuyippù ton kappon yamùk pokonpe kettàu,” teppù uya. ₁₀Sàlà wolù yawon kon nà tesak kon ke imakuyippù pe tùwessan, wapùla tùuseka'nonkasan, wapùla amak ton wapùla ailon pen katù yemloto po tùwepeimasan te uya pen. Màlà kasa nen iwechi yau sàlà wolù nàmà auya'nokon màlà. ₁₁Tùse làkku Kappon, àtonpa kon ailon tawon pe tùusesassen echii'ma àli ku'nài tesak ke, wapùla tùuseka'nonkasen, wapùla ailon pen katù yemloto po tùwepeimasen, wapùla àli pe tùulon winàkàik tùuselupasen, wapùla tùwetùnsen, wapùla amappe tùwessen pokonpe kettàu te uya nen màlà. Mùkkàlà yekkwa là pokonpe kata'lettàtàu.

₁₂Yà'là woton pe ken sochi tawon kon pen nà kottùma uya? Sochi tawon kon ailon tawonnan neken ku walai mùkyamlo ànkottùma kon? ₁₃Katù uya nen màlà sochi tawon kon pen talumattà.