Ailon Tawonnan Nùkupù
1Kàyik eyentaino kùsàulàmai, tùse yekamappokà àkàipùnù yekamappo auya kasa. Umoine ton ikukkà ayakon non kasa, 2nossan yamùk, koko yamùk, asanon kasa, molopai ema'nomichi àwàlichi ton kasa, tùwanmùla.
3Itayappù iwelichak kon ipùikattakà iwepùikattàtok iwinà pùnon kulu. 4Tùse tùmunkà ke wapùla tùpayan ke iwechi yau, tàwà mùkyamlo nùmainanpai, sàlà kasa tùsan kon, molopai tùkàipùnù kon, tùtamo kon, tùnok kon uya tùmainanpappù kon yepeppu pe, masapùla sàlà uya Katù yauchinpa màlà. 5Tewinchalon kulu, ànù'là ipùikattànài woton pùn uya mà, enpen tùwettok nonkasak màlà Katù pona tà molopai tùpùikatàtok yenna pàk iwechi ewalupà kaichalà molopai wei kaichalà. 6Tùse mùkkàlà itayappù iwelichak lùppù iche tùwettok kasa tùwemassen, welikkassak màlà, nulà lànen tùse. 7Sàlà enupantok yekamakà tok pàk, ànù'là uya tok pataka àli pe wapùla tok yàulàma tukaik. 8Tùse ànù'là uya tùtonpa mainanpa pùla iwechi yau, tùtonpa kulu, tùsan, tùkàipùnù winàpaino, ailon yawàlà pùla iwessak màlà yetapàssak ya molopai ailon tawon pen yentai kulu àli pe iwechi màlà.
9Ànù'là itayappù iwelichak lùppù yesek yamùk kùttùlùi tùulon kon itayappù iwelichak kon yesek yamùk kùlottak 60 pe kilichimochi ma'le iwechi tùse, tùse 60 pe kilichimochi iwechi yau itùlù màlà; molopai nàlà iwemali'masak pe iwechi màlà tewin itekkwa neken, 10molopai nàlà wakù ku'nài pe itekale nechiik: tùmunkà yamùk yemokkanài wakù pe pe, kaklan yamùk yanùnnài tùwùk tak pe, Katù ponalok kon pùta kolùkanài pe, tùwettalumattàsan pùikattànài pe, molopai tamù'nawolon yà'là yekkwa là wakù ku'nài pe.
11Tùse ema'nomichi itayappù iwelichak kon kùtùlùi itayappù iwelichak kon yesek kùlottak, masapùla ànkuppai tok wettok uya emali'mapai tok kupù yau, tùwelattàsan mùkyamlo Christ winàpai, 12molopai wapiyalok ikupù tùuya'nokon teppù tùuya'nokon ikkwàtù tok uya pàk. 13Yà'là pàk pùla tùuko'manse tok usenupasak màlà, yakon tawàlà tùusalà kon ke; tùse nàlà tok uselupa là tùtonpa kon pàk echipalà molopai yauchin pe tok wechi yà'là pen pàk, yà'làlà yekamapaino kulu là pen nànen uchi yekama pàk. 14Màlàpàk ema'nomichi itayappù iwelichak kon wemali'ma iche wechi màlà, tùumunkàtatok kon pe, tùwùk molopai tùmunkà yamùk mainanpa toppe tùuya, kùyeyaton kon uselupatok àli pe kùpàk yattai pùla. 15Masapùla tùulon kon itayappù iwelichak kon lùssan welattàkasak man Settan ya'là. 16Tùse ànù'là nossan ailon tawon Katù pàk wechi itayappù iwelichak kon lùppù yesappe tùtonpa yamùk kùlottau yau, tàwà tok mainanpai, sochi wotokoyi pe iwechi tukaik, iwepùikattàtok iwinà pùn kulu mainanpa toppe sochi uya.
17Sochi yepulu yamùk wakù pe wotoko yanàinan wechi màlà te'masan pe eke peiwa, mùkyamlo kulu tùwe'wotokomasan sa'man pe wakù itekale yekama pàk molopai kappon yamùk yenupa pàk. 18Masapùla Katù Maimu uya,
“Paka mùta kùsaulomùi a'naik yeppa ya tùse,” tawon, molopai, “Tùwe'wotokomasen mùkkàlà te'masen, ” tawon. {Luk10.7}
19Sochi yepulu winàkàik uselupantok kùsetai asa'lon kon wapùla àsolùwawon kon uya neken ipantomù nessak yau yeta màlà. 20Tùse àli ku'nài nan nùssan yàulàmakà molopai tok yekamappokà kappon yamùk yemloto po, amak yai pùla, tok tonpa yamùk yenu yappolù pe.
21Katù yemloto po, molopai Christ Jesus yemloto po, molopai wakù ton inchelù yamùk yemloto po, eyekamappo uya sàlà tùumayintaik, sàlà enupantok yawàlà ewechi pa, ekkaichalà tùmenkaik pùla ànù'là pàk yà'làlà ànkupù kupù pa. 22Kesemittàpai eyemyatù tùlù auya ànù'là pona pàk Itepulu Jesus wotokoyi ponaloppe tok tùlù auya pàk. Tùulon kon uya àli kupù tonpa pe kechii; wakù pe esuken ekkà.
23Tuna neken kùchinchii, tùse mala lùkkwà wine inchikà eyipik pe àlotta pàkànsau, masapùla e'nek pe ewechi pàk echipalà.
24Tùulon kon kappon yamùk makuyi màlà tùusensen, molopai tok makuyi utà màlà tok wapiya ittuntok patassek yak, tùse tùulon kon makuyi usene màlà imasa iwa. 25Màlà kasa nàlà wakù eselu usene màlà, molopai màlà yamùk tùusensan kulu pen lànen uso'nantok pùla iwechi màlà.
