2 Timothy 2

₁Àmàlà, umu, meluntà pe ekkà wakù lepantok yau kùponalok pe nai'nùk Christ Jesus yau. ₂Enupan uya yawàlà uyetappù auya tukkan kon yemloto po. Sàlà lùssan uchi yekama auya iche wessaik ailon tawonnan pàk, mùkyamlo, tùulon kon yenupannan yek pàk.

₃Ewettalumattàtok yanùnkà ina pokonpe, ailon Christ Jesus ponaloppe soicha kasa. ₄Soicha yamùk mùkyamlo yà'là yekkwa là tùwotokoyi kon pen ku'nài pen tùse tepulu tanùnnàippù, anauchinpapaino kon kulu neken mùkyamlo. ₅Aitun pe tùutàsen wenkalunnàtok yau uya tepeppù yepolo pen màlà, tùse aitun pe utàntok maimu yawàlà neken iwechi yau. ₆Umà pànnài sa'man pe iwe'wotokomasak lùppù mùkkàlà tùnpàmàpù yepelu yeponài wapiya. ₇Esenumenkakà wa ukayai'nùk pàk, masapùla Itepulu Jesus uya àkupù màlà tamù'nawolon sàlà yamùk ittu pa.

₈Ittukà Jesus Christ iwe'wuluukasak lùppù weli'nàtok yapai wechi David pa pe. Sàlàichi màlà unekama wakù itekale. ₉Molopai sàlà itekale yekama uya pàk wettalumattà nai'nùk, uyewattàsak nàlà kappon wànài yaulonsak kasa. Tùse Katù Maimu yewattàsak pùla man, ₁₀sàlà wenai tamù'nawolon pàlika uya sàlà, Katù nanùmùssan kappon yamùk pàkànsau, tok uya nàlà wepùikattàntok Christ Jesus yau yepo toppe, tamùkke apulàntok tàwàlàlà pokonpe. ₁₁Sàlà màlà ailon kulu wa tetok: “Weli'nàsak kù'nokon ipokonpe yau, wema'nà'nokon nàlà màlà ipokonpe; ₁₂yà'làlà pàlika pàk we'nà'nokon iponalok pe yau, itepulu pe nàlà we'nà'nokon màlà ipokonpe. ‘Ittunài pen Iulà,’ te'nokon yau, ‘Eyittunài pen Iulà,’ te ya nàlà màlà. ₁₃Ailon pe pùla lànen we'nà'nokon ipàk tùse, ailon pe lùppù tùwessen mùkkàlà. Masapùla ailon pe pùla iwechi tùpàk pùla iwechi màlà,” tukaik.

₁₄Àtonpa yamùk kappon yamùk yenu yapyontàkà sàlà pàk, molopai tùumayintaik tok yekamappokà Katù yemloto po tok wepanta'ma mayin yamùk pàkànsau tukaik. Wakù ku'nài pen màlà, tùse kappon yamùk yetannan mattanù'nài. ₁₅Tamù'nawolon ànùttu ikukkà tamù'nawàlà auchinpantok Katù yenu yau yepolo pa, tùwe'wotokomasen tùwekuli'masen pen tùwotokoyi pàk kasa, mùkkàlà ailon Katù Maimu pàk enupanài ikasa kulu. ₁₆Àli pe molopai pakko pe uselupantok winàpai ekkukkà, kappon yamùk yenpenài neken màlà mei lùiwa Katù winàpai. ₁₇Màlà tok uya enupantok wechi màlà welei, pun yannài pe nai'nùk kasa. Asa'lon kon pùsamlo enupannan tok kùlottau: Hymenaeus molopai Philetus tawonnan. ₁₈Tok utassak man ailon winàpai. Iwelichak kon we'wuluukakapùppù nen màlà pena nùkayan tok, molopai ailon tetok tùulon kon uya mattanùssan tok. ₁₉Tùse meluntà sa'man wakapu Katù nùnonkappù tùutalo'ma woton pen màlà; molopai sàlà mayin we'menukasak màlà ipàk:

₂₀Eke tapùi tau molo pùsau yamùk tùwessen tùpatalo'nan: tùulon kon ikonekasak chilùpa molopai kolù yapai; tùulon kon ikonekasak yei molopai àinà yapai; tùulon kon wechi wakù ton pe yà'là yattai neken nà tapulàsen molopai tùulon kon echipalà tapulàsen pe. ₂₁Ànù'là wekkupù wakù pe tamù'nawolon màlà yamùk àli ton winàpai yau, iwettùsak màlà molopai tapulàsen pe iwechi Tepulu ponaloppe, iwekonekasak wakù wotoko yau tapulà toppe. ₂₂Àli ànkuppai umoine wettok winàpai elattàkà molopai wakù pe we'nàtok pàk e'wotokomakà màlà yamùk yepolo pa, ailon tetok, uchi'nùnmantok, molopai echitonpa pe we'nàtok, mùkyamlo esuken itewan Itepulu kà'mayai'nùk tùpùikattà tok kon pe ya pokonpe. ₂₃Tùse pakko pe molopai ittunài pe pùla usàulàmantok winàpai ekkukà, mùttuyaik iwenukapù we'naikantok yau. ₂₄Itepulu yapyoto sakoloppe kùsettak. Tàwà wakù pe nechii tamù'nawolon kon pàk, enupanài yeppe molopai ese'mapai kùsettak ₂₅àsà pe tùwessan tùwinàik panamai àssà'mùla, Katù uya tok lepa tok upokoitatok ke yakan pe molopai ailon ittutok tok uya winàkàik tok welattà yakan pe. ₂₆Tok uyàpù màlà ikasa tùusenumenkatok kon yak molopai tok wepùikattà màlà Makui uya pùlannàtok molopai iche iwettok kuttok winàpai.