2 Timothy 3

₁Sàlà ittukà! Sa'man ton weyu wechi màlà molo pata wenukapù yattai. ₂Kappon yamùk wechi màlà tùmàlà neken pùnùnmannan pe, pùlayatta pùnùmannan pe, tùutapulàsan pe, tùtonpa yentai wakù pe tùwekkussan pe, mottùnpannan pe tok wechi màlà, tùsan kon maimu yawàlà pùla tùwessan pe, tenki tawonnan pe pùla, esuken pùla; ₃iichi'nùnmatok pùla, tùusentuppasan pe pùla, eimipponnan àli pe tùuselupa kon ke, tesak kon pen molopai àsà ton; wakù wechi tok yewanma pe màlà; ₄eimipponnan pe tok wechi màlà, tùusenumenkaik pùla yà'làlà ku'nài nan pe, tùtonpa kon yentai tùwekkussan kon pe; sàlà motau utauchinpantok kupù màlà tùwakùli kon pe Katù kupù tùuya'nokon tù'nùn kon pe yentai; ₅polopon neken Katù yapulàtok yeselu kupù tok uya màlà, tùse iwalai kulu imeluntàlù nulunpa tok uya màlà. Pùsamlo kappon yamùk winàpai ekkà. ₆Pùsamlo yekkwa ton mùkyamlo tùutàsan tapùi tak kappon wanmùla molopai attu'mùnon ulichan yamùk yentaikannan tok uya tùmaimu kon ke, tok makuyi nelemluku ton molopai yà'là walainon nà ànkuppai we'nàtok nalà ton. ₇tàwàlà tùusenupasan tùse ailon ittunnan pen. ₈Walawotichi yamùk Jannes molopai Jambres tawonnan uya Moses wakkàtùppù kasa, pùsamlo uya ailon wakkàtù màlà, àli pe tùusenumenka kon winà molopai ailon te tùuya'nokon ailon pen pàk winà. ₉Tùse tok utà mei kulu pen màlà, masapùla tamù'nawolon kon uya pakko pe tùwechi kon yene màlà, pùsamlo walawotichi yamùk Jannes molopai Jambres pàk iwekkupùppù kasa.

₁₀Eyenupappù uya lùssan mùttuyaik, wemapùppù mùttuyaik. Tùse enupantok uya là mùttuyaik, wemapù yeselu molopai iponaloppe wemattok ailon tetok uya, pàlikantok uya, pùnùnmantok uya molopai tùusetakkaik pùla wettok tachin pe. ₁₁Umottùnpatok, wettalumattàtok, yà'là yekkwa ton nà wekkupùppù uwinàkàik Antioch po, Iconium po, molopai Lystra po, àsà ton kulu wettalumattàntok pàlikappù uya! Tùse Itepulu uya upùikattàppù tamù'nawàlà màlà yamùk yapai. ₁₂Tamù'nawolon kon wakù pe emappaino Christ Jesus ponaloppe wettalumattà màlà. ₁₃Àli ton kappon yamùk molopai tùusennakasan wena àli pe tùwettok kon yapai àli peiwa tùse, tùulon kon yennakai'ma tùulon kon uya tennkatok ke. ₁₄Tùse àmàlà, ailon eyenupappù lùppù yau molopai ananùmùppù lùppù yau ekkà. Masapùla ànùk yan wechippù eyenupanài pe ittu auya pàk, ₁₅molopai mùttuyaik mule pe ewechi motapai Wakù Katù Maimu ituppù auya, pukkek pe we'nàtok ke elepanài màlà wepùikattàtok yak anài ailon tetok Christ Jesus yau. ₁₆Masapùla tamù'nawolon Katù Maimu màlà Katù nekamappù Takkwalù yai imenukatoppe molopai tapulàsen pe kappon yamùk yenupa toppe ailon pàk, iwalai pen yekamapotok, ikasa pùla tùwessen konekatok ikasa, molopai ikasa wema'nàtok yawà ke enupantok, ₁₇kappon, Katù yapyoto pe tùwessen wettoppe wakù pe iwekonekasak yeppe yà'là yekkwa là wakù wotoko kuttoppe ya.