Yeunossak kon Wotokoyi 2

₁Uta'lettàntok Weyu welepansak yau, tamù'nawolon kon ailon tawonnan wepilipùppù tamùkke tewin ipatassek. ₂Màlà yattai epùn winàpai meluntà assetun tàwù walai yetappù tok uya, molopai tamù'nawàlà tapùi itau tok wettok chichiu pe yanùkkappù ya. ₃Màlàyau apok walai non ani yamùk uyàpù tùwepantakapàtù pe tùpona'nokon yeneppù tok uya, molopai tamù'nawolon kon pona iweleutappù tewin pàk. ₄Tok wanùpùppù màlà tamù'nawàlà Wakù Akkwalù ke molopai tok wessa'molùkappù tùuselupa kon pàk tùpatalo'nan mayin yamùk yau, Wakù Akkwalù uya tok pùikattàppù tok uselupatoppe.

₅Jew yamùk wechippù molo Jerusalem po kaklan pe iyàssak kon, Katù pàk tùwàpùlemasan iyàssak kon tamù'nawàlà wolù yawolon pata yapai. ₆Sàlà tàwù yetasak tùuya'nokon yau, ilinà pe tok wepilipùppù. Masapùla ailon tawonnan uselupa yetasak tùuya'nokon tùmaimu kon, yau pàk tok usenumenkappù kulu. ₇Tùusenumenkatok kon yau tok uselupappù, “Pùsamlo ku mùkyamlo kàyik yamùk sàlà kasa nùselupayai'nan nùk tamù'nawàlà Galilee pon kon! ₈“Yà'là pe ken uchi iwechipàk tamù'nawàlà kùmyamlo uya tok uselupa kùmaimu kon yau yeta sàlà? ₉Parthia pon kon kùmyamlo, Media pon kon, Elam pon kon, Mesopotamia pon kon, Judea pon kon, Capadocia pon kon, Pontus pon kon, Asia pon kon, ₁₀Phrygia pon kon, Pamphylia pon kon, Egypt pon kon, Libya, Cyrene piyawon woino kon, molopai kaklan yamùk Rome pon kon, ₁₁asakklàma Jew yamùk molopai Jew yamùk pen molo man. Jew yamùk pen tùse iwelattàsak kon, Jew yamùk uya enupantok winàkàik, Crete pon kon molopai Arabia pon kon nàlà kùmyamlo. Tamù'nawàlà kùmyamlo uya tok uselupa kùmaimu kon yau yeta sàlà, wakù kulu eke ton Katù nùkupùppù pàk?” tukaik. ₁₂Tok usenumenkappù kulu, ailon te tok uya ma'le iwechippù, màlàyau tok usekamappopàtùppù, “Yà'là te ya pe ken uchi iwechi sàlà?” tukaik. ₁₃Tùse tùulon kon uya tok mottùnpa pe, “Pùsamlo wetùnsak màlà wain ke!” teppù tok pàk.

₁₄Màlàyau Peter wà'mùssakkappù tùulon kon 11 pan kon pokonpe molopai eke pe ichelupappù, “Utonpa yamùk Jew yamùk, molopai tamù'nawàlà amyamlo Jerusalem po tùwemassan, kùyetatàk kon molopai unekama yetatàk kon,” teppù ya tukkan kon kappon yamùk pàk. ₁₅“Pùsamlo kàyik yamùk wetùnsak pùla man wa mùkayatài'nùk kasa. Ko'làma nen man, 9 o'clock neken nen. ₁₆Tùse sàlà màlà Joel, Katù Maimu yenpoikanài uselupappù lùppù ipàk. ₁₇‘Sàlà kupù uyaichi màlà pata weyu wenukappù yau. Wakù Akkwalù tùlù uya màlà tamù'nawolon kon kappon yamùk pona. Àmu kon molopai eyenchi kon uya Katù maimu yenpoikatok woton, eyimoinelù kon uya we'neppà'nà kasa yà'làlà yene màlà, molopai ayamokoli kon yamùk we'neppàtù màlà. ₁₈Ewaik, uyapyoto yamùk là, asakklàma kàyik yamùk molopai nossan yamùk pona, Wakù Akkwalù tùlù uya màlà, màlà yattai. Molopai tok uya Katù Maimu yenpoika màlà. ₁₉Tensen yekkwa pen kupù uya màlà kak yau, molopai yà'làlà enumenkanài kupù uya màlà non po. Mùn wechi màlà molo, molopai apok molopai ichin pe ikelechin. ₂₀Wei wena màlà ewalupà pe, molopai kapùi umùnta màlà, màlà eke molopai wakù kulu Itepulu Weyu uyàpù wapiya. ₂₁Màlàyau nen uchi màlà ànù'là Itepulu yesek yessa'nài wepùikattà màlà!’

₂₂“Sàlà umaimu yetatàk kon, kappon yamùk Israel pon kon! Jesus, Nazareth pon kàyik, usenpoikappù màlà àpyakù'nokon Katù winà, eke iwotokoyi yamùk tensan pen molopai tùttusan yekkwa pen winà, enumenkanài winà, molopai yà'làlà yentok ipàkàlà pe tùwekkussan winà, màlà Katù nùkupùppù Jesus yai. Amyamlo nùttuyai'nùk kasa. ₂₃Katù uya sà kasa wak nechiitta tetok tùuya yau, molopai ittutok tùuya yau, Jesus tùlùppù eyemyakù'nokon. Molopai iwànàppù auya'nokon, àli ton kappon yamùk uya tàwà ipukapàttoppe pulusuk pona ikupùppù auya'nokon. ₂₄Tùse Katù uya iwuluukappù iwelittok yapai, ipùikattàppù ya weli'nàtok uya yi'ninpatok winàpai, masapùla weli'nàtok uya yachitok pùla iwechi pàk. ₂₅Masapùla David uya wa teppù ipàk, ‘Itepulu yeneppù uya uyemloto po tàwàlà, ukamikù pen winà man, màlàpàk uttama pen màlà. ₂₆Sàlà kasa iwechi pàk uyewan nùtauchinpayan, molopai umaimu wanùssak man utauchinpantok ke. Wàlàkkapù sàlà enpen wettok yau upun yau. ₂₇Masapùla uyakkwalù yenu'ma auya pen màlà iwelichak kon kùlottau, esukenan àponalok uya kàtantok ittutoppe ikupù auya pen màlà. ₂₈Asanta wema'nàtok ye'ma yawà anài yekamasak auya man upàk, molopai upyau ewettok uya uyanùkka màlà utauchinpantok ke,’ tukaik. ₂₉“Utonpa yamùk, masa uselupaiche wakù pe tùttuse ina tamo David pàk. Iwelikùppù màlà molopai iwu'nattàppù màlà, iwuluwachi talà man kùpyau'nokon sàlà tepose. ₃₀Katù Maimu yenpoikanài pe iwechippù molopai Katù uya ‘suwa wechi màlà’ tetok tùpàk ittuppù ya. Katù uya tùnkupù woton yekamappù, ‘tewin nà David payan kùlottapai Kin koneka uya màlà,’ iwechippù kasa tukaik. ₃₁David uya Katù nùkupù woton yeneppù, màlàpàk ichelupappù Christ we'wuluukatok pàk, ‘Weli'nàtok patasek yak yenu'mappù pùla iwechi màlà, ipun ukàtapppù pen,’ tukaik. ₃₂Katù uya pùsàlà, Jesus wuluukappù weli'nàtok yapai, molopai tamù'nawàlà ina mùkyamlo sàlà ailon yekaman nan. ₃₃Iwuluukappù màlà kamik pen Katù yemyatù yak. Molopai Wakù Akkwalù yanùmùppù ya iwinàpai. Sàlà pe menyatài'nùk molopai metayatài'nùk màlà ilepatok ya eke pe. ₃₄David là wenukuppù Epùn pona pen, tùse, ‘Itepulu uya wa teppù Uyepulu pàk, eleutakà talà kamik pen winà, ₃₅eyeyaton non kupù uya atta yapon pe, atta yo'no ponalà,’ teppù ya. ₃₆“Tàwà tamù'nawolon kon Israel pon kon kappon yamùk ailon pe nùttui, pùsàlàichi mùkkàlà Jesus ànpukapàtùppù kon pulusuk pona. Katù uya ikussak màlà Itepulu pe molopai Christ pe!” teppù Peter uya.

₃₇Sàlà yetasak tùuya'nokon yau kappon yamùk usewankono'mappù kulu. Màlàyau Peter molopai tùulon kon teunossan pàk, “Ina tonpa yamùk, Yà'là ken uchi kupù ina uya?” teppù tok uya. ₃₈Peter uya yeikuppù “Elattàtàk kon amyamlo tamù'nawàlà amakuyi kon winàpai, molopai esenpataukatàk kon Jesus Christ yesek yai, màlà yau amakuyi kon pàk usentuppan màlà. Molopai Wakù Akkwalù, Katù uya lepantok yepolo auya'nokon màlà,” ₃₉“Masapùla Katù uya sàlà kupù uya màlà tetok tùuya yekamappù, àpàkù'nokon molopai àmunkà kon yamùk pàk, molopai tamù'nawolon kon mei nai'nan nùk pàk, tamù'nawàlà amyamlo Itepulu Kù Katùyi kon nùkà'maton tùpyak,” ₄₀Peter uya tok yelupappù tukke tok yeka'nonka pe, “Epùikattàtàk kon, sàlà wettalumattàntok nùyàsai'nùk pùsamlo àli ton kappon yamùk sàlà yattai nai'nannùk pona winàpài!” ₄₁Tukkan kon uya ailon teppù Peter uya itekale yekama pàk. Molopai tok usenpataukappù, 3,000 yailà'ne kappon yamùk uya ailon tawonnan tonpattàppù, màlà wei yattai. ₄₂Tok uko'manpàtùppù tùusenupa kon pàk yeunossak kon uya enupantok pàk, tamùkke tok tok wechippù, tùuta'letàtok kon yau molopai tùwàpùlematok kon yau.

₄₃Tukke yà'là yekkwa ton nà, yensak ton pen, enumenkan nan wekkupùppù màlà yeunossak kon yai, màlàpàk tamù'nawolon kon wanùssak wechippù we'namantok ke. ₄₄Tamù'nawàlà ailon tawonnan wechippù tamùkke echitonpa pe. Tok uya yà'làlà tùpyawon'nokon yekamùppù tùtonpa kon pokonpe. ₄₅Tok uya temamin kon chilanmappù molopai pùlayatta pantakappù tok uya tùklottau'nokon iche kulu tùwettok kon yawàlà. ₄₆Tàwàlà là wei kaichalà tok wepilippàtùppù Katù yùwùk tak. Pùlomù pusak pilipàtùppù tok uya tùwùk kon tau molopai kùyali napùppù tok uya tùutauchinpaik molopai tùwanmùla itewan, ₄₇Katù yapulà pe molopai kappon yamùk uya tok namappù. Molopai wei kaichalà Itepulu uya tok tonpattàpàtùppù tùwepùikattàsan yek ton ke.