Yeunossak kon Wotokoyi 3

₁Tewin nà wei yattai 3 o'clock yattai Peter molopai John tawonnan utàppù Katù yùwùk tak, wàpùlemantok yattai. ₂Molo “Wakù kulu Manatta” tukaik tesassen motau, kàyik wechippù tùusasen pen tùwentuppù motapai. Wei kaichalà tapàssen pe iwechippù manatta piyak pùlayatta pàk enkui pe iwettoppe kappon yamùk Katù yùwùk tak tùutàsan pàk. ₃Peter molopai John tawonnan utà Katù yùwùk tak yensak tùuya yau enkui pe iwechippù, yà'làlà ke tùlepa toppe tok uya. ₄Tok wechippù itenupàkà molopai Peter uya, “Masa ina yenkà!” teppù. ₅Màlàyau tok yeneppù ya, yà'làlà yepolo tùuya tok winàpai pe tekamaik. ₆Peter uya, “Pùlayatta pùla kulu wessaik, tùse elepa uya sàlà itesak pe wettok ke. Jesus Christ Nazareth pon yesek yau, à'mùssakkakà molopai asakà, te uya sàlà,” teppù ipàk. ₇Màlàyau Peter uya yachippù kamik pen itemyatù pàk molopai ipùikattàppù ya iwà'mùssakka tùse. Asse'ne kulu mùkkàlà kàyik pùta molopai iplakun umeluntàtappù. ₈Iichanùmùppù satippe tùtta pona, molopai tùusalà pàk iwessa'molùkappù. Màlàyau iwewomùppù Katù yùwùk tak tok ya'là, iichalàppù molopai iichanùnpàtùppù Katù yapulà pe. ₉Tamù'nawàlà kappon yamùk uya iichalà molopai Katù yapulà ya yeneppù. ₁₀Enkui, Katù yùwùk mùlatta Wakù Kulu tukaik tesassen po tùwessen pe ittusak tùuya'nokon yau, tok usenumenkappù kulu màlà wakù wekkussak ipàk pàk.

₁₁Peter molopai John tawonnan pàk iitachippù. Tamù'nawàlà kappon yamùk usenumenkappù kulu màlà molopai tok utàppù aitun pe tok piyak, Solomon patassek tukaik tesassen yak. ₁₂Kappon yamùk yensak tùuya yau, Peter uya wa teppù “Kappon yamùk Israel pon kon, yà'là pe iwechi pàk eusenumenkasak kon màlà sàlà pàk, molopai yà'là pe iwechi pàk ina yenupàkà ewechi kon màlà? Ina uya ka' tùmeluntàlù kon molopai wakù pe tùwettok kon yai pùsàlà kàyik usatoppe ikussak pe mùttuyatàu lù? ₁₃Abraham Katùyi, Isaac Katùyi, molopai Jacob Katùyi, ina tamo yamùk Katùyi uya, wakù apulàntok tùsak sàlà tapyoto Jesus yemyak. Pùsàlà tùlùppù auya'nokon itepulu yamùk yemyak, inulunpappù auya'nokon Pilate yemloto po, inonka pàk lànen iwekkussak tùse. ₁₄Esuken iwechippù àli là kuttok pùla, tùse inulunpappù auya'nokon, molopai kappon wànàippù yennappù auya'nokon inonka toppe. ₁₅Màlàyau nen uchi wema'nàtok yesak wànàppù auya'nokon. Tùse Katù uya iwuluukappù weli'nàtok yapai molopai ina uya yeneppù molopai ina nekamayan. ₁₆Jesus yesek meluntàlù uya màlà pùsàlà tùusasen pen kàyik lepasak nai'nùk imeluntàlù ke. Menyatài'nùk molopai mùttuyattài'nùk wekkussak màlà ailon tetok itesek pàk yai. Ailon tetok Jesus pàk uya màlà pùsàlà ipittàkassak sàlà kasa eyemloto kon po.

₁₇“Màlàpàk utonpa yamùk, tùttuyaik màlà amyamlo molopai eyepulu kon nùkuttai nùk Jesus winàkàik, wekkupùppù ittu auya'nokon pùla iwechi pàk. ₁₈Katù uya pùsàlà tùneunokoppù wettalumattàtok woton yekamappù màlà pena tùmaimu yenpoikannan winà. Molopai ailon pe màlà kasa iwekkuttoppe ikupùppù ya. ₁₉Elattàtàk kon uchi àli kuttok auya'nokon winàpai, elattàtàk kon Katù winàkàik màlàyau amakuyi kon kolùka ya màlà, ₂₀Emennak emeluntàlù yepolopa Itepulu winàpai molopai Jesus yeuno toppe ya, mùkkàlà Christ inanùmùppù lùppù àponalok kon pe. ₂₁Epùn po iwechi màlà tamù'nawolon wenatok emennak pe yattai uyàpù ponalà, Katù uya yekamappù pena wakù ton tùmaimu yenpoikannan yai kasa. ₂₂Masapùla Moses uya, ‘Itepulu Akatùyi uya tùmaimu yenpoikanài pùmùssakka màlà ukasa. Mùkkàlà wechi màlà àklottawon' nokon pe. Metatàik tamù'nawàlà inekama. ₂₃Ànù'là mùkkàlà nekama yetanài pen wepantaka màlà Katù ponalok kon kappon yamùk winàpai molopai inmatta màlà,’ teppù ya. ₂₄Molopai tamù'nawàlà Katù Maimu yenpoikannan, Samuel molopai mùkyamlo ite'mappù pàk iyàssak kon nùssan, itekale yepoikannan uya sàlà yattai nekkusai'nùk yekamappù màlà. ₂₅‘Àponalok kon màlà tùmaimu yenpoikannan yai, ikupù uya màlà teppù lùppù Katù uya atamo kon yamùk pàk. Sàlà yamùk màlà àponalok kon nàlà tok munkà pe ewechi kon pàk. Abraham pàk, ‘Apayan yamùk yai tamù'nawolon kon kappon yamùk non pon kon pùlema uya màlà,’ teppù tùuya kasa. ₂₆Màlàpàk Katù uya wapiya tapyoto wuluukappù weli'nàtok yapai molopai yeunokoppù apyakù'nokon, àpùlemase' nokon, tewinpà'ne ewelattà kon pa àli kuttok auya'nokon winàpai,” teppù Peter uya.