Yeunossak kon Wotokoyi 6

₁Màlà yattai Jesus ya'lon kon wena tukke yau, Greek pe tùuselupasan Jew yamùk usàulàmappù Hebrew pe tùuselupasan Jew yamùk pàk. Masapùla tùtonpa kon yamùk itayappù iwelichak kon yenpàtù wei kaichalà tok lepatok tùse pàk. ₂Màlàyau 12 pan kon yeunossak kon uya tamù'nawàlà tenupasan kà'mappù tamùkke molopai tok uya tok pàk, “Ikasa pùla nen mà iwechi màlà tà Katù Maimu yekamatok tùnulunpase pùlayatta yennàinan pe molopai tùuolon kon pùikattà pàk ina wechi yau,” teppù. ₃“Màlàpàk utonpa yamùk, 7 pe kàyik yamùk yanùntàk kon àkklottapai'nokon wakù pe tùttusan, Akkwalù ke molopai pukkek ke iwanùssak kon pe, pùsamlo tùlù ina uya màlà sàlà yennài nan pe tok wetoppe. ₄Molopai ina nen uchi wettoppe tùwàpùlematok kon yau molopai itekale yekama pàk” teppù tok uya. ₅Tamù'nawolon kon yauchinpappù yeunossak kon uselupatok uya màlà. Màlàyau tok uya Stephen yanùmùppù, kàyik ailon tetok ke molopai Wakù Akkwalù ke iwanùssak molopai Philip, Prochorus, Nicanor, Timon, Parmenas, molopai Nicolas, Antioch pon. Mùkkàlà wechippù Jew pen, tùse tok yenupatok winà Jew kasa iwenasak. ₆Pùsamlo salattàppù tok uya yeunossak kon yemloto pona. Tok wàpùlemappù molopai temyatà kon tùlùppù tok uya tok pona.

₇Màlàyau Katù Maimu usekamappù mailàlà. Molopai tukke màlà yentak Jerusalem po kappon yamùk wenappù Jesus ya'lon nà pe asse'ne. Tukke lànen uchi paatele yamùk uya ailon tetok yanùmùppù.

₈Stephen wanùssak Katù yapàikketù ke molopai wakù pe iwettok ke uya, eke ton tensan yek pen, enumenkan nan kupùppù kappon yamùk kùlottau. ₉Tùse tùulon kon kappon yamùk usàulàmappù. Pùsamlo wechippù màlà itepeppù pùla iwe'wotokomasak kon nùssan nonkasak kon lùssan wepilittok itak tawon kon pe, Jew yamùk pe tok wechippù màlà Cyrenia pon kon molopai Alexandria pon kon pe. Mùkyamlo molopai tùulon kon Jew yamùk Cilicia pon kon molopai Asia pon kon wesa'molùkappù tùusàulàma kon pàk Stephen pàk. ₁₀Tùse Wakù Akkwalù uya Stephen lepappù pukkek pe iwettok ke. Màlàpàk iichelupa yau ànù'là uya yentaika pùla iwechippù. ₁₁Màlàpàk amak yai tok uya kàyik yamùk yepoloppù, “Àli mayin yapulà ya yetatai ina, Moses winàkàik molopai Katù winàkàik!” te toppe tok uya. ₁₂Sàlà kasa tok uya kappon yamùk, Jew yamùk Eke ton, molopai Law pàk enupannan sakolopappù. Tok uyàpùppù Stephen piyak molopai tok uya yachippù molopai inepùppù tok uya Jew yamùk Yepulu ton yemloto pona. ₁₃Màlàyau tok uya kàyik yamùk nepùppù tùukaseita woton kon iwinàkàik. “Pùsàlà kàyik tùuselupa pàk man Wakù Katù Yùwùk winàkàik molopai law winàkàik,” tukaik. ₁₄“Masapùla ina netatai, ‘Pùsàlà Jesus Nazareth pon uya, Katù yùwùk yamokklopù màlà molopai enupantok mùyakanma ya màlà te ya, màlà kan enupantok Moses uya lùppù pàk!’ ” teppù tok uya. ₁₅Tamù'nawàlà Jew yamùk yepulu ton chichiu pe tùwessan wechippù Stephen yenupàkà molopai tok uya itenpata yeneppù inchelù yenpata kasa iichensak.