1Sàlà kaleta màlà Paul, Katù wettok iche yawàlà Christ Jesus neunokoppù winàpaino, Katù ponalok kon Ephesus po tùwemassan piyak, mùkyamlo ailon ton tùwemattok kon Christ Jesus yau piyak inmenukappù:
2Tàwàichi Katù Kùkàipùnù kon molopai Itepulu Jesus Christ elepai'nokon wakù pe we'nàtok tùwinàpaino molopai echitonpa pe là we'nàtok ke.
Lepantok Christ ponaloppe we'nà'nokon pàk
3Tenki te pai'nokon man Katù pàk, Kùyepulu Jesus Christ Kàipùnù pàk! Wakù pe kulu iwessak man kùpàkù'nokon, tamù'nawolon wakù lepantok epùn pon ke kùlepa kon tùuya yawàlà, masapùla Christ ponaloppe we'nà'nokon pàk. 4Katù uya kùyanùnkassak kon wechippù màlà tùponaloppe Christ yau, wakù pe esuken we'nàtokkonpe temloto po. Pena wolù wessepolo wapiya pùnùnmantok tùuya pàkàlà, 5Katù wekkussak wechippù màlà Jesus Christ yai kùnepù kon tùuya tùpyak pàk tùmunkà yamùk pe. Sàlà wechippù màlà ittauchinpatoppe molopai iche iwettoppe. 6Katù yapulàpai'nokon uchi man wakù kulu usentuppantok Katù winàpaino tenumenkaik, Tùmu tù'nùn pe tùnkupù ke lepantok ya tense!
7Masapùla Christ mùnù yai wepùikattànsak nokon màlà, kùmakuyi kon pàk usentupansak. Eke kulu màlà wakù pe we'nàtok Katù winàpaino, 8-9Lepansak kon ya nai'nùk ike eke pe kulu! Tamù'nawalon tùpukketù molopai ittutok iche tùwettok yawà, Katù uya ikupù pàk tùwekkupùppù kupùppù, molopai ànù'là nùttu pe pùla tùusenumenkatok yekamappù, tùnkupù yenuka'nùpù pàk man Christ yai. 10Katù uya ikupù màlà yenuka'nùpù ya iwalai iweyu yattai, tamù'nawolon kon tùnkonekassan nepù Ya tamùkke, tamù'nawolon kon epùn pon kon, molopai non pon kon, màlàyau Christ wechi nen uchi màlà tamù'nawolon yepoi.
11Katù mùkkàlà ikupù tùuya teppù tùuya ku'nài màlàpàk Christ yappyontàppù ya màlà ina yanùntoppe ya. 12Sàlà kupùppù ya màlà ina Jew yamùk uya Katù namatok nettoppe iponaloppe molopai wapiya kulu enpen we'nàtok yeponnanùssan pe Christ pàkànsau!
13Molopai amyamlo nàlà uya ailon teppù màlà Christ pàk: ailon itekale yetasak auya'nokon yau, Wakù Itekale wepùikattàntok ne'nàippù apyakù'nokon, molopai Katù uya tùponaloppe ewechi kon yentok ipàkàlà tùlùppù màlà àpàkù'nokon Wakù Akkwalù tùlù tùuya apyakù'nokon winà, itùlù tùuya teppù lùppù tùuya. 14Wakù Akkwalù màlà Katù uya wakù ton kùnepolo kon, itùlù tùuya tùponalok kon piyak teppù yanùmù kùuya'nokon yentok ipàkàlà, Katù uya tùne'mappù yanùmù tùponaloppe weyu ponalà, wakù pe iwettok yapulà toppe.
Paul Wàpùlematok
15Sàlà wenai, ailon tetok auya'nokon Itepulu Jesus pàk molopai tamù'nawolon kon Katù ponalok kon pùnùnmatok auya'nokon yetasak uya motapai, 16àpona'nokon wàpùlematok yeleutanùssak uya pùla man Katù pàk tenki te uya yau. Eyittunài'nokon Iulà wàpùlema yau, 17Kùyepulu Jesus Christ Katùyi Kùkàipùnù wakù pe tùwessen tapulàtok yau, yekamapponài Iulà Wakù Akkwalù uya pukkeppe àkonekatok kon pe molopai Katù ittu kon pa yekamatoppe ya àpàkù'nokon. 18Eusenumenkatok kon ike utakkokatoppe itakkwayi yene kon pa yekamapponài Iula, màlà enpen we'nàtok yak àkà'masak kon ya nai'nùk ittu kon pa, eke kulu màlà wakù kuttok ya itùlù tùuya teppù ya lùppù tùponalok kon pàk, 19eke kulu màlà ne'wotokoma yai'nùk kùyau'nokon ailon tawon yau. Sàlà meluntà kùyau'nokon nai'nùk màlà eke kulu meluntà walai 20màlà yapàikatù inapulàppù Christ wuluuka tùuya weli'nàtok yapai yau, molopai yeleutanùpùppù ya kamik pen temyatù winon namantok molopai apulàntok patassek winà epùn po. 21Christ Itepulu wechi màlà molo tamù'nawolon kon epùn pon kon itepulu yamùk yepoi, apàikketton, meluntà ton, molopai tamù'nawolon kon tùulon kon itepulu yamùk yepoi. Tamù'nawolon eke ton esek yamùk wolù yawon kon yepoino mùkkàlà molopai ewanawolok tùuyàssen pata yepoino. 22Katù mùkkàlà tamù'nawolon tùnài Christ pùta yokkoik molopai itùnài sochi yepulu pe tamù'nawolon yepoi. 23Sàlà Sochi wechi màlà Christ pun pùkkù pe, tamù'nawàlà iku'nài pe tamù'nawolon yanùkkanài pe i'nai yekkwa yawàlà là.
