Ephesians 4

₁Eyekamappoyatàu uchi Iulà, Iulà yachichak nai'nùk masapùla Itepulu Jesus ponaloppe we'wotokoma pàk. Àkà'ma kon tùuya yau Katù nùkupùppù yawàlà we'nàtoppe, pàkàlà ayakkwalù kon yemakkwatàk kon. ₂Àssà'mùla ettàk kon, àsà pe pùla, molopai pàlikanài pe tàwàlà. Pùnùnmantok auya'nokon yenpoikatàk kon àtonpa kon yeselu pàlika auya'nokon winà. ₃Ànùttu kon ikuttàk kon tewin ewettok kon Wakù Akkwalù nùtùlù kupù kon pa echitonpa pe we'nàtok ayachinài'nokon tamùkke winà. ₄Tewinan màlà esak molopai tewinan Akkwalù, tewinan enpen we'nàtok Katù uya àkà'mappù kon yak walai. ₅Tewinan Itepulu molo man, tewinan ailon tetok, tewinan usenpataukatok. ₆Tewinan Katù molo man molopai tamù'nawolon kon kappon yamùk Kàipùnù mùkkàlà. Tamù'nawolon kon Yepulu mùkkàlà, tamù'nawolon kon yai tùwe'wotokomasen molopai tamù'nawolon kon yawon.

₇Tùse Christ uya tamù'nawolon kon lepappù tùpatalo'nan lepantok ke, yà'làlà itesak pe we'nà iche tùwettok yawà. ₈Màlàpàk Katù Maimu uya, “Iwenukuppù kakàik tukkan kon yachichak kon yalàppù ya tùpokon pe. Lepantok tùlùppù ya kappon yamùk yemyak,” te kasa. ₉Yà'là te ken màlà “iwenukuppù” te uya? Iwuttàppù màlà i'nawon non ya'mu yak. ₁₀Màlàpàk mùkkàlà iwuttàsak lùppù mùkkàlà iwenussak lùppù kakàik kak yepoi molopai miya itentak, tamù'nawolon yanùkkase molo tùwechi ke. ₁₁Mùkkàlà ichi mùkkàlà “kappon yamùk lepanàippù lepantok yamùk ke” tùulon kon kappon yamùk yanùmùppù ya teunossan pe, tùulon kon Katù maimuppù yenpoikannan pe, tùulon kon Wakù Itekale yekamannan pe, tùulon kon sochi yesan pe, molopai tùulon kon enupannan pe. ₁₂Sàlà kupùppù Christ uya màlà tamù'nawolon kon Katù ponalok kon kappon yamùk koneka toppe tùuya, tùwotokoyi kuttoppe tok uya. Molopai ailon tawonnan tùpàk yamùtoppe tùuya. ₁₃Màlàpàk tamùkke tewin we'nàtok yak uyà'nàtokkonpe ailon tetok kùuya'nokon yau molopai Katù Mumu ittutok kùuya'nokon yau. Christ walai non kappon yamùk pe wenan nokon màlà, sàlà kasa iwechi màlà Christ kasa kulu usemokkan ponalà. ₁₄Màlàyau mule yamùk kasa welaikan kùsettakù'nokon. Kappon yamùk ennakantakù'nokon ailon pen pàk enupan tùuya'nokon ke, yà'là yekkwa ton nà enupantok tùuya'nokon ke aimelunpantak tok, meluntà assetun uya tàntànman kasa. ₁₅Tùse làkku ailon pe uselupan uchi'nùnmantok winà, usemokanpai'nokon tamù'nawolon yawà Christ kasa, mùkkàlà tesak ippai pe nai'nùk. ₁₆Itepulu pe iwettok yo'no tamù'nawolon tùpatalo'nan esak pùkkù yamùk tùwessen tùpatasek kon yau tamùkke, molopai tamù'nawolon esak yachichak màlà ichese'muttàpàttok uya, màlà yamùk uya ipùikatànài pe ikussak. Màlàpàk tamù'nawolon ipùkkù uya tùwotokoyi kupù wakù pe, tamù'nawolon esak tùwekassen molopai tùusemokkasen uchi'nùnmantok yai.

₁₇Itepulu Jesus yesek yau uchi wa ukayaik molopai tekamayaik tu'ma: Jew yamùk pen kasa ichi kemattàu, iichenumenkatok pùnon, kasa, ₁₈molopai ichenumenkatok ewalupàttau nai'nùk. Katù nùtùlù wema'nàtok pùkkù pe pùla tok wechi màlà, masapùla ittunài pe pùla tok wechi pàk molopai sa'man pe tok yewan wechi. ₁₉Tok uya tamù'nawàlà wekkuli'man ittutok lachimappù màlà. Àli ànkuppai we'nàtok yak tok wettùsak màlà. Molopai yà'là yekkwa ton nà akùlùmannan kupù tok uya tùweleutaik pùla.

₂₀Màlà yekkwa pen màlà Christ pàk eusenupappù kon! ₂₁Yetappù auya'nokon molopai ya'lon kon pe eyenupappù kon ailon pàk Jesus yau nai'nùk pàk. ₂₂Apanamappù kon màlà penalok eyeselu kon nonka kon pa, ikasa pùla ewemapù kon pa àku'nàippù kon. Amattanù'nàippù lùppù enkuttànài ànkuppai we'nàtok kon winà. ₂₃Eyewan kon molopai eusenumenkatok kon wenatoppe emennak pe kulu. ₂₄Emennak eyeselu kon pe yepotàk kon, Katù kasa ikonekasak lùppù, molopai tùusenpoikasen ailon wema'nàtok yau màlà iwalai molopai wakù esukenan.

₂₅Tàwà ichi kasei pe we'nàtok pùla nechii! Tàwà tamù'nawolon kon uselupatok ailon pe nechii tùtonpa kon pàk, masapùla tamù'nawolon kon kùmyamlo mùkyamlo tewinan itesak. ₂₆Tùwemakuimaik ke'naikatàu. Molopai tùwe'naikase kasapontàtàu. ₂₇Makui, kù'lepatàu yà'làlà kuttok ya yattai ke. ₂₈Amappe tùwessen pe ewechi yau amappe ewettok yeleutanùkkà. Ailon pe ekkà molopai sa'man pe e'wotokomakà yà'là pùnon kappon yamùk yemyak àntùlù woton wettoppe molo. ₂₉Àli mayin kùsapulàtàu euselupatok kon yau. Pùikattànài neken mayin yapulàtàk kon, iche kulu we'nàtok ne'nài, molopai ewan ipittànài eyetannan pùikattà toppe euselupatok uya. ₃₀Molopai Wakù Katù Yakkwalù kùsewankono'matàu. Masapùla Wakù Akkwalù mùkkàlà Katù wettok eyesak kon pe yentok ipàkàlà Katù uya eyepeppù kon tùlù Weyu ponàlà. ₃₁Tamù'nawolon àli pe usàulàmantok, molopai we'naikantok inonkatàk kon. Wentaimepà'nàtok wapùla wemottùnpantok nàlà inonkatàk kon! Esseyaton pàk we'nàtok pùla nechii àkklottau'nokon. ₃₂Tùse làkku tùusentuppaik ettàk kon molopai sa'man pe pùla itewan echiwinàkàik, molopai esentuppatàk kon àpàkù'nokon Katù usentupasak àpàkù'nokon Christ yau kasa.