Galatians 6

₁Utonpa yamùk, ànù'là uya àli kupù yeposak yau, àsà pe pùla amyamlo akkwalù yawon kon uya innappo tukka màlà ikasa iwenatoppe. Molopai elanneppe mettàik, amyamlo nàlà usetaluipa àli ànkuppai tukaik. ₂Àtonpa kon ipùikàttàtàk kon inalà yalà pàk. Molopai sàlà kasa màlà Christ law yawàlà ewechi kon. ₃Ànù'là uchittu ànù'là yentai, ànùk pe pùla echii'ma yau, tùyiwalà ichennaka màlà. ₄Tamù'nawolon kon uya màlà tùwelaikatok kon ittu tùyiwalà'nokon. Wakù pe iwechi yau, itauchinpaichi màlà tùnkupùppù pàk, tùulon kon nùkupùppù pokonpe yà'là kasa là iwechi tense pùla. ₅Masapùla tamù'nawolon kon uya tewincha tùnalà kon yalà pàk.

₆Tàwà mùkkàlà tenupasen Itekale pàk, tamù'nawàlà wakù ton pantakai tenupanài pokonpe.

₇Kesenkuttàtàu, ànù'là uya Katù mottùnpa pen màlà. Kappon uya màlà tùnpàmàppù mokka. ₈Mùkkàlà àli pe eppai tùwettok ke nàppànyai'nùk uya màlà àli teselu winàpai wettalumattàntok yepolo, tùse mùkkàlà Akkwalù wettok iche ke nàppànyai'nùk uya màlà Akkwalù winàpai tàwàlàlà wema'nàtok yepolo. ₉Màlàpàk wakù kupù pàk usetakkan' nokon kùsettak, masapùla iwalai iweyu yattai ipànsak lùppù mokka màlà usemya'nùnpansak pùla iwechi yau. ₁₀Màlàpàk uchi ikuttok yattai wechi molo kùlottau wakù ikuppai'nokon tamù'nawolon kon pàk, mùkyamlo kulu ailon tetok yau nai'nannùk.

₁₁Yentàk kon eke ton pe kaleta menuka uya apyakù'nokon sàlà pe, uyemyatù ke! ₁₂Mùkyamlo teselu kon polopon yentoppe enenpoikapainai'nannùk wechi màlà Jew yamùk yattàtok yeselu yawàlà ayattàtok kon pe eyeka'nonkaiche'nokon. Sàlà kupù tok uya màlà Christ pulusukù pàkànsau tùttalumattà kon tukaik. ₁₃Mùkyamlo nàlà Jew yamùk yattàtok yeselu ku'nài nan lànen mùkyamlo Law yawàlà tùwessan pen. Wa là tùse tok wechi màlà ayattà kon iche, eyesak kon yattàsak pàk tùutapulàtok kon pe. ₁₄Tùse Iulà, utauchinpa nen màlà Kùyepulu kon Jesus Christ welichak pulusuk pona pàk neken, màlà winà wolù iwelichak kasa man upona molopai Iulà iwelichak kasa man wolù pona. ₁₅Yà'là pe pùla kappon yattàsak Jew yamùk yattàtok yeselu yawàlà wechi màlà, wapùla yattàsak pùla là iwechi wechi. Tùse làkku emennappe ikonekasappe we'nàtok. ₁₆Echitonpa pe we'nàtok molopai usentuppantok wechi màlà tamù'nawolon kon sàlà yawàlà tùwemassan po, Katù ponalok kon Israel yamùk po.

₁₇Uselupa wenukapù pe, ànù'là uwanittàpatak, masapùla uyesak pattàpàssak yàlùppù man upolo Jesus ponaloppe wechi yekamanài pe.

₁₈Kùyepulu kon Jesus Christ wettok wakù pe ayakkwalù kon yesappe nechii, utonpa yamùk. Emen.