John 21

₁Sàlà yamùk tùpo Jesus usenpoikatu'mappù màlà tùnenupa ton nùssan piyak palau Tiberias motau. Sà kasa iwechippù màlà. ₂Simon Peter, Thomas munuik tukaik tesassen, Nathanael, Cana Galilee pon poino, Zebedee mumu yamùk, molopai asa'là tùulon kon Jesus nenupa ton nùssan wechippù màlà molo tamùkke. ₃Simon Peter uya tok pàk, “Molok yachiik, utà sàlà,” teppù. Màlàyau tok uya ipàk, “Aya'là ina utà sàlà,” teppù. Màlàyau tok utàppù molopai kanau yak tok wenukuppù. Tùse màlà yewalupàyi tau, yà'làlà yachippù tok uya pen. ₄Ko'làma kulu Jesus wechippù tuna yena po satippe, tùse inenupa ton nùssan uya Jesus pe ittuppù pen. ₅Màlàyau tok pàk, “Utonpa yamùk, molok na' machitàu?” teppù ya. “Kane,” tukaik tok uya imaimu yeikuppù. ₆Molopai Jesus uya tok pàk, “Àpunwe kon yenu'matàk kamik pen kanau yeppi winà, molopai molok yachi nen uchi auya'nokon màlà,” teppù. Tok uya yenu'mappù, molopai tok uya ipalùka yentai iwechippù masapùla tukke kulu molok yamùk uya yanùkkasak pàk. ₇Màlàyau mùkkàlà Jesus nenupappù i'nùn kulu uya Peter pàk, “Itepulu pe man,” teppù. Itepulu pe man te ya yetasak tùuya yau, Simon Peter wepontàppù (tùpon pùloppon mokkasak ya wechippù,) molopai tuna kak iichanùmùppù. ₈Tùulon kon Jesus nenupa ton nùssan uyàpùppù kanau yau wepalùkansek yak. Tok uya punwe tanùkaik molok yamùk pàlàkappù. Mei kulu pùla là 100 yards kaichalà là tok wechippù tuna yena poi. ₉Tùwepalùkasak kon yau, tok uya apok yalàn po molok yeneppù molopai pùlomù pusak yamùk nàlà. ₁₀Jesus uya tok pàk, “Molok sàlà pe anachippù kon tonpa enettàk kon,” teppù. ₁₁Màlàyau Simon Peter wenukuppù kanau yak molopai molok yamùk punwe yawon kon pàlàkappù ya paluk pona. Tukke punwe yau eke ton molok yamùk wechippù, 153 kaichalà, tùse tukke lànen tok tùse punwe wekalakappù pen. ₁₂Jesus uya tok pàk, “Àittàk kon ata'lettàik,” teppù. Tùse Jesus nenupa ton nùssan wechippù enekamappopai pùla, “Ànùk ken àmàlà?” tukaik, masapùla Itepulu pe ittu tùuya'nokon pàk. ₁₃Jesus uyàpùppù, pùlomù pusak yanùmùppù ya molopai itùlùppù ya tok yemyak molopai molok tukka.

₁₄Sàlà wechippù màlà icholùwano itekkwa pe Jesus usenpoikasak tùnenupa ton nùssan kùlottak, tùwelikù tùpo tùwe'wuluukaik.

₁₅Tok uta'lettàkapù tùpo, Jesus uya Simon Peter pàk, “Simon, John mumu, à'nùn pe kulu na' kùkussan pùsamlo uya u'nùnma yentai?” teppù. Simon Peter uya imaimu yeikuppù, “Ewaik, Uyepulu, mùttuyaik u'nùn pe àkupù uya,” tukaik. Jesus uya ipàk, “Uyùkùn non kalinilu munkà mewetùik” teppù. ₁₆Jesus uya ipàk yakon itekkwa pe, “Simon, John mumu, à'nùn pe kulu na' kùkussan?” teppù. Peter uya imaimu yeikuppù, “Ewaik, Uyepulu, mùttuyaik u'nùn pe àkupù uya,” tukaik. Jesus uya ipàk, “Uyùkùn non kalinilu yamùk mùmainanpaik,” teppù. ₁₇Jesus uya Peter pàk icholùwano itekkwa pe, “Simon, John mumu, à'nùn pe na' kùkussan?” teppù. Peter upokoitappù masapùla Jesus uya tùpàk icholùwano itekkwa pe, “À'nùn pe kulu na' kùkussan?” te pàk. Molopai Peter uya ipàk, “Uyepulu, tamù'nawolon mùttuyaik, mùttuyaik u'nùn pe àkupù uya,” teppù. Jesus uya ipàk, “Uyùkùn non kalinilu yamùk mewetùik,” teppù. ₁₈“Ailon kulu sàlà, mule peiwa ewechi yau ewepontàppù eyiwalà, molopai àutàppù i'nailàlà itàpai ewettok yailà. Tùse amoko pe ewenasak yau, eyemyatù yenka auya màlà, molopai ànù'là uya àpontà, molopai ayalà ya i'nailàlà yak itàpai ewettok pen yak,” teppù Jesus uya Peter pàk. ₁₉Jesus uya wa teppù màlà yà'là yekkwa là weli'nàtok yau Peter uya Katù yapulàtok nettok yekama pe. Molopai nen uchi ipàk, “Kùwenaimakà,” teppù ya.

₂₀Tùse Peter welattappù molopai Jesus nenupappù tù'nùn pe inkupùppù uya tùwenaima kon yeneppù ya. Pùsàlà wechippù màlà mei pùla Jesus piyau echippù uta'lettàntok yapon motau, “Uyepulu, ànùk uya ken eyeimippo?” tukaik Jesus yekamapponàippù pe. ₂₁Yensak tùuya yau, Peter uya Jesus pàk, “Itepulu, yà'là kasa nen pùsà kàyik wechi?” teppù. ₂₂Jesus uya Peter pàk, “Pàli'yau iwechi uyàpù ponalà iche wechi yau, màlà wechi ken yà'là pe àpona? Kùwenaimakà kulu àmàlà pe,” teppù. ₂₃Màlàyau itekale utàppù Jesus nenupa ton tonpa lùssan kùlottau mùkkàlà kulu inenupappù welikù pen, tukaik, tùse Jesus uya, “Iwelikù pen màlà,” teppù pen, tùse, “Pàli'yau iwechi uyàpù ponalà iche wechi yau, yà'là pe ken màlà wechi àpona?” tesak ya pàk neken.

₂₄Pùsàlà ichi mùkkàlà Jesus nenupappù sàlà yamùk yekamanàippù, molopai sàlà yamùk menukanàippù nàlà, molopai ittu'nokon man ichelupatok wechi ailon pe.

₂₅Jesus uya màlà tukke tùulon kon kupùppù. Tamù'nawàlà imenukasak yau kaleta yamùk patassek woton pùla iwechi yeselùkek usenumenkayaik tamù'nawàlà wolù yau.