Luke 20

₁Tewin wei yattai Jesus wechi Katù yùwùk tau kappon yamùk yenupa pàk molopai Wakù Itekale yekama pàk tùse paatele yamùk yepulu ton, Law pàk enupannan, molopai tùnamasan kàyik yamùk tawonnan uyàpùppù màlà ipyak, ₂“Ina pàk yekamakà, ànùk yapàikketù yau ken sàlà yamùk kupù auya màlà? Ànùk ken ayapàikketù ke elepatai màlà yamùk kupù pa?” teppù tok uya ipàk. ₃Jesus uya tok yeikuppù, “Masa eyekamapoiche' nokon nàlà Iulà. Upàk yekamatàk kon, ₄John uya kappon yamùk yenpataukatok yapàikketù uyàpùppù ken na' Katù winàpai, wapùla ka' kappon winàpai lù?” tukaik. ₅Tok wessa'molùkappù màlà tùusàulàma kon pàk tùyiwalà'nokon, “Yà'là te'nokon? ‘Katù winàpai iyàpùppù,’ te yau nen, ‘Yà'là pe ken uchi iwechi pàk John pàk ailon te auya'nokon pùn?’ te ya. ₆Tùse, ‘Kappon winàpai iyàpùppù,’ te'nokon yau, pùsamo tukkan kon kappon yamùk talà nai'nan nùk uya kùwànà kon tàk ke, masapùla John wechi Katù Maimu yenpoikanài pe pàk ailon tesak tùuya'nokon pàk,” teppù tok uya. ₇Màlàpàk tok uya yeikuppù, “I'nailà pai là iyàssak pe iwechi ittu ina uya pùla man,” tukaik. ₈Molopai Jesus uya tok pàk wateppù, “Yekama uya pen nàlàichi sàlà ànùk yapàikketù yau là sàlà yamùk kupù uya,” teppù.

₉Màlàyau Jesus uya sàlà panton yekamappù kappon yamùk pàk. “Kàyik uya màlà umà pàmàppù molopai imainanpa woton kon yemyak itùlùppù ya, molopai nen uchi tùpata nàmàppù ya tachin pe. ₁₀Kùyali chi'nak itek pilittok yattai iwechi yau, tapyoto yeunokoppù ya màlà umà mainanpan nan piyak tùponalok woton ipilichak lùppù tonpa yepose. Tùse umà mainanpan nan uya itapyoto ippoppàtùppù molopai tok uya yeunokoppù yà'là là pùla. ₁₁Màlàpàk kàyik uya tùulon tapyoto yeuno tukkappù màlà, tùse mùkkàlà ippoppàtùppù tok uya, kuli'mak tok uya italumattàppù, molopai tok uya yeunokoppù yà'là là pùla làma. ₁₂Màlàyau icholùwano pe tapyoto yeuno tukkappù ya. Tok uya tu'ma àsà pe ikupùppù, molopai tok uya yenu'mappù. ₁₃Umà yesak uya, ‘Yà'là kasa sa' uchi wettoppe ko?’ teppù. ‘Umu wak u'nùn kulu teunokoik ta, tok uya nen ken uchi inama,’ teppù ya. ₁₄Tùse yensak tùuya'nokon yau umà mainanpan nan uselupappù ipàk, ‘Pùsàlà mùkkàlà itesak mumu. Iwàpai'nokon man molopai umà wettoppe kùponalok kon pe!’ teppù. ₁₅Màlàpàk tok uya yenu'mappù umà yapai molopai tok uya iwànàppù.

“Yà'là kupù nen ken uchi umà yesak uya, umà mainanpan nan winàkàik?” tukaik, Jesus uya tok yekamappoppù. ₁₆“Iyàpù màlà molopai mùkyamlo kàyik yamùk tùkka ya, molopai nen uchi tùulon kon umà mainanpan nan yemyak umà tùlù ya,” teppù Jesus uya. Sàlà yetasak tùuya'nokon yau kappon yamùk uya, “Tàwà ikupù ya pen màlà,” teppù. ₁₇Jesus uya tok yeneppù molopai tok yekamappoppù ya, “Yà'là te ken uchi sàlà Katù Maimu uya màlà, ‘Tàk tapùi yamùnnan nùnulunpappù italumayippù pe iwechi pàk, wenasak man iche kulu we'nàtoppe tùulon kon tàk yamùk yentai,’ tawon. ₁₈Tamù'nawolon kon tùwekkawai'masan màlà tàk pona, utakitukka màlà. Molopai tàk wekkawai'masak ànù'là pona yau, yeppakapù ya màlà ipla sululuk pe,” teppù Jesus uya.

₁₉Law pàk enupannan molopai paatele yamùk yepulu ton wechippù màlà Jesus anachipai. Masapùla sàlà panton yekamasak ya tùwinàkài'nokon ittusak tùuya'nokon pàk, tùse tok usenalipappù kappon yamùk pàk. ₂₀Màlàpàk yachitok tùuya'nokon yattai yeneiche tok wechippù. Kappon yamùk yeunokoppù tok uya màlà ailon pe tùwechi kon pe tukaik tok usennaka toppe. Jesus yachi tùuya'nokon pe tok uchittuppù yekamappopàttok yai, kopùna apàikkek molopai meluntà yemyak itùtoppe. ₂₁Pùsamlo elaik yamùk uya wateppù Jesus pàk, “Enupanài, ina nùttuyan euselupatok molopai enupantok auya wechi ikasa. Ina nùttuyan tùyiwalà kappon wettok, ittuiche pùla ewechi, tùse ailon pàk enupanài pe ewechi Katù wettok iche kappon ponaloppe pàk. ₂₂Ikasa ken na' màlà Caesar yemyak pùlayatta tùlù ina uya wechi, wapùla ikasa pùla?” tukaik. ₂₃Tùse Jesus uya tok usennakatok yawàlà yeneppù molopai tok pàk, ₂₄“Chilùpa pun yenpoikatàk kon uyemyak. Ànùk yenpata molopai ànùk yesek sàlà ipàk nai'nùk?” teppù Jesus uya. “Caesar,” tukaik tok uya imaimu yeikuppù. ₂₅Màlàpàk Jesus uya, “Waichi iwechi yau Caesar yemyak iponalok itùtàk kon molopai Katù yemyak iponalok tùlùkonpa,” teppù. ₂₆Iichelupatok yau tok uya yachi pùla iwechippù molo kappon yamùk yemloto po. Tok usenumenkasak wechippù, tùmaimu kon yeippàttok kon ya pàk, molopai epanna tok wechippù.

₂₇Sadducee tonpa yamùk weli'nàsak yau we'wuluukan pen màlà tawonnan uyàpùppù Jesus piyak yekamappoppàttok pokonpe. ₂₈“Enupanài, Moses uya màlà sàlà menukappù ina ponaloppe. ‘Kàyik welichak molopai tùnoppù nànsak ya imunkà pùla yau, mùkkàlà kàyik yakonùppù uya màlà tùlui noppù lùppù mali'ma, mule yamùk yepotoppe tùuya iwelichak lùppù munkà pe,’ tawon,” teppù tok uya. ₂₉Molo tok wechippù 7 pan kon echiyakonnon kàyik yamùk. Wapiyalok kàyik wemali'mappù, molopai iwelikùppù imunkà pùla. ₃₀Màlàyau nen uchi yakonùppù uya inoppù lùppù mali'mappù. ₃₁Molopai tok solùwano lùppù tu'ma, màlà kasa 7 pan kon wechippù tamù'nawàlà. Tok u'matùppù màlà imunkà pùla. ₃₂Àkàmlàk lùppù nossan nàlà welikùppù. ₃₃Iwelichak kon wuluukasak yattai ken ànùk noppù pe nen uchi iwechi? 7 pan kon uya imali'mapàssak tùse!” tukaik. _34-35Jesus uya tok yeikuppù, “Kàyik yamùk molopai nossan yamùk sàlà yattai nai'nan nùk mùkyamlo tùwemali'masan, tùse kàyik yamùk, molopai nossan yamùk tùwuluukasan yek pe nai'nan nùk weli'nàtok yapai, pata weyu nùyàssai'nùk yattai, tùwemali'masan pen mùkyamlo. ₃₆Inchelù yamùk walai nokon mùkyamlo, tùwelichan pen. Katù munkà yamùk, masapùla tok wuluukasak weli'nàtok yapai pàk. ₃₇Molopai Moses uya yekamasak màlà iwelichak kon we'wuluuka màlà weli'nàtok yapai tukaik. Molopai, tùuyassen yuk pàk Katù Maimu uselupatok yau ichelupasak man Itepulu pàk, ‘Abraham Katùyi, Isaac Katùyi, molopai Jacob Katùyi pe iwechi pàk,’ teppù ya. ₃₈Sàlà uyaichi yekama màlà nulà nan kon Katùyi pe iwechi, iwelichak kon pen, masapùla tamù'nawolon kon wechi màlà nulà ipona,” teppù ya. ₃₉Law pàk enupannan tonpa yamùk uselupappù, “Wakù pe wa mùkapàssaik, Enupanài!” tukaik. ₄₀Tùulon pe tukka enekamappopai pùla tok usenalipappù.

₄₁Jesus uya tok pàk, “Yà'là kasa ken uchi David mumu pe màlà Christ wechi, te tok uya? ₄₂Masapùla David uya, ‘Itepulu uya Uyepulu pàk, Chichiu pe ekkà sà motau ulaitannù winà. ₄₃Eyeyaton non tùlù uya atta yapon pe atta yokkoik tùse,’ teppù Psalms kaletayi yau. ₄₄David uyaichi màlà yesatùppù ‘Uyepulu,’ tukaik. Atta ken uchi Christ wechi David mumu pe?” teppù Jesus uya.

₄₅Tamù'nawàlà tukkan kon kappon yamùk uya teta tùse, Jesus uya ta'lon kon pàk wateppù. ₄₆“Elannek pe ettàk kon Law pàk enupan nan pàk. Asapai nokon mùkyamlo kusan tùpon kon yau. ‘Wakù pe na'messan?’ te tùnama kon pe iche tùwessan makiti tau. Wakù kulu aponnok yanùnnài nan mùkyamlo wepili'nàtok itak tau. Wakù nàlà patassek yanùnnài nan mùkyamlo uta'lettàntok yau. ₄₇Itayappù iwelichak lùssan patassek yama'man nan mùkyamlo. Kusan pe nàlà tùwàpùlemasan kappon yamùk uya neken tentok kon pe. Pùsamlo talumattàtok wechi màlà eke pe kulu,” tukaik nàlà ta'lon kon panattàppù ya.