Mark 4

₁Jesus weppyattàppù tok yenupa tukka pàk palau Galilee yena po. Ilinà pe kappon yamùk wepilichak wechippù màlà molo ipyak. Màlàpàk kanau yak iwenukuppù chichiupe. Palau po kanau wechippù màlà, tukkan kon kappon yamùk wechippù nen uchi màlà itena polo, Jesus yenu salù tok winàkàik. ₂Molo echii'ma, tok yenupappù ya tukke tùpatalo'nan pàk panton ke. Tok yenupa tùuya yau, ₃“Masa yetatàk kon! Tùwàppànsen kàyik utàppù àpànse. ₄Kùyali yek soloka ya umà yau tùse tùulon nà wessolokappù asanta yena polo. Màlàyau tolon yamùk uyàpùppù tok uya yeunoppàtùppù. ₅Tùulon nà wepukappù tàk pon non pona, non kulu pùla iwechi yak. Iwattappù lùkwà là màlà tùse ikkalatatok yau pùla iwechippù, masapùla i'nau pùla non wechi pàk. ₆Wei wa'mintappù a'nek pe màlà uya yaippùtankappù. Imik utàtok yawàlà pùla iwessak pàk. ₇Tùulon nà wepukappù àlittak. Iwattasak lùkkwà là tùse àlitta usemokkappù nàlà. Màlà uya yeulankappù. Iwepetappù pen nen uchi. ₈Tùulon kon wessolokappù màlà wakù non yak, iwenuttappù iwattappù iichemokkappù molopai iwepetappù wakù pe. Tewin itenapà inpàmàppù wepetappù tukke nen uchi, 30 pe kaichalà itepelu, tùulon wepetappù 60 pe kaichalà itepelu, tùulon wepetappù 100 pe kaichalà itepelu,” teppù. ₉Jesus uya tok pàk, “Yetatàk kon, tùpana ke ewechi kon yau, yetatàk!” teppù.

₁₀Tewincha Jesus nànsak ilinà kappon yamùk uya yau, tùulon kon uya yetasak uyàpùppù ipyak 12 kaichalon kon inenupa ton pokonpe. Màlàyau tok uya yekamappoppù panton pe tùnekamappù lùppù yekama toppe ya. ₁₁Jesus uya tok maimu yeikuppù, “Katù wettok itepulu pe wechi tonantau ittutok tùsak man apyakù'nokon. Tùse tùulon kon Katù wechi tepulu kon pe ittunan pen uya ittutok uyàpù màlà panton winà. ₁₂Sàlà yamùk wekkupùppù màlà, ‘Tok uya yentoppe tùse màlà tùnene kon ittu tok uya tukaik. Tok uya là yeta toppe, tùse màlà tùnetappù kon ittu tok uya tukaik, yensak molopai yetasak tok uya yau, tùmakuyi kon winàpai tok welattà eppaino sàlà molopai tok makuyi pàk Katù usentupa eppaino,’ tukaik.”

₁₃“Sàlà panton ittu auya'nokon pùla iwechi yau, yà'là kasa ken tamù'nawàlà tùulon ittu auya'nokon pe nai?” teppù Jesus uya tok pàk. ₁₄“Tùwàpànsen uya màlà Katù Maimu pàmà. ₁₅Tùulon kon nà kapon yamùk wechi màlà kùyali yek asanta yena polo iwessolokasak kasa Katù Maimu yetasak tok uya pe Settan, uyàpù màlà asse'ne Katù Maimu mokkase tok yewan yapai. ₁₆Tùulon kon nà wechi màlà tàk pon non yak iwessolokasak lùppù kasa Katù Maimu yeta tùuya'nokon yau tok uya yanàmà tewan kon yak tùutauchinpaik. ₁₇Wa iwechi pàk Katù Maimu wechi tok yewan yau tachinpe pen. Talumattàntok uyàssak yau tok uya inonka asse'ne. ₁₈Tùulon kon kappon yamùk wechi màlà àlittak iwessolokasak kasa. Katù Maimu yetanài nan uchi pùsamlo, ₁₉tùse tùwemattok pàk neken tok utaimelunpa, temamin ke eppai, pùlayattappe, tamù'nawà sàlà non pon kon yeselu iche tok wettok wepilipù tok yewan yak uya, itekale yeulanka. Màlàpàk tok wepeta pùla iwechi. ₂₀Tùse tùulon kon kappon yamùk wechi màlà wakù itùmun konekasak yak ipànsak kasa. Katù Maimu yeta tok uya. Yanùmù tok uya tewan kon yak. Tok wepeta nen uchi, tùulon 30 pe kaichalà, tùulon 60 pe kaichalà, molopai tùulon 100 pe kaichalà,” teppù Jesus uya tok pàk.

₂₁“Lanpu ne'nài nan na' amyamlo pùsau notak wapùla akkwak notak là, yapon pàk ku tùkaiwattàsen tà tùlenpankaik?” teppù Jesus uya tok pàk. ₂₂“Yà'làlà yonansak lùppù yenpoikanài màlà molopai iwaputtàsak lùppù weyuttànài molopai iwapukkai. ₂₃Yetatàk kon uchi, tùpana ke ewechi kon yau, yetatàk kon!

₂₄Eneta kon pàk esenumenkatàk kon, molopai enetappù kon ikuttàk kon! Àtonpa kon yeselu mùttuyatài'nàk kasa Katù uya nàlà eyeselu kon ittu, tùse àsà peiwa eyittu ya màlà. ₂₅Ànù'là yà'làlà yesak wechi yau, màlà yentak palà yepolo ya màlà tùse ipùn wechi yau, màlà mala lùkwà nai'nùk mokka màlà iwinàpai,” teppù ya tok pàk.

₂₆“Sàlà kasaichi màlà Katù wechi itepulu pe, kàyik yà'làlà yenappà soloka yai'nàk tù'mà yak kasa. ₂₇Ichapontà ewalupàttau, molopai iwe'wuluuka weinai tùnpàmàppù wenutta molopai iwatta tùse. Tùse yà'là kasa là iwatta, ittu ya pen kan màlà tà. ₂₈Màlà non yau ipànsak tùwattasen tùyiwalà. Iwatta wapiya, molopai iichemokka, iwepeta itepu pe neken. Molopai itepelu lùkkwà uyàpù màlà. Àkàmlàk lùppù nen uchi a'naik usenpoika màlà,” teppù Jesus uya. ₂₉“Iwappùsak yattai yattànài nan yeunoko ya màlà, tùkasupalayi ke'ne, yemeikatok yattai iwenasak yau,” teppù Jesus uya tok pàk.

₃₀“Yà'là kasa ken Katù wettok itepulu pe yekama kùuya'nokon. Wapùla yà'là yekkwa ken panton yekama kùuya'nokon Katù wettok itepulu pe yekamatok ipàkàlà pe?” teppù Jesus uya. ₃₁“Sà kasa iwechi màlà. Kappon uya là elekwà lùkwà kulu mustard itesek yenappà yepolo molopai ipàmà ya. Elekwà yà'là yekkwa là kùyali yenappà ma'lan. ₃₂tachinpe kulu pùla tùpo là iwatta màlà eke pe tamù'nawolon yà'làlà yek yentai. Eke ton pe ipanta. Màlàyau tolon utachi màlà ipona. Yale yo'no là nen uchi tùpon koneka ya màlà,” teppù Jesus uya.

₃₃Tukke panton yai Jesus uselupappù màlà tok uya ittu kaichalà. Tùulon itekale yekamappù ya màlà panton yai sàlà nai'nùk kasa. ₃₄Panton yai pùla là kappon yamùk yelupappù ya pen màlà. Tùse tùnenupa ton pàk neken nen uchi suwa te uya pe iwechi màlà tepàtùppù ya.

₃₅Màlà uko'mamù pe kulu, “Masa uklà'nàpai'nokon tuna latoi pona,” teppù ya tùnenupa ton pàk. ₃₆Màlàyau ilinà kappon yamùk nàmàppù tok uya. Inenupa ton wenukuppù kanau yak chichiu pe Jesus wettok yau yak. Molopai nen uchi tok utàppù. Tùulon kon nà kanau wechippù màlà molo. ₃₇Màlà yattai là eke pe asetun uyàpùppù. Chipachipa pe tuna yewonnùpùppù ya kanau yak. Iwanùpùiwappù tuna ke. ₃₈Tùse Jesus we'nùnsak wechippù kanau yaule yau tù'mùyeppà yessek po aittoupe. Tok uya yenpakappù. “Ina Yepulu, ina umata winàkàik là na' uchi iwechi tùse, ina pàk eusentupa pen màlà?” teppù tok uya Jesus pàk. ₃₉Jesus upakappù molopai iwà'mùssakkapù. Àsà pe assetun yekamappoppù ya. Molopai assetun weleutappù. Màlàyau chipachipa pàk, “Eichilà walà nechii,” teppù ya. Molopai chipachipa weleutappù. Tùtùi pe nen uchi. ₄₀“Yà'là pe ichi iwechi pàk mettalipayatàu? Ailon tetok auya'nokon pùla lùppù ka' messatàu lù? ” teppù Jesus uya tok pàk. ₄₁Tùse tok wettalipappù kulu màlà, “Ànù'là ken uchi pùsàlà kàyik? Assetun nàichi palau là wettok imaimu yawàlà!” teppù tok uya tùyiwalà'nokon.