Philippians 3

₁Molopai we'nonka pe nen uchi, utonpa yamùk, tàwàichi Itepulu elepai'nokon eke pe utauchinpantok ke. Tùusetakkasen pen Iulà màlà lùppù wapiya umenukappù lùppù menuka tu'ma uya pàk. Àpùikattà kon ya màlà ittu kon pa kulu. ₂Elanneppe ettàk kon mùkyamlo àli ton ku'nài nan pàk, mùkyamlo a'a yamùk walainon kappon yamùk, esak yattà màlà tawonnan. ₃Masapùla kùmyamlo mùkyamlo ipùkkù yattàsak kon kulu, Katù ponaloppe we'nà yekamanài pe Yakkwalù winà yapulàn nan molopai tùutauchinpasan Christ Jesus yau. Molopai kùyiwalà'nokon tùutapulàsan pen kùmyamlo kùnkupùppù kon pàk, molopai kappon yeselu pàk. ₄Màlà yekkwa pàk lànen utapulà eppaino. Ànù'là uchittu tùutapulàtok ipàkànsau yesappe tùse itentai upyau iwechi màlà. ₅Law yeselu yawà uyattàppù màlà 8 pe iku'nài wei yattai. Israel pon Iulà utamo winà, Benjamin kok, esukenan Hebrew. Màlàpàk Law winà Pharisee Iulà. ₆Law yawàlà kulu eppai wechippù màlà. Màlàyau ailon tawonnan Christ pàk talumattàppù uya màlà eke pe kulu. Tamù'nawolon Law kupùppù uya, màlàpàk iwalai pen pùla wechippù. ₇Tùse tamù'nawàlà màlà yamùk unepoloppù kasa unkupù tùkussaik yenu'masak kasa sàlà pe Christ pàkànsau. ₈Yà'làlà wakù, Christ Jesus Uyepulu tùttuyai'nùk walai pùn. Tamù'nawolon nonkasak uya sàlà. Molopai tenu'masen àlitta kasa ikupù uya, Christ neken nen uchi iche wechi. ₉Molopai iponaloppe wechi ittu uya. Law winà wakù pe ikasa wettok pàkànsau Katù uya uyanùmùppù pen màlà. Sàlà pe nen uchi wakù pe we'nàtok, ikasa, Katù winàpai teposen ailon tetok Christ pàk yai yesappe wessaik. ₁₀Christ neken ànùttupai wessaik molopai iwe'wuluukatok meluntàlù. Iwettalumattàppù pùkkù pe eppai wessaik molopai ikasa enapai iwelittok yau. ₁₁Enpen echii'ma, Iulà nàlà, uwuluuka toppe ya weli'nàtok yapai wema'nàtok yak.

₁₂Sàlà yau yenuka'nùssak uya man te uya pùla kan man tà, wapùla wakù pe kulu wenakassak pùla man. tùse unepolo lùppù molo man masapùla Christ Jesus uya uyachisak man. ₁₃Ewaik, utonpa yamùk, yepokassak uya pe uchittu pùla man. Tùse tewinannà ku'nài Iulà, màlà unpoi winà nai'nùk puttàka'nùpù uya molopai tamù'nawolon unùttu kupù uya uyemloto pon yepotoppe uya. ₁₄Màlàpàk tossalà aitunpe utàyaik teposen winàkàik. Uyepeppù, Katù uya kà'mantok Christ Jesus yai wema'nàtok epùn po, yepotoppe uya.

₁₅Tamù'nawolon kon uchi kùmyamlo ichemokkasak kon nùsenumenkaik tàwàlà sàlà kasa. Molopai yà'là yekkwa yau là tùpatalà eusenumenka kon yau, Katù uya yekama màlà àpàkù'nokon. ₁₆Tùse utànpai'nokon, màlà yepose utàn nai'nùk ye'ma tawàlà.

₁₇Utonpa yamùk, yentok ipàkàlà pe unkupùppù yawàlà ewechi kon iche wessaik. Molopai mùkyamlo màlà yentok ipàkàlà pe ina nùkupùppù àponalok kon pe yawàlà kulu nai'nannùk winàpai esenupatàk. ₁₈Wapiya sàlà yekamapàtùppù uya àpàkù'nokon echipalà, molopai sàlà pe tekamatu'mayaik uyenu palu kùlottawàlà. Tukkan kon nemassan Christ welikùppù pulusuk po yeyaton pe. ₁₉Tok utà màlà mattantok yak. Masapùla eke pe ata'lettàpai tok wettok màlà tok katùyi. Tùwekuli'matok kon yek làkku pàk tùutapulàsan mùkyamlo. Molopai sàlà non pon neken yà'là yamùk là, pàk tùusenumenkasan. ₂₀Tùse kùmyamlo mùkyamlo epùn pon ipata ton. Molopai Kùpùikattànài uyàpù miyàlàpai màmuku pàk kulu we'nà'nokon man, Itepulu Jesus Christ. ₂₁Attu'mùnon sa'ne kùyesak kon mùyakanma ya màlà. Molopai kùkoneka kon ya wakù pe tesak kasa, meluntà yapulà pe tamù'nawolon nettok tùuya iwinà pe nai'nùk itepulu pe tùwettok yo'nokoik