Asa'lon Kon Ekamannan
1Ittutok ike yei ke ulepappù màlà, tekessen walai ke, molopai yekamappù upàk: “E'wuluukakà molopai Katù yùwùk ittukà molopai Katù ponalok pottàtok patassek, molopai yà'là kaichalà là mùkyamlo Katù yùwùk tau yapulànnan wechi ittukà,” teppù màlà upàk. 2“Tùse polopo Katù yùwùk woi mùnàmàik. Kichittui, masapùla itùsappe iwechi nai'nùk Jew yamùk pen yemyak. Pùsamlo uya wakù patassek, Jerusalem, wasappàtù màlà 42 pe kapùi. 3Asa'lon kon uyekamanan yapàikketù ke tok lepa uya màlà. Tok wepontàsak wechi màlà usewankono'man yattaino pon yak, molopai Katù yekale yekama tok uya màlà 1,260 pe wei,” teppù màlà upàk.
4Asa'lon kon ekamannan yamùk màlà asa'lon olive yek yamùk molopai asa'lon lanppu yamùk satippe non yepulu Katù yemlotopo tùwessan. 5Ànù'là wechi tok talumattàiche yau, apok tùwepakkasen tok mùtapai, molopai teyaton kon mattanù'nàinan mùkyamlo, molopai sàlà kasa là ànù'là tok talumattàiche tùwessen wànà màlà. 6Tapàikketù kenan kon mùkyamlo kak yakkotoppe, konok pùla iwettoppe Katù Maimu yenpoika tùuya'nokon yawàlà. Tapàikketù kenan kon nàlà mùkyamlo tuna yamùk yepoi, mùn pe iwenatoppe. Molopai non pona yà'là yekkwa ton nà palan nettok tok uya ike, ànkuppai tùwettok kon kasa.
7Tùnekama kon yekamakassak tok uya yau, àsà ene tùuyàssen i'nawon iteuta yapai uya tok panta'ma màlà. Tok yentaika ya màlà molopai tok wànà ya. 8Molopai tok yàkàpù wechi màlà eke pata yawon asantau, tok Yepulu pukapàtùppù pulusuk pona motau. Màlà pata yesek màlà Sodom molopai Egypt nekama walai. 9Kappon yamùk ànùk yekkwa ton nà, tamù'nawolon kon pata kok yapaino kon, tùpatalo'nan mayin yapaino kon, molopai kappon yamùk pata yamùk yawolon kon, uya tok yàkàpù yene màlà àsolùwau wei. Molopai iwemassappe inakattapailà wei wena tepose. Molopai là tok wu'nattàtoppe tok uya ikupùppù pen. 10Kappon yamùk non pon kon utauchinpa màlà pùsamlo asa'lon kon welichak pàk. Panappe tok wechi màlà molopai lepantok yeunoko tok uya màlà, mùklà uya tùulon piyak tukaik, masapùla mùkyamlo Katù Maimu yenpoikannan uya eke pe kulu wettalumattàntok nessak non pon kon kappon yamùk pona pàk. 11Màlà tùpo, àsolùwau wei molopai iwemassappe inakattapailà wei wenatok yattai we'netukantok uyàpùppù màlà Katù winàpai molopai tok yak iwewomùppù. Molopai tok we'wuluukappù, tamù'nawolon kon tok yennài nan nùssan wettalipappù kulu màlà. 12Màlàyau asa'lon kon Katù Maimu yenpoikannan uya eke mayin yetappù epùn poi tùpàkù'nokon wate ya, “Enuttàk kon sàlà motak!” teya. Teyaton kon uya yene tùse tok wenukuppù katuppluk yau epùn pona. 13Màlà yattai là àsà pe kulu tùlùpùnù wechippù molo, ipùkkù pe là 1/10 pe pata umattappù màlà, molopai tamù'nawàlà tùlùpùnù nùtùkkassan kappon yamùk wechippù 7,000 pe. Tok tonpassan wettalipasak wechippù kulu molopai epùn pon Katù wettok eke pe yapulàppù tok uya.
14Yakon àsà talumattàntok nenukappàsan, tùse yenkà! Icholùwano àsà talumattàntok uyàpù màlà tachin pe kulu tùpo pùla.
7 Pe Iku'nài Paka Letù Walai Wai
15Màlàyau 7 pe iku'nài inchelù uya tùwayi tàulùnpappù, molopai eke pe mayin yamùk uya epùn poi,
“Itepulu pe we'nàtok non pon kon yepoi Kùyepulu kon Katù molopai ineunokoppù Christ ponaloppe nen uchi man, molopai itepulu pe iwechi màlà tàwàlàlà molopai tàwàlàlà!” teppù.
16Molopai nen uchi 24 pan kon eke ton tùnamasan, chichiu pe tùwessan tapon kon po Katù yemlotopo wepeimappù tenpata kon po, molopai Katù yapulàppù tok uya,
17“Tenki nùkayan ina àpàk Itepulu Katù Meluntà, Mùkkàlà sàlà pe nai'nùk molopai iwechippù nai'nùk! Masapùla eke emeluntàlù yapulàsak auya pàk, molopai ewepyattàsak man itepulu pe ewechi pàk! 18Pata yamùk wolù yawon kon wanùssak wechippù we'naikantok ke. Masapùla ewe'naikatok uyàssak man, molopai iwelichak kon ittutok yattai. E'mantok tùtok auya yattai amaimu yenpoikannan ayapyoto yamùk yemyak. Molopai tamù'nawolon kon kappon yamùk àponalok kon, eke ton molopai echikili ton, tamù'nawolon kon anamannan yemyak. Non mattanù'nài nan mattanùttok yattai man!” tukaik.
19Katù yùwùk epùn pon utakkokasak wechippù, molopai wakù ikupù tùuya tetok Katù uya yen useneppù Katù yùwùk tau. Màlàyau pata wekamlipù yakkwayi wechippù molo, yà'làlànan tàwù, wala'napi wettoippàtù, tùlùpùnù molopai tukke eme'nek ton tuna pun.
