Revelation 20

₁Màlàyau inchelù uttà epùn poi yeneppù uya, i'nauwon iteuta kiyi molopai eme'nek aulonnàtok ayan pun yapai ikonekasak itemyau. ₂Ulupelu, mùkkàlà penalok àkài Tepùlù, wapùla Settan yachippù ya molopai yaulonsak ya wechippù 1000 pe kilichimochi. ₃Inchelù uya yenu'mappù màlà i'nauwon iteuta yak. Yakkoloppù ya molopai ikiyittàppù ya sa'man pe, kappon yamùk pata yamùk non pon yawolon kon yennaka tu'ma ya tukaik 1000 pan kilichimochi wenukapù ponalà. Màlà tùpo inonka màlà mala là.

₄Màlàyau aponnok yamùk yeneppù uya, molopai mùkyamlo chichiu pe ipo tùwessan, tok lepasak wechippù meluntà ke ittuntoppe tok uya. I'mùlùkàssak kon yakkwalùppù yamùk yeneppù uya màlà masapùla ailon Jesus nenpoikappù molopai Katù Maimu yekamasak tok uya pàk. Àsà ene wapùla ikasa ikonekasak yapulànnanùssan pe pùla tok wechippù màlà wapùla àsà ene uya pattàntok yeposak tok uya pùla iwechippù tùpeyeppà kon pàk wapùla temyatù kon pàk. Tok wemapùppù molopai kin yamùk pe tok wechippù Christ pokonpe 1000 pe kilichimochi. ₅(Iwelichak kon tonpassan uyàpùppù wema'nàtok yak pen 1000 pan kilichimochi wenukapù ponalà.) Sàlàichi màlà wapiyalok iwelichak kon wuluukatok. ₆Tùutauchinpasan molopai esukenan kon mùkyamlo wapiyalok weli'nàsak wuluukatok pùkkù pe tùwessan. Yakon itekkwa pe weli'nàtok meluntàlù pùla iwechi màlà tok yepoi, paatele yamùk pe tok wechi màlà Katù ponaloppe molopai Christ ponaloppe nàlà. Molopai tok wechi itepulu pe màlà ipokonpe 1000 pe kilichimochi.

₇1000 pan kilichimochi wenukassak tùpo, Settan yaulonka màlà yachitok yapai. ₈Molopai iità màlà tamù'nawàlà pata yawon kon non po iwetta'nùssak kon yennakase, Gog molopai Magog tawon. Settan uya màlà tok nepù tamù'nawàlà tamùkke epanta'mase, wepanta'mantok yak, tukke wàssàk palau yena pon kasa. ₉Tok wetta'nùpùppù màttawàlà non po molopai Katù ponalok kon kappon yamùk patassek woinottàppù tok uya molopai pata tù'nùn pe inkupù, Jerusalem. Tùse apok uttàppù màlà epùn poi molopai tok mattanùpùppù ya. ₁₀Màlàyau Makui tok yennakanàippù, yenu'mappù màlà eke kulu apok molopai kulupala kasa tùkà'nùnsen yak, àsà ene molopai iwalai pen itekale yekamanàippù tawonnan yenu'mappù yak, molopai tok talumattà màlà weinai molopai ewalupàttau tàwàlàlà molopai tàwàlàlà.

₁₁Màlàyau eke aimu'nan aponnok yeneppù uya molopai ipo chichiu pe tùwessen. Non molopai kak tawon wepeppù iwinàpai molopai ichentu'mappù pen. ₁₂Molopai yeneppù uya iwelichak kon lùssan eke ton molopai echikili ton, ekkaichalà, satippe aponnok yemloto po. Kaleta yamùk yakkokasak wechippù, molopai tùulon kaleta yakkokasak wechippù, wema'nàtok kaletayi. Iwelichak kon ittuppù màlà tok nùkupùppù yawàlà imenukasak kaleta yamùk yau pàkàlà. ₁₃Màlàyau palau uya iwelichak kon yenpakkappù tùkapai. Weli'nàtok molopai iwelichak kon patassek uya iwelichak kon tùnachippù kon yenpakkappù. Molopai tamù'nawolon kon ittuppù màlà tewinpàk tok nùkupùppù yawàlà. ₁₄Màlàyau weli'nàtok molopai iwelichak kon patassek yenu'mappù màlà eke kulu apok wettulukasak yak. Sàlà apok tùuyassen yen màlà yakon itekkwa pe weli'nàtok. ₁₅Ànù'là itesek imenukasak pen wema'nàtok kaletayi yau, yenu'mappù màlà eke kulu apok wettulukasak yak.