1Màlàyau 5 pe tok ku'nài uya tùwayi tàulùnpappù. Chilùkà iwepukasak kak poi non pona yeneppù uya, ilepasak wechippù i'nawon iteuta kiyikkatok ke. 2Chilùkà uya i'nawon iteuta kiyikkasak yau ikelechin wepakkappù màlà yapai, eke apok patassek yapai apok kelechin kasa. Wei yakkwayi molopai kak wewalumamùppù ewalupà pe apok kelechin i'nawon iteuta yapaino ke. 3Kailau yamùk wepakkappù apok kelechin yapai non pona, molopai tok meluntàlù ke tok lepasak wechippù malità yamùk non pon kon kasa tok wettoppe. 4Wanak mattanùpù tok uya tukaik yekamappù màlà, wapùla yuk, wapùla yà'là yekkwa là yei molopai yà'là yek là. Mùkyamlo kappon yamùk ipattàsak kon Katù winàpaino tok yentok ipàkàlà ke tok peyeppà pàk pùnon neken mattanùttoppe tok uya. 5Kailau yamùk kupùppù màlà pùsamlo kappon yamùk wànà tok uya tukaik, tùse tok talumattàtoppe neken tok uya 5 pe kapùi. Talumattàntok tok uya wechippù màlà malità uya chipponsak kasa. 6Màlà yattai mùkyamlo kappon yamùk uya weli'nàtok iwa màlà, tùse tok uya yepolo pen. Elippai tok wechi màlà, tùse weli'nàtok wepe màlà tok winàpai.
7Kailau yamùk useneppù màlà kawale yamùk wekonekasak wepanta'mantok ponaloppe kasa, tok ippai po alok kolù yapai ikonekasak yeselùkan ton wechippù, molopai tok yenpata wechippù kappon yamùk yenpata kasa. 8Tok mùsek wechippù ulichamichi mùsek kasa, tok yà wechippù palauya yà kasa. 9Tok pùlopo waputtàsak wechippù sa'man ayan konekasak pùlopo wapu ke, molopai tok yapàli tàwùppù tukkan kanau kawale yamùk nùpàlàka tùusemittàpase wepanta'mantok yak tàwù kasa. 10Taukù ke tok wechippù molopai chipponài pe, malità uya chippontok yekkwa. Taukù kon ke kappon yamùk talumattàtok 5 pe kapùi kaichalà meluntàlù yesappe tok wechippù. 11Eke kin yesappe tok wechippù tepoi'nokon, mùkkàlà inchelù i'nauwon iteuta yennài. Hebrew maimu yau itesek màlà Abaddon, Greek maimu yau Apollyon, (“Mattanù'nài” teya pe iwechi).
12Wapiyalok àsà talumattàntok wenukapùppù, sàlà ye'mappùtak asa'lon nùppù àsà talumattàntok molo man tùuyàpù woton.
13Màlàyau 6 pe iku'nài inchelù uya tùwayi tàulùnpappù. Mayin uyàpù kolù Katù ponaloppe tùtùsen pottà yapon Katù yemlotopon pana'mu asakùlà'nan winàpai yetappù uya. 14Mayin uya 6 pe iku'nài inchelù paka letù walai yesak pàk, “Asakùlà'nan kon inchelù yamùk inonkakà eke tuna Euphrates motau yachichak kon!” teppù. 15Asakùlà'nan kon inchelù yamùk nonkappù màlà, tok wekonekasak wechippù màlà sàlà ponaloppe, sàlà pata weyu yattai, sàlà kapùi yattai, molopai sàlà kilichimochi pàk, itonpa pe kappon yamùk wàtoppe tùuya'nokon 1/3 pe tamù'nawolon kon kùlottapai. 16Yà'là kaichalà là kawale pon kon tùwepanta'masan wechi yekamappù màlà upàk: 200,000,000 pe tok wechippù. 17Molopai we'neppàtok walai yau kawale yamùk molopai tok pon kon yeneppù uya. Tok pùlopo wapu wechippù ichuweyu pe apok kasa, tùtalilen tàk epekkek sapphire kasa, molopai kalakkwappan sulfur kasa. Kawale yamùk ippai wechippù màlà palauya ippai kasa. Tok mùta yapai apok wepakkappù, ikelechin, molopai sulfur. 18Tamù'nawolon kon kappon yamùk kùlottapai (1/3) pe tok tonpa yamùk tùkkappù màlà, àsolùwawon matta'nùnàtok ke, apok, ikelechin molopai kulupala walai ikà'nùnsak tawon wepakka kawale yamùk mùta yapai ke. 19Masapùla kawale yamùk meluntàlù wechippù màlà tok mùta yau molopai tok yaukù yau nàlà. Tok yaukù yamùk wechippù àkài yamùk kasa, tùppai ke'ne, molopai màlà yamùk yapulàppù tok uya kappon yamùk mattanùttoppe tùuya'nokon.
20Tok tonpassan apok, ikelechin molopai sulfur ke iwàsak kon pen, welattàppù pen màlà tùnkonekappù kon winàpai. Àli akkwalù pàk, molopai ikonekasak kon katù yamùk, kolù yapai, chilùpa, kalukuli walai, tàk, molopai yei yapai. Yà'làlà yennài nan pen, wapùla yà'làlà yetan nan pen, wapùla tùusasan pen pàk tùwepeimatok kon yeleutanùpùppù tok uya pen. 21Wàntok tùuya'nokon nonkappù tok uya pen nàlà, tipiyassanù kon nà, àli imakuyippù kuttok tùuya'nokon tesak kon ke nossan yamùk pokonpe wapùla kàyik yamùk pokonpe, wapùla amappe tùwettok kon nonkappù tok uya pen.
