1 Korinte 14

₁Un mus du ala muiti fu kan abi lobi gi makandra. Un mus du muiti tu fu kisi den presenti fu a Yeye, èn spesrutu a presenti fu kan taki san Gado gi yu fu taki. ₂Bika efu wan sma e taki ini wan tra tongo, dan a no e taki nanga sma ma nanga Gado, fu di no wan sma e ferstan en. A Yeye e meki a taki kibri sani. ₃Ma efu wan sma e taki san Gado gi en fu taki, dan a e taki nanga sma. A e yepi den fu gro ini a bribi, a e kraka den, èn a e trowstu den. ₄A sma di e taki ini wan tra tongo, e yepi ensrefi wawan fu gro ini a bribi. Ma a sma di e taki san Gado gi en fu taki, e yepi a gemeente fu gro. ₅Mi ben sa wani taki un alamala e taki ini tra tongo. Ma moro ete mi ben sa wani taki un ben e taki san Gado gi un fu taki. A sma di e taki san Gado gi en fu taki prenspari moro a sma di e taki ini tra tongo, boiti efu a sma disi e brokobroko san a taki, fu yepi a gemeente gro ini bribi.

₆Brada nanga sisa, efu mi kon now na unu, dan mi taki ini tra tongo, fa mi yepi un dan? Mi kan yepi unu soso te mi taki san Gado sori mi, te mi taki nanga sabi, te mi taki san Gado gi mi fu taki, noso te mi gi un wan leri. ₇So a de tu nanga sani leki wan froiti noso wan gitara. Den no e libi, ma yu man arki den te sma e prei den. Ma efu sma no e prei den na difrenti fasi, fa wan sma o man sabi dan sortu singi den e froiti noso prei? ₈Efu a sma di e bro a tutu no e bro en bun, dan fa sma o sabi taki den mus meki densrefi klari fu go feti? ₉Na so a de nanga unu tu. Efu un no e taki wan tongo san sma e ferstan, fa den o sabi san un e taki? Dan na fu soso yu e taki. ₁₀Someni sortu tongo de na grontapu, èn alamala de fu ferstan. ₁₁Ma efu mi no e ferstan san a sma e taki, dan mi nanga a sma na doroseisma gi makandra. ₁₂Na so a mus de tu nanga unu. Fu di un e du muiti fu kisi den presenti fu a Yeye, a moro prenspari sani na taki un e wroko nanga den presenti di e yepi a gemeente gro.

₁₃Dat' meki te wan sma e taki ini wan tra tongo, a mus begi Gado fu yepi en fu man brokobroko gi tra sma san a taki. ₁₄Bika efu mi e begi na ini tra tongo, mi e begi nanga mi yeye, mi ferstan no e teki prati na ini. ₁₅Fa sani mus de dan? Mi o begi nanga mi yeye, ma mi o begi nanga mi ferstan tu. Mi o singi nanga mi yeye, ma mi o singi nanga mi ferstan tu. ₁₆Efu un e prijse Gado nanga un yeye, a nyun sma na un mindri no sa man taki “Amen” te un taki Gado tangi. Bika a no ferstan srefsrefi san un taki. ₁₇Un e taki Gado tangi tapu wan bun fasi, ma un no e yepi a tra sma fu gro ini a bribi. ₁₈Mi e taki Gado tangi tak' mi e taki ini tra tongo moro un alamala. ₁₉Ma ini a gemeente mi feni en moro bun te mi e taki feifi wortu san sma e ferstan fu gi trawan leri, dan fu taki dusundusun wortu ini wan tra tongo.

₂₀Brada nanga sisa, un no mus denki leki pikin moro, ma un mus denki leki bigisma. Efu na fu du ogri, un mus de leki wan nyunyun pikin. ₂₁Na ini a wèt a skrifi taki: “Nanga sma di e taki wan tra tongo èn nanga a mofo fu doroseisma, Mi o taki nanga a pipel disi. Ma toku den no o arki Mi. So Masra e taki.” ₂₂Fu dat'ede a taki ini tra tongo no de wan marki gi sma di e bribi, ma gi sma di no e bribi. Ma fu taki san Gado gi yu fu taki, no de gi sma di no e bribi. A de gi den bribisma. ₂₃Kon un taki a heri gemeente kon makandra èn ala sma e taki ini tra tongo. San o psa dan te nyun sma noso sma di no e bribi kon inisei? Den o taki tak' na law un e law. ₂₄Ma efu un alamala e taki san Gado gi un fu taki, dan wan sma di no e bribi noso wan nyun sma kon inisei, dan un alamala o meki a kon ferstan taki a abi sondu. Un o sori en fa a de. ₂₅Den sani san kibri ini en ati, o kon na doro. Dan a o kindi, anbegi Gado èn a o taki tak' Gado de trutru na un mindri.

₂₆Brada nanga sisa, arki fa sani mus waka. Te un kon makandra, dan ala sma abi wan sani. A kan de wan psalm-singi, wan leri, noso wan sani di Gado sori wan sma. Kande wan sma abi wan sani ini tra tongo, noso kande wan sma wani brokobroko wan sani di taki ini tra tongo. Ma ala den sani disi musu psa fu meki den bribisma gro ini bribi. ₂₇Te sma e taki ini tra tongo, a mus de tu noso dri sma nomo. Den mus taki wan fru wan èn wan sma mus brokobroko san den taki. ₂₈Ma efu no wan sma de drape di man brokobroko san den taki, dan den mus hori den mofo na ini a konmakandra. Meki den taki ini densrefi èn nanga Gado. ₂₉Meki tu noso dri profeiti taki san Gado gi den fu taki. Dan den trawan mus arki bun fu si efu san den sma e taki tru. ₃₀Ma efu Gado sori wan tra sma di sidon drape wan sani, dan a sma di ben e taki mus tan tiri. ₃₁Bika na wan fru wan un mus taki san Gado gi un fu un taki, fu ala sma kan leri wan sani èn kisi dek'ati. ₃₂Den profeiti na basi abra san Gado e gi den fu taki. ₃₃Bika Gado no e wroko bruya fasi. A de wan Gado fu freide. Soleki fa a de na ala den tra gemeente fu den sma fu Gado.

₃₄Den umasma mus hori den mofo ini a gemeente. Den no abi primisi fu taki. Den mus saka densrefi soleki fa a wèt e taki. ₃₅Efu den wani sabi wan sani, den mus aksi den masra a sani dati na oso. Bika a no moi taki wan uma e taki na ini gemeente.

₃₆Un denki taki a wortu fu Gado ben bigin na unu drape, noso taki na unu wawan ben yere en? ₃₇A sma di feni taki en na wan profeiti noso wan sma di a Santa Yeye e tiri, mus man agri taki den sani di mi skrifi dya na sani di Masra wani taki wi musu fu du. ₃₈Ma a sma di poti san mi taki na wan sei, sma o poti na wan sei tu. ₃₉Fu dat'ede, mi brada nanga sisa, un mus du ala muiti fu kan taki san Gado gi un fu taki, ma un no mus tapu pasi gi den sma di e taki ini tra tongo. ₄₀Meki ala sani psa wan lespeki fasi, leki fa a fiti.