1 Korinte 16

₁Now wi o taki abra a moni san un e piki fu yepi den sma fu Gado. San mi taigi den gemeente fu Galasia fu den du, na dati unu srefi mus du tu. ₂Ala fosi dei fu a wiki iniwan sma mus poti moni na wan sei. A mus poti san a man fu poti. Dan a mus kibri en. Bika a no mus de so taki na te mi doro fosi un o piki a moni. ₃Te mi doro mi o gi brifi na den sma di un e fertrow. Dan mi o seni den fu tyari a moni fu unu go na Yerusalem. ₄Efu a de fanowdu fu mi go tu den sa go makandra nanga mi.

₅Te mi psa ini Masedonia mi o kon na unu. Bika na ini Masedonia mi o hari psa. ₆Ma mi wani tan na unu pikinso moro langa. Kande mi e tan a heri kowruten fu a yari srefi. Dan un kan yepi mi te mi mus go moro fara. ₇Mi no wani taki na te mi e psa fu go moro fara, ne mi kon luku unu. Ma efu Masra wani, dan mi wani tan wan pisten nanga unu. ₈Ma now mi o tan na Efese te go miti a Pinksterfesa. ₉Bika wan bigi doro opo dyaso gi mi èn furu okasi de. Ma furu sma e pruberi fu tapu pasi gi mi tu.

₁₀Te Timoteus kon na unu, un mus sorgu taki a e firi ensrefi na oso na un mindri. Bika a e wroko gi Masra neleki mi. ₁₁Dat' meki no wan sma mus si en leki noti. Ma un mus yepi en fu a go moro fara nanga freide, fu a kan drai kon baka na mi. Bika mi nanga den tra brada e ferwakti en baka. ₁₂Fu taki fu brada Apolos. Furu leisi mi begi en fu kon na unu makandra nanga den tra brada. Ma a no ben wani kon nownow. Ma a o kon te a kisi a okasi.

₁₃Un mus tan na ai! Un tan tnapu tranga na ini a bribi, no frede, hori dek'ati. ₁₄Ala sani san un e du, un mus du nanga lobi.

₁₅Un sabi Stefanas nanga den sma fu en oso. Den na den fosi sma fu Akaya di teki bribi. Den teki en leki den wroko fu yepi den sma fu Gado. Dat' meki mi e begi unu, brada nanga sisa, ₁₆fu un saka unsrefi gi den sortu sma disi, nanga gi trawan di e du a wroko tu èn di e wroko tranga. ₁₇Mi breiti taki Stefanas, Fortunatus nanga Akaikus kon. Bika fu di unu no man de dya, meki den teki un presi. ₁₈Den meki mi nanga unu srefi firi bun. Un mus fu sori den tak' un breiti nanga san den e du.

₁₉Den gemeente fu Asia seni taki un odi. Akwila nanga Prisila nanga a gemeente di e kon makandra na den oso, seni bigi odi gi unu ini Masra. ₂₀Ala den brada nanga sisa seni taki un odi. Un mus taki makandra odi nanga wan santa bosi.

₂₁Mi Paulus seni taki un odi tu. Nanga mi eigi anu mi skrifi disi. ₂₂Wan fluku de na tapu a sma di no lobi Masra. Maranata! ₂₃Meki a bun-ati fu Masra Yesus de nanga unu. ₂₄Mi lobi un alamala, fu di un alamala de wan nanga Kristus Yesus.