1 Korinte 6

₁Fa wan fu unu kan go suku leti na den sma di no bun ini Gado ai, efu a abi wan sani nanga wan trawan? Fu sanede a no e go na den sma fu Gado? ₂Na sabi un no sabi taki na den sma fu Gado o krutu den sma na grontapu? Èn efu na unu o krutu grontapu, dan un mus sabi tu fa fu krutu den pikinpikin sani disi. ₃Un no sabi taki wi o krutu den engel? San na den aladei sani disi dan? ₄Dan fa un kan meki sma di no abi noti fu taki ini a gemeente krutu den aladei sani fu unu? ₅Mi e taki disi fu un firi syen. Na abi un no abi no wan sma na un mindri di abi a koni fu koti wan krutu mindri tu brada? ₆Ma, nono! A wan bribisma e tyari wan trawan go fu suku leti na sma di no e bribi ini Gado. ₇Efu a wan e tyari a trawan go na krutu, dan un lasi a heri tori kba. A no moro betre efu den e du un kruktu? A no moro betre efu den e bedrigi unu? ₈Prefu dati, unu srefi e du kruktu, unu srefi e bedrigi trawan. Un e du en nanga un eigi brada nanga sisa ini bribi. ₉Na sabi un no sabi taki sma di e du kruktu no o kon ondro a tiri fu Gado? No kori unsrefi. Sma di e gi densrefi abra na takru lostu, sma di e dini kruktu gado, sma di e huru, den man di e seri den skin gi tra man, den man di e go nanga tra man na bedi, fufuruman, sma di gridi fu moni, ₁₀drunguman, sma di e taki takru fu trawan, nanga bedrigiman no o kon ondro a tiri fu Gado. ₁₁Sonwan fu unu ben du den sani disi. Ma ini a nen fu Masra Yesus Kristus èn nanga a Yeye fu wi Gado, un wasi krin, un tron sma fu Gado, èn un kon bun ini Gado ai.

₁₂Unu e taki: “Mi kan du san mi wani.” Iya, ma a no ala sani bun fu du. Mi kan du san mi wani, ma mi no o meki no wan sani tron mi basi. ₁₃Nyanyan na fu a bere, èn a bere na fu a nyanyan. Ma Gado o tyari wan kba na ala tu sani. A skin no meki fu yu gi yusrefi abra na takru lostu: a skin na fu Masra èn Masra na fu a skin. ₁₄Gado no meki Masra wawan kon na libi baka, ma nanga En krakti A sa meki wi kon na libi baka tu. ₁₅Na sabi un no sabi taki un skin na wan pisi fu Kristus? Mi no sa teki wan pisi fu a skin fu Kristus fu meki a kon tron wan pisi fu a skin fu wan motyo. Kwet'kweti! ₁₆Na sabi un no sabi taki a sma di e hori nanga wan motyo e tron wan skin nanga en? Bika Gado taki: “Den tu sma sa kon tron wan enkri skin.” ₁₇Ma efu wan sma e tan hori na Masra, dan yeyefasi a de wan nanga Masra. ₁₈Un mus hori unsrefi fara fu takru lostu. Bika no wan tra sondu san wan sma e du, e pori en skin. Ma efu yu e gi yusrefi abra na takru lostu, yu e pori yu eigi skin nanga a sondu dati. ₁₉Un no sabi taki un skin na wan santa presi fu a Santa Yeye di e libi ini unu? Na Gado gi unu a Santa Yeye. Un no de fu unsrefi moro. ₂₀Gado ben bai unu èn A pai gi unu. So un mus gi Gado glori nanga un skin.