A trowlibi
1Now wi o taki fu den sani fu san un skrifi mi: Un feni taki a bun efu wan man no e go na bedi nanga wan uma. 2Ma fu di sma e gi densrefi abra na takru lostu, meki ibri man mus abi en eigi uma èn ibri uma mus abi en eigi masra. 3A man mus du en bedi plekti gi a uma, èn a srefi fasi a uma mus du en bedi plekti gi a man. 4A no a uma e taki san e psa nanga en skin, ma na en masra. A srefi fasi a man no e taki san e psa nanga en skin, ma na en uma. 5Efu a trawan wani go nanga yu na bedi, no taki no, boiti efu un ben meki mofo tak' un no o go na bedi nanga makandra fu wan pisten, fu di un wani teki ten fu begi. Ma baka dati, un mus go nanga makandra na bedi, fu un no gi Satan a okasi fu seti wan trapu gi unu fu di un no ben man hori unsrefi. 6San mi e taigi unu a no wan musu, ma na yepi mi wani yepi unu. 7Mi ben winsi taki ala sma de leki fa mi de. Ma ibri sma kisi en eigi presenti fu Gado. A wan kisi a presenti disi, a trawan a presenti dati.
8Mi wani taigi den sma di no trow, èn den uma di masra dede kba, taki a ben o bun gi den efu den tan leki mi. 9Ma meki den trow efu den no man hori densrefi. Bika a moro betre fu trow, dan fu e waka nanga tranga lostu.
10Te sma trow kba, dan a uma no kan prati nanga en masra. Disi a no mi e taki, ma na Masra srefi e komanderi den. 11Ma efu a uma prati nanga a man, dan a mus tan sondro masra, noso en nanga en masra mus kon bun baka. Wan man no kan prati nanga en uma tu.
12Mi wani taigi den tra sma wan sani. A no Masra e taki en, ma na mi srefi e taki: Efu wan brada trow nanga wan uma di no de wan bribisma, dan a no kan prati nanga en efu a uma wani tan libi nanga en. 13Èn efu wan uma trow nanga wan man di no de wan bribisma, dan a no kan prati nanga en efu a man wani tan libi nanga en. 14Bika a man di no e bribi, kon santa tu fu en uma ede, èn a uma di no e bribi, kon santa tu fu en masra ede. Efu a no ben de so, dan den pikin fu unu no ben o krin tu. Ma now den kon santa. 15Ma efu a sma di no e bribi wani gwe, meki a gwe. A no de wan musu gi a brada noso a sisa fu tan nanga a trawan. Gado kari unu fu libi ini freide. 16Uma, yu no man sabi efu yu o man meki yu masra kon na bribi. Man, yu no man sabi tu efu yu o man meki yu uma kon na bribi.
Tan fa yu ben de
17Ibri sma mus hori ensrefi na a presi di Masra gi en ini a libi. Èn a mus tan fa a ben de di Gado kari en. Disi mi e taigi den bribisma fu ala den gemeente fu du. 18Efu yu ben besnei di Gado kari yu, no go pruberi fu kenki a sani disi baka. Efu yu no ben besnei di Gado kari yu, tan so. 19Bika a no wani taki noti efu yu besnei noso efu yu no besnei. San e teri na efu yu e hori yusrefi na san Gado taki tak' yu mus du. 20Meki ala sma tan fa a ben de di Gado kari en. 21Efu yu ben de wan srafu di Gado kari yu, dan yu no mus meki a sani dati trobi yu. Ma efu yu abi a okasi fu kon fri, yu mus teki a okasi tu. 22Bika a sma di ben de wan srafu di Masra kari en, na wan fri sma fu di en na fu Masra. Na a tra sei a de so taki a sma di ben fri di Gado kari en, na wan srafu fu Kristus. 23Gado ben bai unu èn A pai gi unu. Dat' meki un no mus tron srafu fu libisma. 24Brada nanga sisa, meki ibriwan tan gi Gado san a ben de di Gado kari en.
Gi den sma di noiti trow ete
25Den sma di noiti no trow ete mi wani taigi disi. A no de wan sani san Masra e komanderi. Ma leki wan sma di de fu fertrow fu di Gado sori mi sari-ati, mi wani taigi unu san mi e prakseri. 26Fu di someni nowtu de na ini a ten pe wi e libi now, meki a moro betre taki wan sma no trow. 27Efu yu trow, yu no mus suku fu prati nanga yu uma. Efu yu no trow, no go suku wan uma. 28Ma efu yu e trow, dan yu no e du no wan ogri nanga dati. Efu wan sma di noiti no trow ete e trow, dan a no e du no wan ogri nanga dati. Ma den sma di trow o abi problema ini a libi, èn mi ben wani kibri unu gi dati.
29Brada nanga sisa, san mi wani taki na disi: a ten kon syatu. Dat' meki den man di abi wan uma mus libi leki efu den no abi uma. 30Den sma di e krei, mus libi leki den no e krei. Den sma di breiti, mus libi leki den no breiti. Den sma di e bai sani mus libi leki den sani san den bai no de fu den. 31Den sma di e wroko nanga grontapu sani, mus libi leki den sani dati a no fu den. Bika a grontapu leki fa wi sabi en now, o kba. 32Mi no wani fu un abi broko-ede. A sma di no trow e broko en ede nanga den sani fu Masra, fu Masra abi prisiri nanga en. 33Ma a sma di trow e broko en ede nanga sani fu grontapu. A wani gi en uma prisiri. 34A abi tu sani na en ede fu prakseri. Den uma di no abi masra moro, nanga den wan di noiti no trow ete, e broko den ede nanga den sani fu Masra. Den wani libi wan santa libi na skinfasi èn na yeyefasi. Ma a wan di trow e broko en ede nanga grontapu sani. A wani gi en masra prisiri. 35Mi e taigi unu den sani disi fu yepi unu, a no fu poti unu na ondro dwengi. Ma mi wani taki un mus libi leki fa a fiti, èn fu noti no hori un na baka fu dini Masra.
36Efu wan man abi wan umapikin di noiti no trow ete, èn a feni taki a no du bun nanga en, bika a pikin e kon owru kba èn a mus fu trow, dan meki a man du san a wani. Meki a pikin trow. A man no e du no wan sondu nanga dati. 37A kan taki a man teki wan besroiti na ini en ati, sondro taki na sma dwengi en. Na ensrefi teki a besroiti taki a pikin fu en no e trow. Dan na wan bun sani a du. 38So, dan a man di e meki en pikin trow, e du bun. Ma efu a no e meki a trow, a du wan moro bun sani.
39Wan uma no man trow nanga wan tra man solanga en masra e libi ete. Efu en masra dede, dan a fri fu trow nanga suma a wani. Ma a mus de wan man di e bribi ini Masra. 40Ma efu a no ben trow baka, a ben o moro bun gi en. Dati na san mi e prakseri, èn mi bribi taki mi abi a Yeye fu Gado tu.
