2 Korinte 4

₁Gado sari wi, èn A poti a wroko disi ini wi anu. Dat' meki wi no e lasi ati. ₂Wi no e du kibrikibri sani, èn wi e hori wisrefi fara fu syen sani. Wi no e wroko nanga triki, èn wi no e drai a wortu fu Gado. Gado sabi dati. Ma wi e taki den sani leki fa den de. Dan so ala sma konsensi e taigi den suma na wi. ₃Efu gi son sma wan duku de ete abra a bun nyunsu san wi e preiki, dan dati na sma di e go lasi. ₄Den no e bribi, bika a gado fu a grontapu disi meki a ferstan fu den kon dungru. Dat' meki den no man si a leti fu a bun nyunsu di e taki fu a glori fu Kristus. Na En na a prentyi fu Gado. ₅Bika wi no e preiki abra wisrefi, ma wi e preiki taki Yesus Kristus na Masra, èn wi dati na knekti fu unu. ₆Bika a srefi Gado di taki: “Meki faya de fu si ini a dungru,” na En leti a faya ini wi ati tu, fu wi kan ferstan a glori fu Gado di de fu si na a fesi fu Kristus.

₇Ma wi di abi a gudu disi, de leki kleidoti patu pe a gudu de na ini. So a de fu si taki a no wi srefi abi a krakti. A krakti disi di bigi moro ala sani, na fu Gado. ₈Den e kwinsi wi fu ala sei, ma den no man broko wi. Wi no e sabi san fu du, ma wi no e lasi ati. ₉Den de nomonomo na wi baka fu du wi ogri, ma wi no de wi wawan. Den naki wi trowe, ma wi de ete. ₁₀Ibri yuru wi e tyari a dede fu Yesus nanga wi ini wi skin, fu meki taki a libi fu Yesus de fu si tu ini wi skin. ₁₁Bika ala leisi den wani kiri wi di e libi dya na grontapu fu Yesus ede. Ma na so a libi fu Yesus e kon fu si na ini wi swaki libisma skin. ₁₂Na so wi dati e tnapu ai nanga ai nanga dede, ma unu e feni libi. ₁₃A skrifi taki: “Mi bribi, dat' meki mi taki.” Now wi abi a srefi bribi disi. Èn fu di wi e bribi, meki wi e taki tu. ₁₄Bika wi sabi taki Gado, di ben meki Masra Yesus kon na libi baka, o meki wi kon na libi baka tu, fu di wi de wan nanga Yesus. Dan wi nanga unu o tnapu na En fesi. ₁₅Ala den sani e psa fu un ede, fu meki Gado sori En bun-ati na moro furu sma. Dan moro nanga moro den o taki Gado tangi èn den o gi En grani.

₁₆Dat' meki wi no e lasi ati. Bika awinsi wi skin e kon owru moro nanga moro, na ini wi yeye wi e kenki kon nyun dei fu dei. ₁₇Bika den pikin nowtu di e miti wi now, no e tan langa. Ma den e meki taki wi o kisi wan glori di e tan fu têgo èn di bigi bari moro den. ₁₈So wi no e luku den sani san wi e si, ma wi e poti wi prakseri na tapu san wi no e si. Bika den sani san wi e si e tan wan syatu pisten nomo. Ma den sani san wi no e si e tan fu têgo.