2 Korinte 5

₁A skin fu wi dya na grontapu de leki wan tenti pe wi e libi, èn a o broko wan dei. Ma wi sabi taki Gado abi wan oso gi wi na heimel di no meki nanga libisma anu èn di e tan fu têgo. ₂Solanga wi e libi ini a skin disi wi e soktu, bika wi e angri fu Gado weri a skin gi wi san wi o abi na heimel. ₃Bika te A du dati, dan wi no abi fu de nanga sososkin. ₄Bika wi di e libi ini a skin disi ete, e dyeme hebi fu di un no wani de nanga sososkin. Ma wi wani fu weri a nyun skin. Dan a skin di o tan fu têgo o teki a presi fu a wan di o broko wan dei. ₅Na Gado srefi ben meki wi klari gi a sani disi. A gi wi a Yeye leki wan dyaranti taki A o du en.

₆Dat' meki wi no e lasi ati, aladi wi sabi taki solanga wi e libi ini a skin disi, wi de fara fu Masra. ₇Bika wi e libi nanga bribi, wi no e libi nanga san ai e si. ₈Ma wi e teki dek'ati, èn wi e angri tranga fu froisi kmoto fu a skin, fu go libi na Masra. ₉Dat' meki wi e du ala muiti fu Masra kan abi prisiri nanga wi, awinsi wi de na Masra noso efu wi de fara fu En. ₁₀Bika wi alamala sa abi fu tnapu na Kristus fesi fu A krutu wi. Dan wi sa kisi a pai fu a fasi fa wi ben libi ini a skin disi: efu wi ben du bun noso ogri.

₁₁Di wi sabi taki wi mus abi lespeki gi Masra, meki wi e du ala muiti fu sma teki bribi. Gado sabi fa wi de, èn mi e ferwakti tu tak' ini un ati un srefi sabi fa wi de. ₁₂A no wan bun wortu wi e du gi wisrefi baka. Ma wi wani gi unu wan okasi fu un kan meki bigi gi wi. Dan un kan piki den sma di e meki bigi gi densrefi fu sani di de fu si na dorosei, ma di no e sori fa den ati de. ₁₃Efu a gersi taki wi law, dan na fu Gado ede. Efu wi de na wi krin ferstan, dan na fu un ede. ₁₄Bika a lobi fu Kristus e tiri wi, fu di wi kon ferstan taki fu di wan enkri Sma ben dede gi ala sma, dan ala sma dede tu. ₁₅A dede gi ala sma. Dat' meki den sma di e libi, no mus libi moro gi densrefi. Ma den mus libi gi a Wan di ben dede gi den, èn di Gado meki opo baka na dede. ₁₆Dat' meki wi no e luku no wan sma tapu wan libisma fasi moro. Efu wi ben luku Kristus libisma fasi wi no e du dati moro. ₁₇Bika a sma di kon tron wan nanga Kristus, na wan nyun sma. Den owru sani no de moro. Luku, ala sani kon nyun. ₁₈Na Gado du a heri sani disi. San Kristus du meki taki wi kon bun baka nanga En. Dan Gado gi wi a wroko fu meki sma kon bun baka nanga En. ₁₉Wi e preiki taki na ini Kristus, Gado meki ala sani kon bun baka na mindri En nanga libisma. A gi den pardon fu den sondu, èn A gi wi a wroko fu ferteri sma taki den kan kon bun baka nanga Gado. ₂₀So wi na boskopuman di e taki gi Kristus. Te wi e taki a de leki na Gado e warskow unu. Dat' meki mi e aksi unu ini a nen fu Kristus: Un meki en bun baka nanga Gado. ₂₁Gado meki Kristus di no ben sabi sondu, tron sondu fu wi ede. Dan so fu di wi de wan nanga En, wi tron sma di kon bun ini Gado ai.