Genesis 20

₁Dan Abraham kmoto fu drape. A hari go na a Negebsabana, dan a go tan na mindri Kades nanga Sur. A libi leki wan doroseisma tu na ini Gerar. ₂A ben taki tak' Sara na en s'sa. So Abimelek, a kownu fu Gerar, meki den go teki Sara tyari kon gi en. ₃Ma neti fu en Gado sori ensrefi ini wan dren na Abimelek, dan a taigi en taki: “Yu o dede fu di yu teki a uma disi leki yu frow, bika a trow kba.” ₄Abimelek no ben go na bedi ete nanga Sara. So a piki taki: “Masra, yu sa kiri wan sma di no du noti? ₅Na a man srefi taigi mi taki na en s'sa èn a uma srefi taigi mi taki na en brada. Mi teki en nanga wan krin ati sondro takru prakseri.” ₆Ne Masra taigi en ini a dren taki: “Mi sabi taki yu du en nanga wan krin ati. Na dat' meki mi hori yu fu yu no fasi en, fu yu no sondu na mi fesi. ₇Tyari a frow disi go baka na en masra. En masra na wan profeiti. A sa begi gi yu fu yu tan na libi. Ma efu yu no tyari en go baka, na dede nomo yu sa dede, yu nanga ala den sma fu yu.”

₈A tra mamanten, frukufruku, Abimelek kari ala den knekti fu en. Di a ferteri den san psa, ala den man kon frede srefsrefi. ₉Dan Abimelek seni kari Abraham. A taigi en taki: “San yu du nanga wi? San mi du yu so, fu yu meki mi nanga den sma fu mi kondre du so wan sondu? Yu du sani nanga mi di sma no e du nanga makandra.” ₁₀Dan Abimelek aksi Abraham taki: “San meki yu du so wan sani?” ₁₁Ne Abraham piki taki: “Mi prakseri taki den sma fu dyaso no e lespeki Gado, èn taki den o kiri mi fu mi frow ede. ₁₂Boiti dati, a tru taki en na mi s'sa. Na wan umapikin fu mi p'pa, ma wi no abi a srefi m'ma. Dat' meki a ben man tron mi frow. ₁₃Ma di Gado puru mi na mindri den ososma fu mi fu tyari mi waka lontu, mi ben taigi en taki: ‘Efu yu wan sori taki yu lobi mi, dan alapresi pe wi o go yu mus taki tak' mi na yu brada.’ ”

₁₄Ne Abimelek gi Abraham en frow baka. A gi en skapu, krabita, kaw, mansrafu nanga umasrafu. ₁₅Dan Abimelek taigi en taki: “Luku, a kondre fu mi opo gi yu. Yu kan go tan pe yu wani.” ₁₆Sara a taigi taki: “Luku, mi e gi yu brada wan dusun solfru moni. Disi na fu tapu sma mofo fu den no taki na yu tapu. Bika nanga disi yu sori taki yu no du no wan sani san yu no ben mus du.” ₁₇Dan Abraham begi Gado èn Gado dresi Abimelek, en frow nanga den tra frow nanga san a ben e libi, fu den ben kan kisi pikin baka. ₁₈Bika MASRA ben tapu a bere fu ala den umasma ini a oso fu Abimelek, fu di Abimelek ben seni teki Sara.