Genesis 22

₁Baka wan pisten Gado ben wani tesi Abraham. A taki: “Abraham” Dan Abraham piki taki: “Iya, mi e arki.” ₂Ne Gado taigi en: “Go na a kondre Moria na wan fu den bergi di mi sa sori yu. Yu mus teki Isak, a wan enkri boi fu yu di yu lobi so, tyari go drape. Dan yu mus bron en leki wan ofrandi gi mi.”

₃So Abraham opo frukufruku a tamara mamanten fu en. A kapu udu, a seti en buriki, dan a teki en manpikin Isak nanga tu knekti fu en fu go nanga en na a presi di Gado ben taigi en. ₄Tapu a di fu dri dei Abraham ben man si a presi farawe kba. ₅Dan Abraham taigi den knekti fu en taki: “Un tan dyaso nanga a buriki. Mi nanga a boi o go drape fu anbegi. Te wi kba wi o drai kon baka na unu.” ₆Abraham ben meki Isak srefi tyari a udu fu a ofrandi. A teki sani fu meki faya nanga wan nefi, dan den gwe moro fara. ₇Dan Isak taki: “P'pa.” Abraham piki: “San psa mi boi?” Ne Isak aksi en p'pa taki: “A udu nanga a faya de dyaso, ma pe a pikin skapu de di wi o bron leki ofrandi?” ₈Abraham piki taki: “Mi boi, Gado srefi sa sorgu gi a skapu di mus bron leki ofrandi.” ₉Di den doro na a presi di Gado ben sori den, Abraham bow wan altari. A seti a udu na en tapu, a tai Isak, dan a poti en tapu a udu fu a altari. ₁₀Dan Abraham teki a nefi fu srakti en boi. ₁₁Ne a Engel fu MASRA kari en kmoto fu heimel. A taki: “Abraham, Abraham.” Abraham piki: “Iya, mi e arki.” ₁₂Ne a Engel taigi en taki: “No fasi a boi. No du en noti. Mi sabi now taki yu e lespeki Gado. Yu no ben wani hori yu wan enkri manpikin srefi na baka gi mi.” ₁₃Abraham opo en ede, dan a si wan man skapu. A ben fasi nanga den tutu fu en ini a grangran. So Abraham go teki a man skapu dan a srakti en na a presi fu en boi. ₁₄Dan Abraham kari a presi drape: MASRA sa sorgu gi en. Dat' meki te nanga a dei fu tide den sma e taki: “Tapu a bergi fu Masra, Gado sa gi wi sa wi abi fanowdu.”

₁₅A Engel fu MASRA kari Abraham fu a di fu tu leisi kmoto fu heimel. ₁₆A taigi en taki: “Masra taki so: ‘fu di yu no hori yu wan enkri manpikin srefi na baka gi Mi, meki Mi e sweri gi yu na Mi srefi, ₁₇taki Mi sa blesi yu bogobogo. Mi sa gi yu someni bakapikin leki den stari na heimel èn leki a santi na sekanti. Den bakapikin fu yu sa teki den foto fu de feyanti fu den abra. ₁₈Ala folku na grontapu sa winsi fu Mi blesi den leki fa Mi blesi den bakapikin fu yu. Mi sa du disi fu di yu du san Mi taigi yu fu du.’ ”

₁₉Baka dati Abraham drai go baka na den knekti fu en. Dan den drai go makandra baka na Berseba, èn Abraham tan libi drape.

₂₀Baka wan pisten Abraham kisi a boskopu taki en brada Nakor srefi tron p'pa tu. En frow Milka ben kisi wantu manpikin gi en. ₂₁A fosiwan ben nen Us. Dan yu ben e kisi Bus nanga Kemuel. Kemuel ben de a p'pa fu Aram. ₂₂Moro fara yu ben abi Kesed, Haso, Pildas, Yidlaf nanga Betuel. ₂₃Betuel ben de a p'pa fu Rebeka. Disi na den aiti manpikin di Milka kisi gi Nakor, a brada fu Abraham. ₂₄Nakor ben abi ete wan uma di ben nen Reuma. Reuma ben kisi fo manpikin: Tebak, Gakam, Takas nanga Maaka.