Maria kanti switismeri-oli na tapu Yesus futu
1Siksi dei fosi a Paskafesa, Yesus doro na Betania pe Lasarus, di A ben meki kon na libi baka, ben e tan. 2Drape den hori wan fesa gi Yesus. Marta ben e yepi nanga nyansani èn Lasarus ben de wan fu den sma di ben de na tafra nanga En. 3Dan Maria teki wan afu liter diri switismeri-oli san ben meki fu nardus rutu. A kanti a oli na Yesus futu dan a drei den nanga en edewiwiri. A switi smeri fu a oli panya ini a heri oso. 4Ne Yudas Iskariot, wan fu den man di ben e teki leri fu Yesus di ben o seri En bakaten, taki: 5“Fu sanede un no seri a oli disi gi dri hondro solfrumoni, dan un prati a moni gi pôtisma?” 6A no taki disi fu di a ben prakseri den pôtisma, ma fu di a ben de wan fufuruman. Na en ben hori a moni, èn a ben gwenti fu teki gi ensrefi. 7Dan Yesus taki: “Un libi en. A ben kibri a oli disi fu meki Mi klari fu Mi beri. 8Pôtisma de ala ten nanga unu, ma Mi no o de ala ten nanga unu.”
9Wan bigi grupu Dyusma ben kon yere taki Yesus de na Betania. So den go drape, ma a no fu Yesus wawan. Den ben wani si Lasarus tu, di A ben meki kon na libi baka. 10Dan den prenspari priester meki mofo fu kiri Lasarus tu, 11bika fu en ede furu fu den Dyusma ben libi den, dan den bribi ini Yesus.
Fa Yesus doro na Yerusalem
12A tra dei fu en a bigi grupu sma di ben kon na a fesa yere taki Yesus e kon na Yerusalem. 13So den koti palmtaki, dan den waka go miti En. Den ben e bari taki:
“Hosana! Blesi de tapu a Wan di e kon ini a nen fu Masra! Blesi fu a Kownu fu Israel!” 14Yesus si wan yongu buriki, dan A go sidon na en tapu. A psa leki fa a skrifi taki: 15“Sma fu Yerusalem, no frede! Luku, yu Kownu e kon. A e sidon tapu wan yongu buriki.” 16Di den sani disi psa, den man di ben e teki leri fu Yesus no ben ferstan ete san den ben wani taki. Ma baka di Yesus opo go na heimel, dan fosi den memre taki den sani disi ben skrifi fu En, èn taki den du den sani disi nanga En. 17Di Yesus kari Lasarus kmoto fu a grebi meki a kon na libi baka, wan bigi grupu sma ben drape. Den sma dati ben e ferteri trawan fu a sani disi. 18Fu dat'ede furu sma waka go miti En, bika den ben yere fu a marki san A ben meki den sma si. 19Ne den Fariseiman taigi makandra taki: “Un e si taki noti san un du e yepi. Luku, heri grontapu e waka na En baka!”
Yesus e taki tak' A mus dede
20Na mindri den sma di ben go fu anbegi Gado na a Paskafesa, yu ben abi wantu Grikisma. 21Den man disi go na Filipus, di ben kmoto fu Betsaida ini Galilea, dan den aksi en taki: “Masra, un wani si Yesus.” 22Dan Filipus go taigi Andreas, dan den ala tu go taigi Yesus. 23Yesus piki den taki: “A yuru doro taki a Manpikin fu Libisma mus kisi grani. 24Fu tru Mi e taigi un taki: Efu wan ai padi no fadon na gron dan a dede, a e tan wan ai padi. Ma efu a dede, dan a e gi furu nyanyan. 25A sma di lobi en libi, o lasi en. Ma a sma di no lobi en libi dya na grontapu, e kibri en fu a libi fu têgo. 26Efu wan sma e dini Mi, a mus waka na Mi baka. Dan pe Mi de, drape Mi knekti sa de tu. Efu wan sma e dini Mi, dan Mi P'pa sa gi en grani.
27Now Mi e sari. Mi no sabi san Mi mus taki. Mi kan aksi Mi P'pa fu puru Mi ini den sani di de fu kon, ma Mi kon fu psa den sani disi.” 28Dan Yesus taki: “P'pa, meki Yu nen kisi grani!” Ne wan sten taki kmoto fu heimel: “Mi gi en grani kba, èn Mi sa gi en grani baka.” 29A bigi grupu sma di ben tnapu drape yere a sani. Sonwan fu den taki: “Na dondru bari.” Ma trawan fu den taki: “Na wan engel taki nanga En.” 30Dan Yesus taigi den taki: “A sten disi no taki fu Mi ede, ma a ben taki gi unu. 31Now a ten doro fu krutu grontapu. Now den o yagi a wan gwe di e basi a grontapu disi. 32Ma te den opo Mi go na loktu, dan Mi sa hari ala sma kon na Mi.” 33Yesus taki a sani disi fu sori den sma fa A o dede. 34Ala den sma piki En taki: “A wèt e leri unu taki a Mesias o tan fu têgo. Dan fa Yu kan taigi unu taki den mus opo a Manpikin fu Libisma? Suma na a Manpikin fu Libisma dan?” 35Yesus piki den taki: “A faya de wan syatu pisten na un mindri ete. Un waka solanga un abi faya, fu a dungru no tapu un na pasi. A sma di e waka ini a dungru no sabi pe a e go. 36Un mus fertrow a faya solanga a de nanga unu, fu un kan de pikin fu a faya.” Di Yesus kba taki den sani disi, A gwe go kibri gi den.
Den fesiman no wani bribi
37Aladi Yesus meki den sma si someni marki, toku den no ben wani bribi ini En. 38Na so a sani san a profeiti Yesaya ben skrifi kon tru. A ben skrifi:
Masra, no wan sma bribi a boskopu fu unu,
èn no wan sma ferstan taki a ben de Yu krakti.
39Den sma no ben man bribi, bika Yesaya ben skrifi wan tra presi taki:
40A tapu den ai èn A tranga den ati.
Noso den ben o si nanga den ai
èn den ben o ferstan nanga den ati
taki den mus drai den libi,
fu Mi kan dresi den.
41Yesaya ben taki a sani disi, bika a ben si a glori fu Yesus èn a ben taki fu En. 42Toku furu fu den edeman srefi ben e bribi ini Yesus. Ma den no ben wani meki sma sabi, fu di den ben frede taki den Fariseiman ben o yagi den puru fu a kerki. 43Bika den ben lobi te libisma e gi den grani, moro leki te Gado ben e gi den grani.
44Dan Yesus bari taki: “A sma di e bribi ini Mi, no e bribi ini Mi wawan, ma a e bribi tu ini a Wan di seni Mi kon. 45A sma di e si Mi, e si a Wan di seni Mi kon. 46Mi kon na grontapu leki wan faya, fu meki taki den sma di e bribi ini Mi no tan ini a dungru. 47Efu wan sma arki san Mi e leri, ma a no e du san Mi taki, Mi no o krutu en. Bika Mi no kon fu krutu grontapu, ma fu ferlusu grontapu. 48Ma a sma di no wani Mi, èn di no e teki san Mi taki, abi wan sani di o krutu en. A wortu san Mi taki o krutu en tapu a laste dei. 49Bika Mi no taki fu Misrefi, ma a P'pa di seni Mi kon, taigi Mi san Mi mus taki èn san Mi mus leri den sma. 50Mi sabi taki san Mi P'pa taki, e gi a libi fu têgo. Fu dat'ede Mi e taki leki fa a P'pa taigi Mi fu taki.”
