1Ma now sma di yongu bari moro mi,
e teki mi e meki spotu.
Mi no bo wani den p'pa fu den
leki wan fu den dagu fu mi srefi
di e luku den meti fu mi.
2Boiti dati, sortu wini mi abi na den
now di den lasi ala den krakti kba,
now di den kon swaki sote kba?
3Pina nanga angri e moro den sote
tak' den e hari psa ini a dreisabana te neti,
e kaw drei rutu di den e feni ini a gron.
4Den e piki blad fu busi wiwiri èn den e
nyan den rutu srefi fu brembon.
5Sma no wani den fu libi na den mindri,
den e bari e yagi den leki fufuruman.
6Den abi fu libi na a lantyi fu den dipi presi mindri den bergi,
ini olo ini a gron nanga olo na bergiskin.
7Den e dyeme leki meti mindri a busbusi,
ondro a busbusi pe den de makandra,
8man sondro wan enkri ferstan, di sma e si leki noti,
man di sma yagi nanga fonfon puru fu a kondre.
9Now den pikin fu den
e teki mi e meki spotu na ini singi,
èn na soso odo den e koti gi mi.
10Fu di den e fisti fu mi, den no e kon krosbei,
noti no e tapu den fu spiti ini mi fesi.
11Fu di Gado puru ala krakti ini mi
èn broko mi saka,
den e du san den wani nanga mi.
12Wan grupu fu den tnapu na mi let'anu sei,
den e trowe mi na gron,
èn den e kon na mi tapu fu puru mi na pasi.
13Den tapu a pasi gi mi fu mi no kan lon,
den e meki ala muiti fu kiri mi,
èn den no abi no wan sma fanowdu fu yepi den.
14Den e broko psa a skotu di mus kibri mi,
leki skwala den e hari psa mindri den ston di e fadon.
15Sani di e frede mi, e miti mi fu alasei,
a grani fu mi wai gwe leki winti,
a koloku fu mi leki wan wolku.
16Now a libi fu mi srefi e kmopo ini mi,
na soso pina mi e pina dei fu dei.
17Te neti a pen e dyuku mi te ini mi bonyo,
a pen di e nyan mi no e kon na wan kba.
18Gado grabu mi na mi krosi
èn A e seki mi nanga tranga,
A e kwinsi mi na a neki fu a krosi fu mi.
19A fringi mi ini a tokotoko,
mi kon tron a srefi leki doti nanga asisi.
20Te mi e bari kari Yu fu Yu yepi mi, Yu no e piki mi.
Te mi tnapu e begi, Yu no e luku mi.
21Yu kenki, now Yu no abi no wan sari-ati nanga mi.
Nanga ala Yu krakti Yu kon na mi tapu.
22Yu e meki a winti opo mi tyari gwe,
Yu e meki a tranga winti du san a wani nanga mi.
23Iya, mi sabi tak' Yu e tyari mi fu mi lasi mi libi,
fu mi go na a presi pe ala sma e moksi di ben de na libi.
24A no abi misi taki no wan sma sa pina wan trawan
di de ini hebi nowtu,
di e bari e suku yepi na ini en problema.
25Mi ben e krei nanga den wan di ben e psa tranga ten
èn mi ben e sari pôtisma.
26Na dat' meki mi ben e ferwakti bun, ma na ogri kon,
mi ben e ferwakti leti, ma na dungru kon.
27Sensi di a benawtu disi miti mi,
mi bere e drai nomonomo.
28Nanga blaka krosi mi e waka lontu,
sondro fu si a faya fu a son,
te mi opo tnapu ini a konmakandra fu den fesiman,
na fu bari suku yepi.
29Mi e bari leki wan bus'meti,
leki wan bus'fowru, di de ini nowtu.
30A buba fu mi kon blaka èn a e piripiri,
korsu srefi e priti mi skin.
31A citer fu mi e prei soso dede-oso singi now,
a froiti fu mi, soso sari singi.”
