A fosi leisi di Bildad taki
1Dan Bildad fu Suak bigin taki. A taigi Yob taki:
2“Olanga yu o go doro fu taki den sortu sani dati?
Yu e tak' so furu, ma den sani no wani tak' noti.
3Gado e krutu sani tapu wan leti fasi,
a Wan di abi ala makti no e beni a leti.
4Efu na sondu den pikin fu yu sondu,
dan Gado gi den abra na a bakapisi fu a sondu.
5Ma efu yu sa aksi Gado fu A yepi yu,
èn begi a Wan di abi ala makti,
fu a abi sari-ati nanga yu,
6efu yu ati krin èn yu de fu fertrow,
dan a no abi misi tak' A o kibri yu,
èn gi yu, yu famiri nanga yu oso baka di yu fiti fu kisi.
7San yu ben abi bifo o luku pikinso,
te yu o poti en sei ala a gudu di yu o kisi bakaten.
8Mi e begi yu fu yu go ondrosuku
sortu leri den sma kisi di ben e libi langa na fesi,
èn poti yu prakseri tapu a koni fu den bigisma fu unu.
9Bika wi na kon wi e kon,
wi no sabi noti,
a libi fu wi dyaso na grontapu e psa gwe so esi leki a winti.
10Ma yu kan teki leri fu den bigisma fu unu,
fu san den sabi, den o taigi yu taki:
11‘Mokomoko e gro soso na ini swampu,
pankukuwiwiri no man gro pe watra no de.
12Efu a swampu drei,
den wiwiri disi na den fosiwan di e dede,
srefi fosi den gro kon bigi fu sma koti den.’
13Na so e psa nanga ala den sma di no wani du san Gado e taki.
Na so a howpu fu den sma di no wani dini Gado, e lasi gwe.
14A sma dati e bow tapu sani di e broko es'esi.
Den e fertrow tapu sani di swaki leki anansititei.
15A e bow na tapu den gudu fu en,
ma den gudu no man yepi en.
A e hori steifi na den sani di ensrefi abi,
ma den sani dati no man hori en tnapu.
16A e opo leki wan moi wiwiri di sma e nati fosi a son opo,
den pransun fu en e panya na tapu a dyari.
17Den rutu fu en e gro psa na tapu ston,
den e boro psa mindri den ston srefi.
18Ma te den rutu en puru fu en presi,
sma o taki:
‘Noiti un ben sabi tak' sowan sani ben drape.’
19Na so a de nanga a prisiri fu sowan sma,
a no e tan langa.
Dan trawan e gro kon ini en presi.
20Yere, Gado noiti no e poti wan sma na wan sei,
tapu san trawan no man sori finga.
Ma noiti A no e langa anu tu fu yepi wan sma di e du ogri.
21Ma Gado o meki yu lafu baka wanten,
A o meki yu singi fu prisiri.
22Dan A o meki syen teki den wan di no man si yu na ai,
èn A o wai den oso puru na pasi fu den wan di no e dini En.”
