Lukas 1

Furu sma meki muiti kba fu skrifi den sani san ben psa na un mindri, ₂soleki fa den sma di ben si ala den sani sensi na a bigin èn di ben panya a boskopu, ben ferteri wi. ₃Ma baka di misrefi go ondrosuku fin'fini fa ala sani ben waka sensi na a bigin, mi prakseri taki a ben o bun fu skrifi den sani soleki fa den ben psa, poti ini wan buku gi yu. ₄Mi e du disi fu yu kon si taki den sani san den ben leri yu, na tru.

₅Ini den dei di Herodes ben de kownu fu Yudea, wan priester ben de di ben nen Sakarias. A ben de fu a grupu fu Abia. En uma Elisabet ben de wan bakapikin fu Aaron. ₆Den tu sma disi ben bun ini Gado ai, èn den ben hori densrefi na ala den komanderi fu Gado èn na san A ben wani taki sma mus du. No wan sma ben man taki takru fu den. ₇Ma den no ben abi no wan pikin, bika Elisabet no ben man kisi pikin, èn den ala tu ben kon owru kba.

₈Now a ben de a ten taki Sakarias ben mus du en wroko leki priester gi Gado, fu di a grupu fu en ben mus du a wroko a pisten dati. ₉Dan soleki fa a gwenti fu den priester ben de, den ben hari lot fu luku suma ben mus go na ini a santa presi fu Masra fu go bron switismeri. Di den hari a lot, a sori taki na Sakarias ben mus go. ₁₀A yuru di a switismeri ben e bron, ala den sma ben de na prasi e begi. ₁₁Dan wan engel fu Masra sori ensrefi na Sakarias. A engel ben tnapu na a let'sei fu a altari pe a switismeri ben e bron. ₁₂Di Sakarias si a engel, a skreki èn a kon frede. ₁₃Ma a engel taigi en taki: “Sakarias, no frede. Gado yere yu begi. Elisabet, a uma fu yu, o kisi wan manpikin gi yu èn yu mus kari en Yohanes. ₁₄Yu o breiti èn prisiri nanga en, èn furu sma o prisiri taki a kon gebore. ₁₅Bika a o de wan prenspari man fu Masra. A no mus dringi win noso sopi. Na ini en m'mabere srefi a o furu nanga a Santa Yeye. ₁₆A o meki furu sma fu Israel drai kon baka na Masra, a Gado fu den. ₁₇A o waka na Masra fesi tapu a srefi fasi èn nanga a srefi krakti fu Elia. A o meki taki pratifasi no de moro na mindri pikin nanga den bigisma fu den. A o meki sma di trangayesi, bigin libi leki den sma di bun ini Gado ai. Na so a o meki a folku klari gi Masra.”

₁₈Dan Sakarias aksi a engel taki: “Fa mi o sabi taki a sani disi o psa? Bika mi owru kba, èn a uma fu mi doro wan hei libi marki kba tu.” ₁₉Dan a engel piki en taki: “Mi na Gabriyel, a wan di e tnapu krosbei fu Gado. Na En seni mi kon na yu fu ferteri yu a bun nyunsu disi. ₂₀We luku, den sani san mi taigi yu, o psa na a ten di Gado poti. Ma fu di yu no bribi san mi taigi yu, yu o babaw. Yu no o man taki te leki a dei te ala den sani disi o psa.”

₂₁A pisten dati den sma ben de na prasi e wakti Sakarias. Den ben ferwondru taki Sakarias tan so langa ini a santa presi. ₂₂Di Sakarias kon na dorosei, a no ben man taki nanga den. So den sma kon ferstan taki Gado ben sori en wan sani ini a santa presi. A meki wantu beweigi nanga en anu èn a tan babaw. ₂₃Di a ten kon kba san a ben mus du en wroko, a drai go baka na en oso.

₂₄Baka den dei dati en uma Elisabet hori bere. Feifi mun langa a no ben kmopo na ini en oso fu sma si en. ₂₅Elisabet taki: “Disi na san Gado du gi mi ini a ten di A sari mi. A puru a syen na mi tapu san mi ben abi mindri den sma.”

₂₆Di Elisabet ben abi siksi mun bere, Gado seni a engel Gabriyel go na a foto Nasaret ini Galilea. ₂₇A ben mus go na wan yongu uma di noiti no ben sribi nanga wan man ete. A yongu uma disi ben nen Maria. A ben o trow nanga Yosef, wan man di ben de wan bakapikin fu kownu David. ₂₈Di Gabriyel go ini a oso fu Maria, a taki en odi. Dan a taigi en taki: “Masra de nanga yu, èn a blesi fu Masra de na yu tapu.” ₂₉Maria skreki sote di a yere san a engel taki. Dan a aksi ensrefi san a odi disi wani taki. ₃₀Ma a engel taigi en taki: “Yu no abi fu frede, Maria, bika Gado sori yu a bun-ati fu En. ₃₁Luku. Yu o hori bere, èn yu o kisi wan manpikin. Yu mus kari en Yesus. ₃₂A o de wan prenspari man èn den o kari En a Manpikin fu a Moro Hei Gado. Masra Gado o meki A tron kownu na a presi fu En afo David. ₃₃A sa de a kownu fu a folku Israel fu têgo, èn noiti wan kba o kon na a tiri fu En.”

₃₄Dan Maria taigi a engel taki: “Fa dati o du psa? Bika noiti ete mi sribi nanga wan man.” ₃₅Dan a engel piki en taki: “A Santa Yeye o kon na yu tapu, èn a krakti fu a Moro Hei Gado o saka kon tapu yu. Dat' meki den sa kari a santa pikin di o gebore, a Manpikin fu Gado. ₃₆Luku, Elisabet a famiri fu yu, owru kba. Ma ensrefi de nanga bere fu kisi wan manpikin. Den ben taki a no man kisi pikin, ma na siksi mun kba di a abi bere. ₃₇Bika noti no de san Gado no kan du.” ₃₈Dan Maria taki: “We, mi de na Masra anu. Meki ala sani psa nanga mi soleki fa yu taki.” Dan a engel gwe.

₃₉Baka dati Maria teki pasi go es'esi na wan foto san de ini den bergi fu Yudea. ₄₀A go na Sakarias oso, dan a gi Elisabet odi. ₄₁Di Elisabet yere a odi fu Maria, a pikin dyompo ini en bere. Ne Elisabet kon furu nanga a Santa Yeye, ₄₂dan a taki nanga tranga sten taki: “Masra blesi yu moro ala uma di de, èn a blesi fu Masra de tapu a pikin ini yu bere. ₄₃Ma fa mi du feni a bun disi, taki a m'ma fu a Mesias kon luku mi? ₄₄Bika luku, di mi yere a odi fu yu, a pikin dyompo fu prisiri ini mi bere. ₄₅A blesi fu Gado de na yu tapu fu di yu bribi taki a sani san Masra taigi yu, o psa.”

₄₆Dan Maria taki:

₅₇Di a yuru doro fu Elisabet meki a pikin, a kisi wan boi. ₅₈Den birtisma nanga den famiri fu en, ben yere fa Masra ben sori bigi sari-ati na Elisabet. So den ben prisiri nanga en. ₅₉Di a boi tapu aiti dei, den sma kon fu besnei a boi. Dan den ben wani gi a boi a nen fu en p'pa Sakarias. ₆₀Ma en m'ma taki: “Nono. Un mus kari en Yohanes.” ₆₁Ma den taigi Elisabet taki: “No wan sma de ini yu famiri di abi a nen dati.” ₆₂Dan den sma meki wantu beweigi nanga den anu fu aksi Sakarias fa a wani taki a pikin mus nen. ₆₃Ne Sakarias aksi den sma wan sani fu skrifi na tapu. A skrifi taki: “A mus nen Yohanes.” Ala den sma ben ferwondru. ₆₄Dan wantron so Sakarias ben man taki baka èn a bigin fu opo Gado nen. ₆₅Ala den sma di ben libi ini a birti fu den, ben kisi bigi lespeki gi Gado. Èn ini a heri bergi presi fu Yudea den sma ben taki fu den sani disi. ₆₆Ala sma di yere ben teki den sani disi na prakseri. Den ben aksi densrefi taki: “San a pikin disi o tron?” Bika a ben de krin fu si taki a krakti fu Gado ben de na en tapu.

₆₇Sakarias kon furu nanga a Santa Yeye, dan a bigin taki san Gado gi en fu taki. A taki: