Didibri tesi Yesus
1Di Yesus kmopo fu a Yordanliba, A ben furu nanga a Santa Yeye. Dan a Yeye tyari En go na ini a dreisabana, 2pe didibri tesi En fotenti dei langa. A heri pisten dati Yesus no ben nyan noti, so baka den fotenti dei angri bigin kiri En. 3Ne didibri taigi En taki: “Efu Yu na a Manpikin fu Gado, taigi a ston disi fu a tron brede.” 4Ma Yesus piki en taki: “A skrifi taki: Wan sma no sa libi fu brede wawan.” 5Dan didibri tyari Yesus go na wan hei presi. Ini a pingi fu wan ai a sori En ala den kondre fu grontapu. 6Didibri taigi En taki: “Mi o gi Yu ala a makti fu den kondre disi nanga a gudu di den abi. Na mi kisi a makti disi, èn mi e gi en na suma mi wani. 7Mi o gi Yu ala den sani disi, efu Yu anbegi mi.” 8Ma Yesus piki en taki: “A skrifi taki: ‘Yu mus anbegi Masra yu Gado èn na En wawan yu mus dini.’ ” 9Baka dati didibri tyari Yesus go na Yerusalem, dan a poti En tnapu na a lantyi fu a daki fu a tempel. A taigi En taki: “Efu Yu na a Manpikin fu Gado, trowe Yusrefi go na gron. 10Bika a skrifi taki: ‘Gado sa seni den engel fu En fu kibri Yu.’ 11Moro fara: ‘Den sa tyari Yu na tapu den anu, fu Yu no stotu Yu futu na wan ston.’ ” 12Ma Yesus piki en taki: “A skrifi owktu taki: ‘Yu no mus tesi Masra yu Gado.’ ” 13Di didibri kba tesi Yesus, a gwe fu luru wan tra okasi.
14Di Yesus drai go baka na Galilea, A ben furu nanga a krakti fu a Yeye. Ini a heri kontren drape den sma ben e taki fu En. 15A ben e gi leri ini den kerki fu den, èn ala sma ben e gi En bigi nen.
Den sma fu Nasaret no wani bribi ini Yesus
16Dan Yesus go na Nasaret pe A ben kweki. Soleki fa A ben gwenti fu du tapu a sabatdei, A go na a kerki. A opo tnapu fu leisi 17dan den gi En a buku san a profeiti Yesaya ben skrifi. Di A opo a buku, A leisi a pisi pe skrifi taki:
18A Yeye fu Masra de na mi tapu,
bika A poti mi fu tyari bun nyunsu
gi den pôtiwan.
A seni Mi fu taigi den sma
di feyanti poti na strafu,
taki den o lusu.
A seni mi fu meki breniman si baka,
fu puru sma na ini katibo,
19èn fu taki tak' a ten doro
fu Masra sori En bunfasi.
20Dan Yesus tapu a buku, A gi en na a man di e wroko ini a kerki, dan A go sidon. Ala den sma ini a kerki ben e luku En. 21Dan Yesus taigi den taki: “Tide a pisi disi fu a Santa Buku san un yere, kon tru.” 22Ala den sma ben lobi fa A taki, èn den ben ferwondru fa A ben taki so moi. Dan den taki: “Tan, a no a boi fu Yosef?” 23Yesus piki den taki: “Mi sabi taki un o koti a odo gi Mi taki: ‘Datra, dresi yusrefi! Un yere san Yu du ini Kafarnaum. We, du den srefi sani dyaso ini Yu eigi foto.’ 24Fu tru Mi e taigi un taki: Den sma fu wan foto no e teki san den eigi profeiti e taki. 25A sani san Mi e taigi unu now tru. Ini a ten fu Elia dri nanga afu yari langa, alen no ben fadon èn wan bigi angriten ben de ini a heri kondre. A pisten dati furu uma di masra dede kba ben de ini Israel. 26Ma Gado no seni Elia go na no wan fu den. A seni en go na a foto Sarepta ini a birti fu Sidon. Drape a ben mus go na wan uma di masra dede kba. 27Sosrefi ini a ten di a profeiti Elisa ben e libi, furu gwasiman ben de ini Israel. Ma Elisa no ben dresi no wan fu den, boiti Naaman, a man fu Siria.” 28Di den sma ini a kerki yere san Yesus taki, den ati bron srefsrefi. 29Ne den opo, dan den teki Yesus pusu puru ini a foto. Den pusu En go te na a lantyi fu a bergi tapu san a foto fu den ben bow, fu fringi En go na gron. 30Ma Yesus waka psa na den mindri, dan A gwe.
Yesus puru wan takruyeye na wan man tapu
31Dan Yesus go na Kafarnaum, wan foto ini Galilea. Tapu a sabatdei A ben e gi den sma leri. 32Den sma ben ferwondru fu a fasi fa A ben e gi leri, bika A ben taki leki a sma di kon nanga a leri. 33Wan man ben de ini a kerki di ben abi wan takruyeye na en tapu. A bari nanga tranga sten taki: 34“Woooi! Yesus fu Nasaret, san Yu wani nanga unu? Na kon Yu kon fu puru un na pasi? Mi sabi suma na Yu. Yu na a Santa Wan fu Gado.” 35Ma Yesus bari en taki: “Tapu yu mofo, èn kmopo na a man tapu!” Dan a takruyeye fringi a man trowe na gron na mindri den sma pe a ben tnapu. Dan a kmopo tapu a man sondro fu du en wan ogri. 36Ala den sma ben ferwondru. Den taigi makandra taki: “San na a leri disi? Bika nanga makti nanga krakti A e komanderi den takruyeye, èn den e gwe!” 37Dan so a nen fu Yesus ben bari na ala sei ini a kontren dati.
Yesus dresi furu sma
38Baka dati Yesus kmopo ini a kerki, dan A go na a oso fu Simon. Now a m'ma fu a uma fu Simon ben didon nanga hebi korsu, so den aksi Yesus fu dresi en. 39Yesus go tnapu na en sei, dan A taigi a korsu fu libi a skin. Ne a korsu saka. Wantron a uma opo, dan a poti nyanyan nanga dringi gi den. 40Di a son saka, den sma tyari ala den sikisma fu den di ben abi ala sortu siki, kon na Yesus. Wan fru wan A ben poti anu na den tapu èn A dresi den. 41Owktu takruyeye ben kmopo tapu furu sma. Den ben e bari taki: “Yu na a Manpikin fu Gado.” Ma Yesus bari den. A no gi den okasi fu taki, bika den ben sabi taki En na a Mesias.
A wroko fu Yesus
42Di dei broko Yesus go na wan presi dorosei fu a foto pe sma no e libi. Dan den sma go suku En. Di den feni En, den ben wani hori En fu A no gwe. 43Ma A taigi den taki: “Mi mus go na den tra foto tu, fu tyari a bun nyunsu tak' Gado o bigin tiri libisma. Bika na fu a sani dati Gado seni Mi kon.” 44So A go preiki na ini den kerki fu Yudea.
