Yesus gi leri tapu wan bergi
1Di Yesus si ala den sma di ben e waka na En baka, A kren go sidon tapu wan bergi. Dan den sma di ben e teki leri fu En teki presi lontu En. 2Dan Yesus bigin leri den taki:
3“Den sma di kon si taki den abi Gado fanowdu na blesi sma,
bika A e tiri den leki Kownu.
4Den sma di e sari na blesi sma,
bika Gado sa trowstu den.
5Den sma di abi sakafasi na blesi sma,
bika heri grontapu sa de fu den.
6Den sma di abi wan tranga angri fu de bun ini Gado ai na blesi sma,
bika A sa gi den san den wani.
7Den sma di abi sari-ati nanga trawan na blesi sma,
bika Gado sa abi sari-ati nanga den.
8Den sma di e dini Gado wawan na blesi sma,
bika den sa si En.
9Den sma di e tyari freide kon mindri trawan na blesi sma,
bika Gado sa kari den En pikin.
10Den sma di trawan de na den baka fu du den ogri,
fu di den bun ini Gado ai,
na blesi sma,
bika Gado e tiri den leki Kownu.
11Yu na wan blesi sma te sma e broko yu saka, te den de na yu baka fu du yu ogri, èn te den e lei èn taki ala sortu takru fu yu, fu di yu e waka na Mi baka. 12Yu mus prisiri, yu mus breiti, bika wan bigi pai e wakti yu na heimel. Bika na so den ben du nanga den fosten profeiti tu.”
Sowtu nanga faya fu grontapu
13“Yu de leki sowtu gi den sma na grontapu. Ma efu sowtu lasi en tesi, fa a o kon sowtu baka? Yu no man du noti moro nanga en, dan fu trowe en gwe meki sma waka na en tapu.
14Yu de leki wan faya gi den sma na grontapu. Wan foto di de na tapu wan bergi no kan tan kibri. 15Yu no e leti wan kokolampu, dan yu e poti en ondro wan embre. Ma yu e poti en tapu wan tafra fu a gi faya na ala sma ini a oso. 16Na so a faya fu yu mus de fu si gi trawan, fu den kan si den bun wroko fu yu. Dan den o gi yu P'pa na heimel bigi nen.”
Yesus nanga a wèt fu Moses
17“Yu no mus prakseri taki Mi kon fu poti a wèt nanga den sani di den profeiti skrifi na wan sei. Mi no kon fu poti den na wan sei, ma Mi kon fu du san den e taki. 18Bika fu tru Mi e taigi un taki: Solanga heimel nanga grontapu sa de, no wan pikin pisi fu san skrifi ini a wèt sa kmopo. Ala san skrifi sa psa. 19Dat' meki a sma di e poti a moro pikin pisi srefi fu den wèt na wan sei, dan a e leri trawan fu du a srefi sani, a sma dati sa kisi a moro lagi presi na mindri den sma di Gado e tiri. Ma a sma di e du san den wèt e taki, èn a e leri trawan fu du a srefi sani, sa kisi wan hei presi na mindri den sma di Gado e tiri. 20Bika Mi e taigi un taki: Efu yu no e libi moro bun ini Gado ai moro den sabiman fu Gado wèt nanga den Fariseiman, dan noiti yu o man tron wan sma di Gado e tiri.”
No hori trawan na ati
21“Un yere taki a wèt fu Moses leri den bigisma fu unu taki: ‘Un no mus kiri wan tra sma,’ èn owktu taki: ‘Krutubakra sa leisi strafu gi a sma di du a sani dati.’ 22Ma Mi e taigi un taki: Suma ati e bron nanga en brada sa fadon ini anu fu krutubakra. A sma di sa kari en brada ‘don kaw,’ o fadon ini anu fu a grankrutu, èn a sma di sa kari en brada ‘lawman,’ o feni ensrefi te ini a faya fu hel. 23Dat' meki efu yu e tnapu fesi a altari fu tyari wan ofrandi gi Gado, ma yu memre taki yu brada abi wan sani nanga yu, 24libi a ofrandi let' drape dan yu go meki en bun nanga yu brada. Baka dati yu kan drai kon baka fu tyari a ofrandi gi Gado. 25Efu wan sma di abi wan sani nanga yu, e tyari yu go na krutu, dan yu mus meki muiti fu meki en es'esi bun nanga en fosi un doro drape. Bika te un doro drape a sa gi yu abra na a krutubakra. Dan a dati sa gi yu abra na skowtu, di sa poti yu na ini straf'oso. 26Fu tru Mi e taigi yu taki: Yu no o kmoto drape solanga yu no pai te nanga a laste koprosensi.”
No huru
27“Un yere taki a skrifi taki: ‘Yu no mus huru.’ 28Ma Mi e taigi un taki: A sma di luku wan uma nanga a prakseri taki a wani en, huru na ini en ati nanga a uma dati kba. 29Dat' meki efu yu let' ai meki yu sondu, diki en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel. 30Efu na yu let'anu meki yu sondu, kapu en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel.”
No broko trow
31“A skrifi tu taki: ‘Wan man di e prati nanga en uma, mus gi en wan brifi di e sori taki a trow broko.’ 32Ma Mi e taigi un taki: Wan man no mus broko trow nanga en uma sondro taki a uma ben huru gi en. Efu a man du dati, a e meki taki a uma libi wan huru libi efu a trow baka, èn a e meki a man di trow nanga en libi wan huru libi tu.”
No meki sweri
33“Un yere tu taki a wèt fu Moses leri den bigisma fu unu taki: ‘Yu no sa broko wan sweri di yu meki, ma yu sa du san yu sweri gi Masra.’ 34Ma Mi e taigi un taki: Yu no mus meki sweri kwet'kweti. No sweri na heimel, bika heimel na a kownusturu fu Gado. 35Yu no mus sweri na grontapu, bika grontapu na a futubangi fu Gado. Yu no mus sweri na Yerusalem, bika Yerusalem na a foto fu a bigi Kownu. 36No sweri tu na yu ede, bika yu no kan meki no wan fu yu edewiwiri kon blaka noso weti. 37So dan, meki te yu e taki ‘iya,’ a tan ‘iya,’ èn meki te yu e taki ‘no,’ a tan ‘no.’ Bika ala san yu e taki moro leki dati, kmoto fu didibri.”
No pai ogri nanga ogri
38“Un yere taki a skrifi taki: ‘Efu wan sma naki wan trawan broko en ai, den mus broko a ai fu a sma dati baka. Èn efu wan sma naki wan trawan broko en tifi, den mus broko a tifi fu a sma dati baka.’ 39Ma Mi e taigi un taki: No meki trobi nanga a sma di e du yu ogri. Efu wan sma naki yu na a let'sei fu yu fesi, drai a tra sei gi en tu. 40Efu wan sma tyari yu go na krutu fu yu empi ede, gi en a dyakti fu yu tu. 41Efu wan sma dwengi yu fu tyari a lai fu en wan kilometer, tyari en tu kilometer gi en. 42Efu wan sma aksi yu wan sani, gi en san a aksi. Èn efu a wani leni wan sani fu yu, leni en.”
Fa fu lobi tra sma
43“Un yere taki a skrifi taki: ‘Yu mus lobi yu mati, èn yu mus hori yu feyanti na ati.’ 44Ma Mi e taigi un taki: Lobi yu feyanti, èn begi gi den sma di de na yu baka fu du yu ogri. 45Dan so yu sa de wan trutru pikin fu yu P'pa di de na heimel. Bika A e meki a son opo gi den sma di e du ogri, nanga gi den sma di e du bun. A e meki alen kon gi den sma di bun ini En ai, nanga den sma di no bun ini En ai. 46Bika efu yu lobi soso den sma di lobi yu, sortu pai yu abi? Bika srefi den man di e piki lantimoni e du dati. 47Efu yu e gi odi soso na den sma nanga san yu de bun, dan na wan aladei sani yu e du. Den sma di no sabi Gado e du a srefi sani. 48Ma yu mus bun dorodoro, soleki fa yu P'pa na heimel bun dorodoro.”
