Mateus 8

₁Di Yesus saka kmoto fu a bergi, bun furu sma ben e waka na En baka. ₂Ne wan gwasiman kon na Yesus, a saka tapu en kindi na En fesi, dan a taigi En taki: “Masra, efu Yu wani, Yu kan meki mi skin kon bun baka.”

₃Yesus langa En anu fasi a man, dan A taki: “Iya, Mi wani. Kon betre!” A srefi momenti dati a man skin fu a man kon bun baka. ₄Dan Yesus taigi a man taki: “Sorgu taki yu no e ferteri no wan sma san psa nanga yu. Ma yu mus go na a priester, meki a ondrosuku yu fu a kan si taki yu kon betre. Dan fu sori ala sma taki yu kon betre, yu mus tyari a ofrandi gi Gado leki fa Moses skrifi taki yu mus du.”

₅Di Yesus doro na a foto Kafarnaum, wan Romeini ofisiri kon begi En wan sani. ₆A taki: “Masra, a knekti fu mi didon na oso. A lan èn a abi hebi skin-ati.” ₇Yesus piki a man taki: “Mi sa go dresi en.” ₈Ma a edeman piki en taki: “Masra, mi no warti fu Yu kon ini mi oso. Ma efu Yu taki wan wortu nomo, dan a knekti fu mi o kon betre. ₉Bika mi srefi e wroko ondro trawan, èn mi abi srudati di de ondro mi. Efu mi taigi wan fu den taki: ‘Go drape,’ a e go. Efu mi taigi wan trawan taki: ‘Kon dyaso,’ a e kon. Efu mi taigi mi srafu taki: ‘Du disi,’ a e du en.” ₁₀Di Yesus yere san a man taki, A ferwondru. Dan A taigi den sma di ben e waka na en baka taki: “Fu tru Mi e taigi un taki: Na ini heri Israel Mi no feni no wan sma nanga sowan bigi bribi. ₁₁Mi e taigi un taki: Te Gado o bigin tiri libisma, furu sma sa kmoto na ala sei fu grontapu fu sidon nyan makandra nanga Abraham, Isak nanga Yakob. ₁₂Ma den sma di ben mus de ondro a tiri fu Gado, den o fringi go na dorosei ini a dungru. Drape den sa krei èn kaw den tifi.” ₁₃Dan Yesus taigi a ofisiri taki: “Yu kan go. A sa psa soleki fa yu e bribi.” A srefi ten dati a knekti kon betre.

₁₄Baka dati Yesus go na Petrus oso. Drape A si taki a m'ma fu a uma fu Petrus ben didon nanga korsu. ₁₅Ne Yesus fasi a uma na en anu, èn a korsu saka. Dan a uma opo go poti nyanyan nanga dringi gi Yesus.

₁₆Di neti tapu, den tyari furu sma di ben abi takruyeye na den tapu, kon na Yesus. Na taki wawan A ben taki, dan den takruyeye gwe libi den sma. A dresi ala den sikisma tu. ₁₇Na so a sani san a profeiti Yesaya ben taki kon tru. A ben taki: “A tyari den swakifasi fu wi, èn a teki wi siki na en tapu.”

₁₈Di Yesus si fa wan heri ipi sma ben e lontu En, A taigi den man di ben e teki leri fu En taki: “Meki un abra go na a tra sei fu a meer.” ₁₉Ma dan wan sabiman fu Gado wèt kon na En. A taigi En taki: “Meister, mi sa go nanga Yu ala sei pe Yu e go.” ₂₀Yesus piki en taki: “Krab'dagu abi den olo, èn den pikinfowru abi den nesi. Ma a Manpikin fu Libisma no abi wan presi fu kanti En ede.” ₂₁Dan wan tra man di ben e teki leri fu En, taigi En taki: “Masra, gi mi a okasi fu go beri mi p'pa fosi.” ₂₂Ma Yesus piki en taki: “Kon nanga Mi, èn meki den dedewan beri den eigi dede.”

₂₃Dan Yesus go ini a boto èn den man di ben e teki leri fu En go na En baka. ₂₄Ma di den e koti abra, wantron so wan tranga winti bigin wai tapu a watra, taki den skwala ben e naki go ini a boto. Ma Yesus ben e sribi. ₂₅Ne den man go wiki En taki: “Masra, yepi wi! Wi e dede!” ₂₆Yesus piki den taki: “Fu sanede un e frede so? A bribi fu un pikin!” Dan A opo, A bari a winti nanga a watra, èn wantron ala sani kon tiri. ₂₇Den man ferwondru. Den taki: “Suma na a man disi? Winti nanga watra srefi e du san A e taki!”

₂₈Di Yesus doro na abrasei ini a kontren fu den sma fu Gadara, tu man di ben abi takruyeye na den tapu, waka kon miti En. Den man disi ben kmoto ini a berpe, èn den ben ogri sote taki no wan sma no ben man psa drape. ₂₉Dan den man bari taki: “Yu Manpikin fu Gado, san Yu wani nanga unu? Na kon Yu kon dyaso fu pina wi fosi a ten doro?” ₃₀Krosbei fu drape wan bigi ipi agu ben e nyan. ₃₁Ne den takruyeye begi Yesus taki: “Efu Yu o yagi un puru na tapu den man, dan tangitangi, seni un go na ini den agu.” ₃₂Yesus taigi den taki: “Kmopo fu dyaso!” Dan den takruyeye kmopo na den man tapu, go na ini den agu. Ne ala den agu lon saka fu a bergi go ini a meer, dan den dede ini a watra. ₃₃Den man di ben e luku den agu, lon gwe. Den lon go na ini a foto, dan den ferteri ala sani san den si, sosrefi san ben psa nanga den man di ben abi den takruyeye na den tapu. ₃₄Dan ala sma kmopo fu a foto go miti Yesus. Di den si En, den aksi En tangitangi fu A gwe libi a kontren fu den.