Markus 6

₁Yesus kmopo fu pe A ben de, dan A go na a foto pe A ben kweki. Den man di ben e teki leri fu En go nanga En. ₂Di a sabatdei doro, Yesus bigin gi den sma leri na ini a kerki. Furu fu den sma di yere En tnapu nanga opo mofo. Den taki: “Pe A kmopo nanga den sani disi? Fa A du abi sowan koni? Pe A feni a makti fu du den bigi sani? ₃Na En na a temreman, a manpikin fu Maria. Na En na a brada fu Yakobus, Yosef, Yudas nanga Simon. Den s'sa fu En e libi dyaso na un mindri.” Dat' meki den no ben wani yere noti fu En. ₄Dan Yesus taigi den taki: “Ala sma e lespeki wan profeiti, boiti den sma fu a foto pe a kweki, en eigi famiri nanga den ososma fu en.” ₅Dat'ede A no ben man du no wan bigi sani drape. Tapu wantu sikisma nomo A poti anu fu dresi den. ₆A ferwondru fu di den sma no ben e bribi.

Na so Yesus go na den tra dorpu ini a kontren, e gi den sma leri. ₇A kari den twarfu man fu En kon, dan A seni den tu na tu fu go panya a bun nyunsu. A gi den makti fu yagi takruyeye puru na tapu sma. ₈A taigi den taki: “Un no mus tyari noti fu te un de na pasi, boiti wan wakatiki. Un no mus tyari brede, un no mus tyari wan saka, un no mus tyari moni tu. ₉Un mus weri wan susu na un futu, ma un no mus tyari tra krosi.” ₁₀Yesus taki moro fara: “Te un doro wan foto, suku wan presi fu tan. Dan un mus tan drape te leki un gwe libi a foto. ₁₁Ma efu un doro wan presi pe den no wani fu un tan na den oso, èn den no wani arki san un e taki, dan un mus gwe. Ma un mus naki a santi san de na un futu puru, fu meki den sma ferstan taki un no e tyari frantwortu moro gi den.” ₁₂Na so den man gwe, dan den bari a boskopu taki den sma mus drai den libi. ₁₃Den yagi furu takruyeye puru tapu sma, den lobi oli gi furu sma di ben e siki, èn den dresi den.

₁₄Kownu Herodes ben yere fu Yesus, bika ala sei En nen ben bari. Son sma ben taki: “Na Yohanes a Dopuman kon na libi baka. Na dat' meki A abi makti fu du den bigi sani.” ₁₅Ma tra sma ben taki: “Na Elia.” Trawan baka ben taki: “Na wan profeiti, leki den wan fu fosten.” ₁₆Di Herodes yere fu Yesus, a taki: “Mi ben meki den kapu a ede fu Yohanes puru. A mus de taki na en kon baka na libi.” _17-18A ben de so taki Herodes ben trow nanga Herodias, a uma fu en brada Filipus. Ma Yohanes ben taigi Herodes taki: “Yu no kan trow nanga a uma fu yu brada.” Dat'ede Herodes ben meki den grabu Yohanes, bui en poti na ini straf'oso. ₁₉Herodias ben hori Yohanes na ati èn a ben wani kiri en. Ma a no ben man, ₂₀bika Herodes ben frede Yohanes. A ben sabi en leki wan santa man di e libi bun ini Gado ai. Dat' meki a ben sorgu taki Herodias no kisi san a ben wani. Herodes ben lobi fu arki te Yohanes ben e taki, awinsi fa den sani san a taki, ben fon en konsensi. ₂₁Ma tapu a dei di Herodes ben friyari, Herodias feni a okasi fu kisi san a ben wani. Herodes ben gi wan fesa a dei dati gi den bigiman fu kondre, den edeman fu a legre nanga den prenspari sma fu Galilea. ₂₂Dan a umapikin fu Herodias kon na inisei. A bigin dansi gi Herodes nanga den sma di a ben kari kon. Ala sma ben lobi fa a e dansi. Dan Herodes taigi a pikin taki: “Yu kan aksi mi san yu wani. Mi o gi yu en.” ₂₃A sweri gi en taki: “Awinsi san yu aksi mi, mi o gi yu, awinsi na afu fu a kondre pe mi e rigeri!” ₂₄A pikin go na dorosei, dan a go aksi en m'ma taki: “San mi mus aksi?” En m'ma taigi en taki: “Aksi a ede fu Yohanes a Dopuman.” ₂₅A pikin go wantron baka na inisei na kownu, dan a taki: “Mi wani fu yu gi mi a ede fu Yohanes a Dopuman nownowde na ini wan preti.” ₂₆Herodes ben sari srefsrefi. Ma fu di a ben meki a sweri na fesi ala den sma di ben de na tafra nanga en, a no ben man drai mofo. ₂₇Wantron Herodes seni wan fu den srudati di e hori wakti fu go tyari a ede fu Yohanes kon. A srudati go na ini a straf'oso, dan a kapu Yohanes ede puru. ₂₈A tyari a ede fu Yohanes kon ini wan preti gi a pikin, dan a pikin gi en m'ma a preti nanga a ede na ini. ₂₉Di den man di ben e teki leri fu Yohanes yere san psa, den go teki a dedeskin fu Yohanes tyari go beri.

₃₀Di den boskopuman fu Yesus drai kon baka, den ferteri Yesus ala sani san den du, nanga san den leri den sma. ₃₁Furu sma ben e go kon, taki Yesus nanga den man no ben feni wan okasi fu nyan srefi. Dat' meki Yesus taigi den taki: “Kon meki un go na wan presi pe sma no e libi, dan un kan bro pikinso.”

₃₂So den teki wan boto go na wan presi pe sma no e libi, pe den wawan ben kan de. ₃₃Ma den sma si di den e gwe, èn furu fu den ben sabi pe den ben o go. So den sma kmopo fu ala foto waka es'esi go drape, dan den doro fosi Yesus nanga den man di ben e teki leri fu En. ₃₄Di Yesus kmopo ini a boto, A si wan bun bigi grupu sma. Ne A kisi wan dipi sari gi den. Bika den ben de leki skapu di no abi sma fu tyari den go na wei. Dan A bigin leri den furu sani. ₃₅Di a ben kon lati kba, den man di ben e teki leri fu Yesus kon na En, dan den taigi En taki: “Sma no e libi dya pe un de, èn a kon lati kba. ₃₆Seni den sma gwe na den kampu nanga den dorpu ini a birti, fu den kan go bai sani fu den nyan.” ₃₇Ma Yesus piki taki: “Na unu mus gi den sma wan sani fu nyan.” Den man piki taki: “Masra, dan un o abi tu hondro solfrumoni fanowdu fu bai nyanyan gi ala den sma disi!” ₃₈Yesus taki: “Un go luku omeni brede un abi.” Di den go luku, den taki: “Un abi feifi brede nanga tu fisi.” ₃₉Dan Yesus taigi den fu den meki den sma sidon tapu a grasi ini grupu grupu. ₄₀Den sma go sidon ini grupu fu wan hondro sma, nanga grupu fu feifitenti sma. ₄₁Dan Yesus teki den feifi brede nanga den tu fisi, A luku go na heimel dan A blesi den. Baka dati A broko den brede, dan A gi den man di ben e teki leri fu En fu den prati gi den sma. Sosrefi A prati den tu fisi gi den sma. ₄₂Ala den sma nyan te den bere furu. ₄₃Baka dati den man di ben e teki leri fu Yesus furu twarfu baskita nanga pis'pisi brede nanga fisi san ben tan abra. ₄₄Na feifi dusun mansma ben de di nyan den brede.

₄₅Wantron baka a sani disi, Yesus taigi den man di ben e teki leri fu En fu den bigin go nanga a boto na Betsaida, na a tra sei fu a meer. Dan En ben o kon baka te A seni den sma gwe. ₄₆Baka di A seni den gwe, A kren go tapu a bergi fu go begi. ₄₇Di neti tapu, a boto ben doro kba na mindrisei fu a meer èn Yesus wawan ben de na syoro. ₄₈Yesus si fa den man ben meki muiti e pari fu a boto go na fesi, bika a winti ben wai tranga. Dan fruku mamanten fosi dei kon krin, A waka tapu a watra go na den. A ben wani waka psa. ₄₉Ma di den man si taki A e waka tapu a watra, den prakseri taki na wan takrusani. Dan den bari, ₅₀bika den alamala ben skreki di den si En. Ma Yesus taigi den wantron taki: “No lasi ati! Na Mi. Un no abi fu frede!” ₅₁Dan Yesus go ini a boto, èn a winti tapu fu wai. Den man di ben e teki leri fu Yesus ben ferwondru srefsrefi. ₅₂Bika nanga aladi A ben meki den feifi brede kon moro furu, te nanga now den no ben ferstan san Yesus ben wani sori den fu Ensrefi.

₅₃Di den koti a meer abra, den doro ini a kontren di den ben kari Genesaret. Dan den go na syoro. ₅₄Di den kmopo ini a boto, wantron den sma si taki na Yesus. ₅₅Dan den panya a nyunsu ala sei taki Yesus doro. Ala sei pe den ben yere taki Yesus de, den ben opo den sikisma tyari go tapu matrasi na En. ₅₆Awinsi pe Yesus ben go, ini den dorpu, ini den foto noso na ini den kampu, den sma ben tyari sikisma go na En. Den ben poti den sikisma didon na den presi pe den ben hori wowoyo. Dan den begi Yesus efu den sikisma ben kan fasi a lantyi fu En krosi nomo. Èn ala sma di fasi En ben kon betre.