Gado e sori taki na En kari Moses
1Korak ben de a manpikin fu Yishar. Yishar ben de a manpikin fu Kehat èn Kehat ben de a manpikin fu Lefi. A Kehat disi teki Datan nanga Abiram, tu manpikin fu Eliab nanga On, a manpikin fu Pelet. Den man disi ben de fu a lo fu Ruben. 2Dan den man disi go na Moses. Tu hondro nanga feifitenti man ben go nanga den. Den man di ben go nanga den ben de fesiman fu a folku. Man di a folku ben e lespeki. 3Den go makandra na Moses nanga Aaron dan den taigi den taki: “Un e go tumsi fara. Ala sma fu a folku santa, bika MASRA de na den mindri. Fu sanede un denki taki un hei moro ala den sma fu MASRA?” 4Di Moses yere dati a trowe ensrefi nanga fesi na gron. 5Dan a taigi Korak nanga ala den sma di ben e waka na en baka taki: “Tamara MASRA sa meki un kon sabi suma na fu En, suma santa nanga suma kan kon krosbei fu En. Na a sma di A teki, na a sma dati A e meki kon krosbei fu En. 6Korak, disi na san yu nanga ala den sma di e waka na yu baka mus du. Un teki un pan ini san un e tyari krofaya. 7Un leti faya gi en. Dan tamara un mus bron switismeri na en tapu na MASRA fesi. A man di MASRA teki na a man dati sa santa. Un Lefitiman, un e go tumsi fara.” 8Dan Moses taigi Korak taki: “Un Lefitiman, un arki! 9A no sari unu taki a Gado fu Israel teki unu aparti fu ala den tra sma fu Israel, fu un kan kon krosbei fu En, fu du a wroko ini a santa tenti fu MASRA èn fu un kan dini ala sma. 10A no sari tu taki A meki yu nanga ala den brada fu yu, den Lefitiman, kon krosbei fu En? Na tron un wani tron priester now tu? 11Dat' meki a no nanga Aaron yu nanga ala den sma di e waka na yu baka wani feti, ma nanga MASRA. Bika suma na Aaron taki un mus go krutu na en?”
12Dan Moses seni kari Datan nanga Abiram, den tu manpikin fu Eliab. Ma den seni taigi en taki: “Wi no e kon. 13San yu du sari! Yu puru wi ini wan kondre pe merki nanga oni de bogobogo, fu wi kon dede ini a dreisabana. Dan efu dati no sari yu wan poti yusrefi leki wi basi tu? 14Yu no tyari wi kon ini wan kondre pe merki nanga oni de bogobogo. Yu no gi wi gron nanga dyari tu fu wi prani droifi, dan yu denki taki yu o drai wi ede baka? Un no e kon.” 15Ne Moses ati bron srefsrefi. A taigi MASRA taki: “No teki a graan-ofrandi fu den. Wan buriki srefi mi no teki fu den. Mi no du no wan fu den ogri tu.”
16Dan Moses taigi Korak taki: “Tamara yu nanga ala den sma di e waka na yu baka mus kon na MASRA fesi. Yu, den, nanga Aaron. 17Un mus teki un pan ini san un e tyari krofaya. Un mus bron switismeri na ini, dan un poti en na MASRA fesi. Ala tu hondro nanga feifitenti pan. Di fu yu nanga di fu Aaron mus de tu.” 18So ibriwan fu den teki en pan, den leti faya na ini, den poti switismeri na en tapu, dan den go tnapu makandra nanga Moses nanga Aaron na mofodoro fu a tenti pe yu kan miti nanga Gado. 19Di Korak tyari ala den sma di ben e waka na en baka kon na wan na mofodoro fu a tenti pe yu kan miti nanga Gado, MASRA sori En glori na ala sma.
20Dan MASRA taigi Moses nanga Aaron taki: 21“Un dribi go tnapu aparti fu den tra sma, fu Mi bron den puru na pasi ini wan momenti.” 22Ne Moses nanga Aaron trowe densrefi nanga fesi na gron dan den taki: “Tye Gado, Gado, Yu di gi a libibro na ala sani di e libi. Na wan man sondu. No lusu Yu atibron tapu ala sma.” 23Dan MASRA taigi Moses taki: 24“Taigi ala sma taki: ‘Un dribi kmoto fu den tenti fu Korak, Datan nanga Abiram.’ ” 25So Moses go na Datan nanga Abiram. Den fesiman fu Israel ben e waka na en baka. 26Dan a taigi ala den sma taki: “Un no go krosbei fu den tenti fu den man disi di no e bribi Gado. No fasi noti fu den noso den sondu fu den o meki unsrefi dede.” 27Ne ala sma dribi kmoto fu den tenti fu Korak, Datan nanga Abiram. Dan Datan nanga Abiram kon na dorosei. Den ben tan tnapu na mofodoro fu den tenti fu den. Den, den frow fu den, den manpikin fu den nanga den pikin pikinwan. 28Dan Moses taki: “Tapu a fasi disi un sa kon sabi taki na MASRA seni mi fu du ala den sani disi èn taki a no misrefi sidon prakseri den. 29Efu den man disi dede leki fa ala sma e dede èn efu sani psa nanga den leki fa e psa nanga ala sma, dan MASRA no seni mi. 30Ma efu MASRA sa du wan sani di noiti no psa ete, efu a meki a gron priti opo swari den man disi nanga ala sani fu den, meki den saka go libilibi na ini dedekondre, dan un sa sabi taki den man disi si MASRA fu noti.” 31Moses no ben kba taki wan bun fasi di a gron priti opo ondro den futu. 32A gron bradi en mofo opo, dan a swari den, den ososma fu den, ala den sma fu Korak nanga den sani fu den. 33So den nanga ala den sma fu den, saka go libilibi na ini dedekondre dan a gron tapu ensrefi baka na den tapu. Na so den dede kmoto na mindri den tra sma. 34Di den tra Israelitisma yere fa den ben e bari, den alamala lon gwe fu di den ben e prakseri taki a gron ben o swari den tu.
35Baka dati wan faya koti kmoto na loktu fu MASRA, di bron ala den tu hondro nanga feifitenti man di ben bron a switismeri. 36MASRA taigi Moses taki: 37“Taigi Eleasar, a manpikin fu priester Aaron, taki a mus puru den pan ini a faya. A faya di de na den ini a mus fringi gwe bun fara bika a santa. 38Den pan fu den man di pai nanga den libi fu a sondu di den du kon santa, bika den ben tyari den kon na MASRA fesi. A mus naki den kon plata dan yu e poti den tapu a altari. Den sa de leki wan warskow gi den Israelitisma.” 39So priester Eleasar teki den kopro pan fu den man di bron dede. Den naki den plata dan den tapu a altari nanga den. 40Den ben drape leki wan sani di ben mus memre den Israelitisma taki no wan tra sma, ma soso den bakapikin fu Aaron ben kan kon krosbei fu bron switismeri na MASRA fesi. Ala tra sma ben o dede leki Korak nanga den sma di ben waka na en baka. Na so MASRA ben taigi Moses taki den ben mus du.
41Ma a tra dei fu en ala den Israelitisma ben e krutu gi Moses nanga Aaron taki: “Un kiri sma fu a folku fu MASRA.” 42Di ala sma ben e kon tnapu lontu Moses nanga Aaron, den luku go na a tenti pe yu kan miti nanga Gado, dan den si taki a wolku ben tapu a tenti èn a glori fu MASRA ben de fu si. 43Dan Moses nanga Aaron waka go na a tenti pe yu kan miti nanga Gado. 44Ne MASRA taigi Moses taki: 45“Kmoto na mindri fu den sma disi meki Mi kiri den puru ini wan momenti.” Ma Moses nanga Aaron trowe densrefi nanga fesi na gron. 46Dan Moses taigi Aaron taki: “Teki wan pan ini san wi e tyari krofaya. Teki faya na a altari poti na ini, dan yu e poti switismeri na en tapu. Go es'esi na den sma den yu e meki den kon bun baka nanga Gado. Bika MASRA lusu en atibron na den tapu. A siki broko kba.” 47So Aaron teki wan pan leki fa Moses ben taigi en, dan a go es'esi na mindri den sma. Drape a si taki a siki ben broko kba na mindri den sma. Ne a poti switismeri ini a pan tapu a faya dan a meki Gado kon bun baka nanga a folku. 48Di a go tnapu na mindri den dedewan nanga den libiwan, a siki tapu. 49Boiti den wan di ben dede fu Korak ede, a siki kiri ete tin-na-fo dusun nanga seibi hondro sma. 50Di Aaron drai go baka nanga Moses na mofodoro fu a tenti pe yu kan miti nanga Gado, a siki ben tapu.
