Nomru 17

₁Dan MASRA taigi Moses taki: ₂“Taigi den Israelitisma taki den mus gi yu twarfu wakatiki. Fu ibri lo a edeman fu a lo mus gi yu wan wakatiki. Tapu ibri wakatiki yu sa skrifi a nen fu a lo. ₃Ma tapu a wakatiki fu a lo fu Lefi, yu sa skrifi a nen fu Aaron. Bika wan wakatiki mus de fu a edeman fu a lo fu den. ₄Yu mus poti den wakatiki na ini a tenti pe yu kan miti nanga Gado, na fesi den wortu di mus memre unu na san Mi ben taki, pe Mi gwenti fu miti nanga yu. ₅A wakatiki fu a man di Mi teki sa sproiti na mindri fu den trawan. Tapu a fasi disi Mi o tyari wan kba kon na a krutu di den Israelitisma e krutu gi yu, fu Mi no yere en moro.” ₆Baka di Moses taigi den Israelitisma san Gado ben taigi en, ala den edeman gi en wan wakatiki. Twarfu wakatiki, wan gi ibri edeman. A wakatiki fu Aaron ben de na den mindri. ₇Dan Moses poti den wakatiki na ini a tenti fu Gado na MASRA fesi. ₈A tamara fu en di Moses go ini a tenti fu a ferbontu, a si taki a wakatiki fu Aaron, di ben poti gi a lo fu Lefi, ben sproiti. A ben gi yongu froktu, bromki nanga lepi amandra. ₉Ne Moses puru den wakatiki na MASRA fesi, dan a tyari den go na dorosei gi den Israelitisma. Di den si san ben psa ibri man teki en eigi wakatiki baka. ₁₀Dan MASRA taigi Moses taki: “Poti a wakatiki fu Aaron baka fesi den wortu di mus memre unu na san Mi ben taki. Yu mus kibri en drape leki wan marki gi den sma di no wan du san Mi taki. Dan yu kan tyari wan kba kon na a krutukrutu fu den, fu Mi no yere en moro. Noso Mi o kiri den.” ₁₁Dan Moses du en. A du en leki fa MASRA ben taigi en taki a mus du en.

₁₂Ne den Israelitisma taigi Moses taki: “Luku fa wi o lasi un libi. Wi o dede. Wi alamala o dede. ₁₃Ala sma di go krosbei fu a santa tenti fu MASRA, sa dede. Na lasi yu wani taki wi alamala lasi wi libi?”