Roma 9

₁Mi na fu Kristus èn den sani san mi e taki tru. Mi no e lei. A Santa Yeye e tiri mi konsensi, èn mi konsensi e taigi mi taki mi no e lei. ₂Mi ati broko èn mi abi wan dipi sari. ₃Mi ben e winsi taki a fluku fu Gado ben de na mi tapu èn taki mi ben prati nanga Kristus, efu dati ben sa yepi den sma fu mi, mi eigi folku. ₄Na den sma fu Israel mi e taki. Gado ben teki den leki En pikin, èn A sori den En glori. A ben meki ferbontu nanga den èn A gi den a wèt. Na den na den sma di Gado ben sori fa fu dini En trutru, èn A ben gi den pramisi. ₅Den na den bakapikin fu den afo, èn di Kristus kon leki libisma, A gebore leki wan fu den. Na En na Gado di hei moro ala sani, èn meki wi opo En nen fu têgo. Amen.

₆Mi no e taki tak' Gado no du san A taki. Bika a no ala sma di gebore leki Dyusma na trutru Dyusma. ₇A no ala bakapikin fu Abraham na trutru bakapikin fu en tu. Bika a skrifi taki: “Isak sa de a rutu fu yu pipel.” ₈Dati wani taki tak' a no den pikin di meki libisma fasi na pikin fu Gado. Ma Gado e si leki pikin fu Abraham, soso den pikin di kon gebore tapu gron fu san A ben pramisi. ₉Bika Gado ben pramisi Abraham taki: “Tra yari a srefi ten disi, Mi sa drai kon dyaso baka, dan Sara sa abi wan manpikin.” ₁₀Ma a no dati wawan. Rebeka ben hori bere tu fu wan man nomo, fu wi afo Isak. ₁₁Den pikin no ben gebore ete, èn den no ben du no wan bun noso ogri ete. Ma Gado ben wani sori taki a didon na En fu teki suma A wani. ₁₂A no didon na san wan sma e du, ma a didon na Gado di e kari suma A wani. Dat' meki A taigi Rebeka taki: “A bigiwan sa kon ondro a makti fu a pikinwan.” ₁₃A de soleki fa a skrifi taki: “Yakob Mi ben lobi, ma Mi no ben man si Esau na ai.”

₁₄San un mus taki dan? Un sa man taki tak' Gado no e du sani tapu wan leti fasi? Kwet'kweti! ₁₅Bika Gado ben taigi Moses taki: “Mi e sari suma Mi wani sari, èn Mi e sori sari-ati na suma Mi wani sori sari-ati.” ₁₆So a no didon na san wan sma wani, efu noso omeni muiti a e meki. Ma a didon na a sari-ati fu Gado. ₁₇Bika a skrifi ini a Santa Buku tak' Gado taigi Farao taki: “Mi poti yu leki Farao nomo fu Mi kan teki yu fu sori Mi makti, èn fu Mi nen panya na heri grontapu.” ₁₈So yu e si taki Gado e sari suma A wani, èn A e tranga a ati fu suma a wani.

₁₉Dan son sma o wani taigi mi taki: “Efu na so a de, dan fa Gado kan feni taki un fowtu? Bika no wan sma o man tapu En fu A du san A wani.” ₂₀Ma suma na yu leki libisma fu taigi Gado tak' san A e du no bun? Wan kroiki no kan aksi a sma di meki en taki: “Fu sanede yu meki mi so?” ₂₁A man di e meki kroiki kan du nanga a kleidoti san a wani. Fu a srefi kleidoti a kan meki wan kroiki gi spesrutu momenti, nanga wan trawan gi aladei sani. ₂₂We, Gado e du a srefi sani. A wani sori En atibron nanga En makti, dat' meki A hori langa pasensi nanga den sma di meki En ati bron èn di meki fu go lasi. ₂₃A du dati fu meki den wan di A sori sari-ati, si o bigi En glori de. Langaten na fesi A ben seti en so fu den teki prati ini En glori. ₂₄Èn wi na den sma di A ben kari fu teki prati ini En glori. A no den Dyusma wawan, ma sosrefi den sma di no de Dyu. ₂₅A de soleki fa a skrifi ini a buku fu Hosea: “Den sma di no ben de Mi folku, Mi sa kari Mi folku. A wan di Mi no ben lobi, sa de a wan di Mi lobi. ₂₆Èn na a presi pe den ben yere taki: ‘Un no de Mi pipel,’ drape den sa kari den: Pikin fu a libilibi Gado.” ₂₇Yesaya srefi ben taki fu Israel taki: “Awinsi a folku fu Israel furu leki santi fu a se, na wan pikin grupu nomo o feni yepi. ₂₈Bika Masra o du san A taki tak' A o du na grontapu. A o du ala sani èn A o du en es'esi.” ₂₉Èn soleki fa Yesaya ben taki kba na fesi: “Efu Masra Sebaot no ben libi wantu bakapikin fu unu na libi, un ben o kon de leki Sodom èn un ben o de leki Gomora.”

₃₀San un mus taki dan? Un kan taki disi: Den sma di no de Dyu, no ben e suku fu tron sma di bun ini Gado ai. Ma now na den sma dati Gado meki kon bun ini En ai, èn a psa fu di den bribi. ₃₁Ma den Dyusma ben suku fu tron sma di bun ini Gado ai fu di den hori a wèt. Ma dati no psa. ₃₂Yu sabi fu sanede? Bika gi den Dyusma, a sani no ben go nanga bribi, ma nanga san yu e du. Den stotu den futu na a ston pe sma e aka den futu. ₃₃A de soleki fa a skrifi taki: “Mi e poti wan ston na ini Sion, pe sma o aka den futu, wan ston di o meki sma fadon. Ma a sma di poti en bribi na en tapu, no sa kon na syen.”